1Mba’eichaitépa Ñanderuete iñembojovakeha rupi omoypytũ Sion rajýpe, Ha’e oity Israel porãngue yvágagui yvýre, ha naimandu’avéi ipyrenda rehe iñembojovakeha árape.
2Ñanderuete ohundi, ndoiporiahuverekói ipy’arógui, Israel retã; yvy rehe oity Juda tavakuérape, oñemombareteva’ekue itápia yvate rupi; omotĩndy hetãme ha imburuvichakuérape.
3Ñanderuete ipy’aro haguére ohundi Israel pu’aka; Ha’e oñemomombyry umi hese ija’e’ỹva renondégui, ha omyendy Jacóbo rehe tata, ombokusugue hag̃ua opaite mba’e ijerekuévo oĩva guive.
4Ha’e voi oipyso iguyrapa orerehe ija’e’ỹvaicha ha omopu’ã ipo akatúa orerehe ombyaipa hag̃ua opaite mba’e iporãva oĩva guive. Sion rogakuéra rehe oñohẽ ipy’aro ku tatáicha.
5Ñanderuete oiko Israel rehe ija’e’ỹva ramo ha ohundi Israélpe, ohundi opaite hogaguasukuéra, oitypa itáva oñemombareteva’ekue, ha ombojo’a jo’a Juda rajýpe mba’embyasy ha jahe’o.
6Ha’e ojo’o Ñanderuete róga korapy, ojo’o háicha pe kokue yvy ohundi hag̃ua pe tenda oñembyaty haguépe; Ñanderuete oñembyesaráima umi areteguasúgui ha jepytu’uha áragui Siónpe, ha ipy’arógui omboyke tetã ruvicha ha pa’ikuérape.
7Ñanderuete omboyke pe kuave’ẽmby renda ha ndojapói mba’eve ramo hogaguasu oñemomba’eguasu haguépe héra tuichaitéva; omoĩ tetã ambueygua pópe itáva tápia yvate, ha osapukái hikuái Ñanderuete rógape ku vy’aguasu árape ramoguáicha.
8Ñanderuete oipota oñehundi Jerusalen tápia yvate, Ha’e oipyso inimbo oha’ã hag̃ua ha ndoipe’ái ipo ohundi hag̃ua ichupekuéra; ha ombojahe’o pe korapyjere yvate ha pe korapyjere ikupepeguáva, mokõivéva oñembotaperégui.
9Jerusalen táva rokẽnguéra ojeitypa yvy rehe, ombyai ha omopẽmba iñembotyhakuéra, Juda retã ruvicha ha imburuvichakuéra oĩma tetã ambueyguakuéra apytépe, oĩ’ỹháme tekombo’e porãva ha iprofetakuéra ndoguerekovéima ñe’ẽ ni techapáy (vision) Ñanderuetégui oúva.
10Umi omoakãva Siónpe oguapy yvýpe ha okirirĩmba. Omombo hikuái yvy timbo iñakã rehe, oñemonde hikuái vosakuépe, umi kuñataĩ pyahu Jerusalen peguáva omoĩ iñakãnguéra yvy rehe.
11Che resa tesay hetaitereígui ou hypa, che py’a tarovaite, che py’a ho’a yvy rehe, oñehundígui che retã rajy (Jerusalen) ha ohasa asyetereígui mitãkuéra ha umi okambúva avei ko táva ryepýpe.
12Ko’ãva oporandu isykuérape: Moõ piko oime pe trígo ku’i ha pe víno. Ipy’akangy joa hikuái ha ho’a ipy’amano umi ojekutupava’ekuéicha pe táva ryepýpe ha isy pyti’a rehe ipytupa.
13Mba’eichagua ñemoangapyhýpa aguerukáta ndéve, térã mávarehepa ikatúta rombojoja Jerusalen rajy. Mávarehepa ikatúta rombojoja romoangapyhy hag̃ua nde Sion rajy. Nde jepy’apy ku yguasúicha; ha mávapa ikatúta nemonguera.
14Nde proféta ohecháva ha he’íva guive ijapu ha nembotavy, ha’ekuéra ndohechaukái ne rembiapo vaikue reñembyasy ha rejevy hag̃ua (nde rape vaígui), ha’ekuéra omombe’únte peẽme japu ha ñembotavy.
15Opavave ohasáva guive umi tape rupi ojepopete joa nderehe; oturuñe’ẽ vai hikuái, ha oñeakãmbovavávo oñembohory Jerusalen rehe ha he’i: Kóa piko pe táva oje’e hague iporãveha, oiko hag̃ua opaite tetãyguakuéra mbohoryhára.
16Opaite umi nderehe ija’e’ỹva ojejurupe’a joa nderehe; oñembohory hikuái, ha oikyty ojuehe hãinguéra; ha he’i hikuái: Ñamokõna ichupe, añetehápe jahupitýma ha jahecháma upe ára ñaha’ãrõva’ekue.
17Ñanderuete ojapóma pe he’iva’ekue ojapotaha; ojapóma pe he’imava’ekue ymaite guive. Ha’e ohundi oiporiahuvereko’ỹre, ha ombovy’a ha omombarete umi hese ija’e’ỹvape.
18Esapukái nde py’aite guive Ñanderuetépe, nde Sion rajy, eheja tosyry ysyrýicha nde resay ára ha pyharekuépe; aníke repytu’útei ha ani opi nde resaykuéra.
19Epu’ã ha esapukái pyhare pukukue oimeraẽ guárdia oñepyrũ mboyve hembiapo. Eñohẽ ýicha nde py’apýpe oĩva guive Ñanderuete renondépe; ejepoupi ichupe ha emba’ejerure asy ichupe ne membykuerami rekove rehe, omanovahína ñembyahýigui umi tape ojuasaha rupi.
20Ema’ẽmína Nde, che Ruete, ha ehechami mávarehepa rejapóra’e koichagua mba’evai. Ho’uva’erã piko umi kuña imembykuérape, umi mitãmíme kunu’ũpópe oñangarekohágui. Ikatu piko ojejuka Ñanderuete rogaguasu ryepýpe pa’i ha profetakuérape.
21Mitãkuéra ha tujakuéra ojepyso joa yvy rehe umi táva cálle rupi, che kuñataĩkuéra ha che karia’ykuéra ho’apa kyse puku rãimbekuépe, rejukava’ekue nde pochyha árape; rehundipákuri ichupekuéra reiporiahuvereko’ỹre.
22Opáguio rei rembyatyukapa umi chemongyhyjéva, ku areteguasuete ramoguáicha; ha Ñanderuete ñembojovakeha árape ndaipóri avave okañy térã oikovéva; umi che amongakuaava’ekuépe ha amongaru porãva’ekuépe umi cherehe ija’e’ỹva ohundipáma.
Who We AreWhat We EelieveWhat We Do
2025 by iamachristian.org,Inc All rights reserved.
