Ezequiel 45 - Biblia en Guaraní - ?anderuete ?e’? Por? 2015

1Ág̃a pemboja’o ramo pene retã yvy po’a jeporavo rupi pene mba’erã ramo, pemboykéta peteĩ yvy pehẽngue iporã ha tuicháva pende Ruetépe g̃uarã, kuave’ẽmbyrãicha, ipukuva’erã 76,75 kilómetro ha ipyva’erã 30,70 kilómetro, péva oñemboykeva’erã pende Ruetépe g̃uarã kuave’ẽmbyrã ramo.

2Ko yvy tuichakue kóvagui ojepe’a jevy peteĩ yvy pehẽngue pende Ruete rogaguasúpe g̃uarã ha ipukukue 1535 métro ha ipykue avei 1535 métro, ha ijerekuévo 25,50 métro ipykue opyta nandi.

3Ha ko yvy kóvape, oha’ãva 76,75 kilómetro ipukukuépe ha 30,7 kilómetro ipykuépe, oñemopu’ãva’erã che rogaguasu.

4Ko yvy oñemboykéva opytáta pa’ikuéra mba’erã ramo, omba’apóva che rogaguasúpe, oñembojávo pende Ruete ypýpe omba’apo hag̃ua, ha ko yvy kóvape opyta hogakuéra rendag̃ua, ko yvy pehẽngue oñemboykégui pende Ruetépe g̃uarã.

5Ha upéi oñekytĩva’erã ambue yvy pehẽngueguasu ambue Levi ñemoñarenguérape g̃uarã, umi omba’apóva tembiguái ramo (Leviguakuéra) che rogaguasúpe, ha ipukukue 76,75 kilómetro ha ipykue 30,7 kilómetro, ha péva opyta imba’etee ramo oiko hag̃ua ipype, ha ko yvy pehẽngueguasuetéva oñemboja’o jevýta 20 loteguasúvape.

6Ha pe táva rendag̃ua reha’ãta 15,35 kilómetro ipykue ha 76,75 kilómetro ipukukue, ko yvy kóva oñemboykéta kuave’ẽmbyrãicha, ha opytáta opaite Israelgua mba’e ramo.

7Ha pe tetã ruvicha yvy pehẽnguerã opytáta pa’ikuéra, Leviguakuéra ha tavaguasu yke akatúa ha asúpe, pe asu pegua oñemyasãita pa’i, Levigua ha tavaguasu rembe’y guive yguasu rembe’y peve; ha pe akatúa pegua oñemyasãita pa’i, Levigua ha tavaguasu rembe’y guive kuarahyresẽ gotýo (Jordan peve); ohupity peve nórte gotýo Juda yvy rembe’y, ha sur gotýo Benjamin yvy rembe’y peve.

8Ko yvy kóva opytáta pe tetã ruvicha mba’erã ramo, ha’ekuéra araka’eve ndojopyveiva’erã che retãyguakuérape; ha pe yvy hembýva oñeme’ẽta Israel retãyguakuérape g̃uarã, omboja’o hag̃ua itribukuéra apytépe hekoha ramo.

9Péicha he’i pende Ruete: Peẽ Israel retã ruvichakuéra pepoiva’erã pende reko mbarete ha mondágui. Pembojovake uvei hekoitépe ha ani pejopyve che retãyguakuérape.

10Peiporuva’erã pe balánza pésa añeteguáva, ijojava’erã pende éfa (oha’ã hag̃ua mba’e ra’ỹingue, oguerekóva 22 lítro) ha pende báto (oha’ã hag̃ua mba’e hykuéva, oguereko avei 22 lítro).

11Peteĩ homer oguereko 220 lítro, upéicha 10 éfa oike peteĩ homérpe, ha 10 báto oike avei peteĩ homérpe.

12Ha pe síclo (11,17 grámo) katu oguerekova’erã 20 géra (1 géra = 0,56 grámo), ha 60 síclo ojapóta peteĩ mína (670 grámo).

13Péicha peikuave’ẽva’erã: Pende trígogui peme’ẽva’erã 3,66 lítro meme homérgui (220 lítro), ha pende cebádagui (ojogua trígope) peme’ẽva’erã avei 3,66 lítro meme homérgui.

14Ha peme’ẽva’erã pende acéitegui pene kuave’ẽmby ramo meme homérgui 2,2 lítro.

15Ha peme’ẽva’erã peteĩ ovecha ra’yrusu cáda 200 pende ovecha apytégui Israel retã kapi’i porãvévagui, pene kuave’ẽmby tembi’u reheguáva ramo, kuave’ẽmby angaipa reheguáva ramo ha kuave’ẽmby py’aguapy reheguáva ramo, peñemopotĩ hag̃ua pene rembiapo vaígui, he’i pende Ruete.

16Mayma Israel retãygua katuete ome’ẽva’erã ko’ã kuave’ẽmby ko’ãva Israel retã ruvichápe g̃uarã.

17Ha pe Israel retã ruvicha katu oikuave’ẽva’erã kuave’ẽmby ojehapypáva, kuave’ẽmby tembi’u ha vinoguiguáva umi areteguasuha árape, umi jasyra’y jave, umi jepytu’uha árape ha mayma Israel aretekuérape g̃uarã; ha’e omoĩva’erã pe kuave’ẽmby angaipa reheguáva, kuave’ẽmby tembi’u reheguáva, kuave’ẽmby ojehapypáva rehegua ha umi kuave’ẽmby py’aguapy reheguáva. Ombogue hag̃ua hembiapo vai Israel retãgui.

18Péicha he’i pende Ruete: Pe jasy peteĩha jave, pe ára peteĩháme peikuave’ẽva’erã pende vaka atýgui peteĩ tóro ra’yrusu iporãitéva, pemopotĩ jevy hag̃ua che rogaguasu.

19Ha pe pa’i ojapyhyva’erã pe kuave’ẽmby angaipa rehegua ruguykuégui, ha omoĩva’erã che rogaguasu horconguéra rehe, ha pe kuave’ẽmby renda irundyve ijyke akuaha (esquína) rehe, ha umi okẽ ñepyrũha rehe oĩva pe korapy hyepyvoguápe.

20Péicha ojejapo jevyva’erã pe ára 7-hápe pe jasy oñepyrũvape omopotĩ jevy hag̃ua umi oñemongy’ávape, oñemongy’ase’ỹ ramojepe, ha pemopotĩ hag̃ua avei che rogaguasu.

21Pe jasy peteĩháme, pe ára 14-hápe, peguerekova’erã pe páscua, ko arete kóva ipukuva’erã 7 ára; oje’uva’erã pan ilevadura’ỹre.

22Upe ára upévape pe mburuvichaguasu oikuave’ẽva’erã ijehe ha maymaite hetãygua rehe, peteĩ tóro ra’yrusu hembiapo vaikuéra rehe.

23Ha umi 7 ára oiko aja pe areteguasu peikuave’ẽta pende Ruetépe g̃uarã, 7 tóro ra’yrusu ha 7 ovecha mácho iporãitéva, kuave’ẽmby ojehapypáva meme ko’ẽre 7 ára pukukue, avei peteĩ kavara mácho kuave’ẽmby tembiapo vai reheguáva ramo.

24Ha peteĩteĩ tóro ra’yrusu reheve peikuave’ẽva’erã peteĩ éfa (22 lítro) trígo ha peteĩteĩ ovecha mácho reheve avei peteĩ éfa (22 lítro) trígo ha peteĩteĩ éfa peikuave’ẽva’erã avei peteĩ hin (3,66 lítro) acéite.

25Pe jasy 7-ha, pe ára 15-hápe, pe areteguasu (Enramáda) aja pe mburuvichaguasu ojapo jevyva’erã ko’ã 7 ára tenonde peguáicha. Oikuave’ẽta kuave’ẽmby tembiapo vai reheguáva, kuave’ẽmby ojehapypáva ha kuave’ẽmby tembi’u reheguáva.