Romayguakuérape 15 - Biblia en Guaraní - ?anderuete ?e’? Por? 2015

1Ñanembarete ramo ñande jeroviápe, jarahava’erã paciéncia reheve umi ikangyvévape, anítei jaiko jajapo hag̃ua umi mba’e iporãva ñandéve g̃uarãnte.

2Opavave ojeroviáva Hesu Crísto rehe tojapo mba’e iporãva hapichápe g̃uarã, ha’e okakuaa hag̃ua ohóvo ijeroviápe.

3Ni Hesu Crísto ndojapoiva’ekue ichupe g̃uarã añónte iporãva, upéva rãngue ojehai avei: Umi jeja’o rei oje’éva nderehe, ho’apa cheári, (Crísto ári) (Salmokuéra 69,9).

4Opaite umi mba’e yma guive oĩva Ñanderuete kuatiañe’ẽme ojehaiva’ekue ñanembo’e hag̃ua, okakuaa hag̃ua ñane paciéncia ha ñanemokyre’ỹ hag̃ua iñemoangapyhy rupi, aipórõ jajejoko hatãkena pe esperánza rehe.

5Pe paciéncia ha pe ñemoangapyhy ou voi Ñanderuetégui, ha umíva rupi Ha’e penepytyvõ peiko hag̃ua oñondive peteĩ ñe’ẽme Hesu Crísto oipota háicha ha Ha’e oiko haguéicha avei ko yvy apére.

6Oñondive pemomba’eguasu peteĩ py’ápe ha peteĩ jurúpe Ñandejárape ha Hesu Crísto Rúpe.

Hesu Crísto evangélio

oñemombe’u tetã ambueyguakuérape

7Upévare pejoguerohory ha peñangareko porã ojuehe Hesu Crísto ojapo haguéicha penendive oñembotuicha hag̃ua Ñanderuetépe.

8Peikuaa porãke, Hesu Crísto oiko Israelguakuéra rembiguái ramo omoañete hag̃ua Ñanderuete mborayhu ha umi promésa Ha’e ome’ẽmava’ekue Abraham, Isaac ha Jacóbope,

9ha umi tetã ambueyguakuéra omomba’eguasu hag̃ua avei Ñanderuetépe, Ha’e ohechaukágui imborayhu ha iporiahuvereko opavavépe; ojehai háicha avei: Upévare che romomba’eguasu tetã ambueyguakuéra apytépe ha aropurahéita nde Réra, (Salmokuéra 18,50).

10Ha he’ive avei: Peẽ tetã ambueyguakuéra, pevy’ákena Ñanderuete retã Israel ndive, (Deuteronómio 32,43).

11Peẽ tetã ambueyguakuéra pemomba’eguasu Ñanderuetépe, opaite tetãnguéra pemomba’eguasuva’erã ichupe (Salmokuéra 117,1).

12Oúta Isai rapógui pe oñembo’ýtava, oisãmbyhy hag̃ua tetã ambueyguakuérape, ha umía ojeroviáta hese, (Isaías 11,10).

13Pe esperánza Ñanderuete ome’ẽva tomyenyhẽ pende jerovia, vy’águi ha py’aguapýgui, ha pende esperánza tokakuaave ohóvo Pytu Porãmbáva pu’aka rupi.

14Che hermanokuéra, che añetehápe aguerovia ama’ẽvo penderehe, peẽ penerenyhẽ py’aporãgui ha arandúgui, peẽ voi pejohekombo’e hag̃ua.

15Py’aguasúpe che ahai peẽme ko kuatiañe’ẽ kóva pomomandu’a hag̃uánte umi mba’ére, Ñanderuete ome’ẽgui chéve pe poriahuvereko me’ẽmby.

16Hi’ári ningo che, Hesu Crísto rembiguái, amyasãi hag̃ua Ñanderuete Evangélio peteĩ pa’i porã ramo tetã ambueyguakuérape, ha’ekuéra oiko hag̃ua kuave’ẽmby ramo oñemboheko porãhína Pytu Porãmbáva rupi Ñanderuetépe g̃uarã, (Romayguakuérape 12,1-2).

17Che avy’a Hesu Crísto cheporavo haguére amba’apo hag̃ua Ñanderuetépe g̃uarã.

18Che ndapohekombo’eséi che akãgui rei, ambohasánte umi mba’e Hesu Crísto ohechaukamava’ekue chéve, tetã ambueyguakuéra iñe’ẽrendu hag̃ua iñe’ẽ ha hembiapópe,

19Ñanderuete Pytu Porãite pu’aka rupi oikóma ñande apytépe techaukaha (señal) ha mba’e techapyrãva (milágro) ramo. Upéicha ningo Jerusalen ha ijerekuévo guive Ilírico peve, che amoherakuã opaite tetãnguérape Hesu Crísto Evangélio, (marandu porã).

20Che añeha’ãmba amyasãi hag̃ua Hesu Crísto evangélio oñemombe’u’ỹháme, ani hag̃ua che amopu’ã mba’eve ambue omoñepyrũ haguépema.

21Oĩ háicha Ñanderuete kuatiañe’ẽme: Umi nohendúiva mba’eve ichugui, ohendúta, ohecháta ha oikuaáta ichupe, (Isaías 52,15).

Páblo oñanduse Romayguakuérape

22Heta jevy che ahase ramojepe pene rendápe ndaikatúi, ajejokógui.

23Ko’ág̃a ahupity rire opaite ko’ã tetã ko’ãvape, che pohechaseve, heta áñoma che poñanduséma avei.

24Aha ramo Espáñape, che poñanduse; aha’ãrõ ningo ikatu che pohecha ahasakuévo, ha peẽ voi chegueraha hag̃ua Espáñape, che avy’aitemi riréma pende apytépe sapy’ami ramojepe.

25Ko’ág̃a ahase raẽ Jerusalénpe, aipytyvõ hag̃ua upépe ñane hermanokuérape.

26Macedoniaygua ha Acaiayguakuéra ohechakuaa iporãha oipytyvõ umi hermáno mboriahukuérape oikóva Jerusalénpe.

27Vy’apópe oipytyvõ hikuái hermáno mboriahúpe. Israelguakuéra omboja’o haguéicha tetã ambueyguakuérape imba’e yvága pegua, péva he’ise imba’e pytu porã megua, ko’ág̃a tetã ambueygua omyengoviava’erã avei ichupekuéra imba’e yvy árigua, Jerusalengua ohasa asýgui.

28Ajapopávo ko’ã mba’e ha ame’ẽmbávo hekoitépe Jerusalenguápe tetã ambueyguakuéra remime’ẽ (ofrénda), ahase Espáñape, ha ahasakuévo poñanduse Rómape.

29Che aikuaa porã, aháta ramo pene rendápe, ag̃uahẽtaha opaichagua Hesu Crísto jehovasa reheve.

30Che hermanokuéra ajerure asy katu peẽme, Hesu Crísto rérape ha mborayhu pytu porã reheguápe, peẽ chepytyvõ hag̃ua avei pene ñembo’épe, Ñanderuete rérape.

31Ha’e chesalva hag̃ua umi Judayguakuéra pógui, oñemoĩmava cherehe, ha che rembiaporã Jerusalen iglesiayguakuérape g̃uarã taiporã avei.

32Che ag̃uahẽkuaa hag̃ua vy’a reheve pene rendápe, Ñanderuete rembipota rupi, ha apytu’u hag̃ua pende apytépe.

33Ha Ñanderuete ñanembopy’aguapýva, toĩ opavave penendive, taupéicha (amen).