2 Corintoyguakuérape 1 - Biblia en Guaraní - ?anderuete ?e’? Por? 2015

Páblo ohai ko kuatiañe’ẽ Corintoyguakuérape

1Che, Páblo, añehenoiva’ekue Hesu Crísto remimondo ramo (apóstol ramo) Ñanderuete rembipota rupi, ha ñane hermáno Timotéo ndive, ore romomaiteiuka ko kuatiañe’ẽ rupi Ñanderuete iglésia Corínto peguápe ha opaite Hesu Crísto reheguávape oikóva guive Grécia retãme.

2Ñandejara Ñanderuete ha Ñandejára Hesu Crísto tapenembopy’a porã ha tapenembopy’aguapy.

Páblo omomba’eguasu Ñanderuetépe ohasa asy ramojepe

3Toñemomba’eguasu Ñandejára ha pe Jára Hesu Cristo Ru, Ha’e ningo pe Túva oiporiahuverekóva ha pe Jára oporomoangapyhýva.

4Ha’e voi oremoangapyhy opaite ore jehasa asýpe, ore roporomoangapyhy jevy hag̃ua Ha’e oremoangapyhy haguéicha.

5Oñeñohẽ haguéicha jehasa asyete ramo ore rekovépe, upéicha oñeñohẽ avei ñemoangapyhyeta ore rekovépe.

6Ore jehasa asy orejopy vai ramojepe, péva penemoangapyhy pejerovia porãve hag̃ua ha peropu’akapa hag̃ua avei Hesu Crísto rupi.

7Ore roha’ãrõ porã, roikuaágui peẽ pehasa asy háicha, peichaite peẽ peñemoangapyhy jevyva’erã.

8Ore roikuaaukase peẽme, ore hermanokuérape, umi jehasa asy rohasava’ekue Ásiape, orejopy vaietereirasa roimo’ã avei ore ára paha og̃uahẽmaha.

9Ore roñandúma roimeha Romaygua hag̃uáicha, péva katu ojehu ani hag̃ua rojerovia orejehe, rojerovia hag̃ua uvei Ñanderuete rehénte, omoingovéva umi omanova’ekuépe.

10Ha’e katu oreguenohẽva’ekue ore ñemanorãgui ha Ha’e oreguenohẽ jevýta opaite jehasa asyrãgui, Ha’e ningo ore esperánza.

11Peẽ orepytyvõ porãva’ekue pene ñembo’e rupi, ha péicha oĩve umi oagradecéva Ñanderuetépe, Ha’e oreguenohẽ haguére pe jehasa asýgui.

Mba’érehepa Páblo ndohói Coríntope

12Ore rovy’a roiko haguére hekópe ha py’a porãme ko yvy apére ha pende apytépe avei, ndoroikói py’apyñe’ẽ vaípe ni tova mokõime.

13Ore ningo rohai umi mba’e peẽ pemoñe’ẽvo hesakã porã hag̃ua peẽme, ha che aha’ãrõ peẽ pentende porãmbataha.

14Peẽ peikuaa voi ore roiko hague terakuã porãme peẽme g̃uarã, ha ore roha’ãrõ peẽ peiko hag̃ua avei ore rerakuã porã ramo Hesu Crísto ouha árape g̃uarã.

15Ko jerovia kóvape ahase raẽkuri pene rendápe, peẽ pejehovasa jevy hag̃ua ore jeju rupive.

16Ha ahasemo’ã pende táva Corínto rupi ahakuévo Macedóniape, ha Macedóniagui aju jevy hag̃ua pene rendápe, peẽ chemoirũ hag̃ua ahakuévo Juda departaméntope.

17 Napensa porãi mba’e piko ra’e, ahase ramoguare pene rendápe, térã piko che ajaposénte che rete rembipota che rova mokõigui, amoneĩ ha upéi ambotove haguére.

18Ñanderuete oikuaa porã katu ore ñe’ẽ peẽme g̃uarã ndaha’eiha peteĩ jevýpe: néi ha tove (heẽ ha nahániri).

19Che, Páblo, Silváno ha Timotéo romombe’uva’ekue pende apytépe Hesu Crístope, Ñanderuete Ra’y, Ha’e nde’iriva’ekue oñondive néi ha tove, Ha’e he’i uvei néi. (Péva he’ise pe Ha’e he’íva guive Ha’e ojapopa avei katuete hekopete).

20Hesu Crísto ojapopágui Ñanderuete promésa (néi), Hesu Crísto oiko avei Ñanderuete amen (péva he’ise ojapopa hague Ha’e oprometemava’ekue), oñemomba’eguasu hag̃ua orérupi Ñanderuetépe.

21Ñanderuete voi ningo oremombarete Hesu Crísto rupi ha oreporavo ko tembiapo kóvape g̃uarã Pytu Porãmbáva rupi.

22Ha Ñanderuete ñanemarcapáma ha Ha’e ome’ẽ avei ñandéve pe Pytu Porãmbáva ñande py’apýpe adelánto (jehupityrã) ramo omoañete hag̃ua pe ñembopy’apeteĩ (jarekóva hendive).

23Che katu ahenói Ñanderuetépe, Ha’e oiko hag̃ua che rechahare ramo; che nag̃uahẽi gueteri pene rendápe ani hag̃ua chepohyiete peẽme.

24Ore ndaha’éi pende jerovia jára, ore poipytyvõsénte pevy’ave hag̃ua pehóvo pende jeroviápe.