1Bildad, pe Suahgua, oñe’ẽ ha he’i:
2Araka’e pevépa péicha reñe’ẽta, nde juru oñe’ẽhína ku yvytuatãicha.
3Ombojovake vai piko Ñanderuete térãpa Ipu’akapáva omongy’áta pe justícia.
4Nde ra’ykuéra oñemohembiapo vai ramo hendive g̃uarã, ha’ekuéra ohupitýta avei hembiapo vai repy.
5Nde katu eheka Ñanderuetépe nde py’aite guive ha ejerure asy Ipu’akapávape.
6Nepotĩ ha nde reko porã ramo, katuete Ha’e oñangarekóta nderehe ha omopu’ã jevýta nde róga.
7Upéi Ñanderuete omboheta hetavéta ne mba’erã ne mba’e ko’ag̃aguágui.
8Eporandúna nde ypykuéra tenonde g̃uarãvape ha emoĩna ne akãme nde rukuéra arandu.
9Ñande ningo kueheguarénte, ha mba’eve ndajaikuaa porãi, ku kuarahy’ãichante ñande arakuéra yvy apére.
10Ñande ypykuéra nembo’éta, oñe’ẽ porãta ndéve, ha ipy’apy guive reguenohẽta heko arandu.
11Piri okakuaa porãnepa y’ỹre, okakuaa porãnepa tuju’ỹre.
12Hovyũ porã ramo jepe, oñekytĩ rire pya’e ipiru.
13Upeichaite ojehu avei mayma umi hesaráiva Ñanderuete rapégui ha umi tekove ñaña ndohupitymo’ãi umi mba’e oha’ãrõitéva.
14Oha’ãrõitéva rehe oñemondohóta inimbóicha, ha ijerovia ningo ñandu renimbo reínte.
15Ha’ekuéra ojejokose ramo hóga rehe, péva oryryipa; ojejapyhyse ramo hese ndaipu’akamo’ãi, ho’apátagui.
16Ku yvyra akýicha oiko kuarahy renondépe, ha hoky pyahukuéra osẽ opa rupi.
17Hapokuéra ojepyso jepe itatýre ha oja hatã hóga tápia rehe.
18Oñemondoro ramo hendágui, hendague ombotovéta ichupe ha he’íta: Araka’eve ndorohechaiva’ekue.
19Ema’ẽ porãke, péva hína pe vy’a ha’ekuéra ojohúva hekovére, ha opa rire, ambuekuéra heñói jevýta hendaguégui.
20Nde nemandu’a porãke, Ñanderuete nomboykemo’ãi heko potĩvape ha noipytyvõi umi heko ñañávape.
21Ñanderuete omyenyhẽ jevýta nde juru puka rorýgui ha ne rembekuéra vy’águi.
22Ha umi oñemoĩva nderehe ha opaite heko vaíva róga opa reiva’erã.
Who We AreWhat We EelieveWhat We Do
2025 by iamachristian.org,Inc All rights reserved.
