Matéo 13 - Biblia en Guaraní - ?anderuete ?e’? Por? 2015

Pe ñemitĩhára

1Upe árape Hesu osẽ rire pe ógagui oho oguapy pe yguasu rembe’ýpe.

2Heta hetãygua ijatýgui ijerekuévo, Ha’e ojupi peteĩ bárcope ha oguapy, ha umi ohendúva ichupe opytapa pe y rembe’ýpe.

3Ha oñe’ẽ ichupekuéra heta mba’e rehe, ñe’ẽ mbojoja rupi, ha he’i: Pe ñemitỹhára osẽ oñemitỹvo.

4Ha oñemitỹvo oĩ mba’e ra’ỹi ho’áva tape ári, ha ou umi guyra ha ho’upa.

5Ha oĩ avei ho’áva itatýpe, yvy pererĩme, ha voiete heñói, pe yvy ipererĩgui upépe;

6ha osẽvo pe kuarahy okaipa, ha ndahapo pukúigui ipirupa.

7Ha ambue katu ho’a ñuatĩndýpe, ha umi ñuatĩ okakuaa pya’eve ha ombopytupa pe trígo.

8Ha ambueteve katu ho’a yvy porãháme, ha oĩ hi’áva peteĩ ha’ỹigui 100, ambuégui 60, ambuevégui 30 peve.

9Ijapysáva ohendu hag̃ua, tohendu.

10Ha oñemboja hese hemimbo’ekuéra, ha oporandu: Mba’érehe piko reñe’ẽ ichupekuéra ñe’ẽ mbojoja rupivénte.

11Ha Hesu he’i ichupekuéra: Peẽme ikatúgui ojekuaauka pe yvága pegua reko ñemimby, ichupekuéra katu nahániri.

12Upe oguerekóvape oñeme’ẽvéta oguerekove hag̃ua; ha upe ogueroko’ỹvagui katu ojepe’áta upe oguerekomimíva jepe.

13Upévare Che añe’ẽ ichupekuéra ñe’ẽ mbojoja rupive, oma’ẽrõ jepe hikuái ani ohecha, ha ojapysaka ramojepe ani hag̃ua oentende (hesakã).

14Ha oiko hesekuéra ko proféta Isaías ñe’ẽngue: Pehendúta pende apysa rupi, ha napentendemo’ãi; pehecháta pende resa rupi, ha ndapehechakuaamo’ãi, (Isaías 6,9-10).

15Ko’ã tetãygua py’apy oñemohatã ha ohendu vaiete ijapysakuéra rupi; omboty hikuái hesa ani hag̃ua ohecha hesa rupi, ani ohendu ijapysa rupi, anioentende ipy’apy rupi, upévare nog̃uahẽséi che rendápe, ha upévare Che ndaikatúi amonguera ichupekuéra.

16Horyete pende resa ohecháva guive ha pende apysa ohendúva guive.

17Añetehápe Che ha’e peẽme, heta proféta, ha heta heko potĩva ohechaseva’ekue ko’ã mba’e peẽ pehechavapeína, ha ndohechaiva’ekue; ha ohenduseva’ekue ko’ã mba’e peẽ pehendúva ha nohenduiva’ekue hikuái.

18Pejapysaka ko’ág̃a pe ñembojoja ñemitỹhára rehegua mba’épa he’ise.

19Oime ramo ohendúva pe yvága pegua tetãguasu rehegua ñe’ẽ ha nahesakãi ramo ichupe mba’épa he’ise, ou aña ha ogueraha pe oñeñotỹva’ekue ipy’apýpe. Pevahína pe mba’e ra’ỹi ho’áva tape ári.

20Pe oñeñotỹva’ekue itatýpe ha’ehína upe ohendúva pe ñe’ẽ ha vy’apópe oñemomba’e hese,

21ha ndahapóigui, ndahi’aréi; ha oúvo hekovépe angekõi ha jepy’apy vai pe ñe’ẽ péva rehe, voiete ha’e oñepysãnga.

22Pe ñuatĩndýpe oñeñotỹva’ekue ningo ha’e upe ohendúva pe ñe’ẽ péva, ha ojepy’apyetereígui ko yvyarigua mba’e rehe ha oñeha’ãmbaiténteva pirapire rekávo, ko’ã mba’e ko’ãva ombopytupa pe ñe’ẽ péva ha ndahi’ái.

23Upe yvy porãme oñeñotỹva’ekue katu ha’ehína upe ohendúva pe ñe’ẽ ha oikuaáva mba’épa he’ise, ha peteĩ ha’ỹigui hi’a 100, 60 térã 30 semílla ra’ỹi ipyahúva.

Hesu omombe’u ñe’ẽ mbojoja Ñanderuete retãguasu reheguáva

24Ha Hesu omombe’u avei ichupekuéra ambue ñe’ẽ mbojoja, ha he’i: Pe yvága pegua tetãguasu ñesãmbyhy ningo ojoguaite peteĩ kuimba’épe oñotỹva’ekue mba’e ra’ỹi ikokuépe,

25ha oke aja upe kuimba’e upéva, ou peteĩ hese ija’e’ỹva ha oñotỹ ñana vai itrigotýpe, ha oho.

26Ha heñóivo iñemitỹngue ha hi’ávo, ojekuaa avei pe ñana vai.

27Ha ou pe óga jára rembiguaikuéra, ha he’i ichupe: Karai nereñotỹipara’e mba’e ra’ỹi porã meme nde kokuépe, ha mba’éicha piko osẽ pe ñana vai.

28Ha’e he’i ichupekuéra: Péva ningo cherehe ija’e’ỹva rembiapo. Ha umi tembiguái oporandu ichupe: Reipotápa roho ha romondoro umi ñana vai oĩva nde kogatýpe.

29Ha ha’e he’i ichupekuéra: Tovénte, ani ág̃a pemondoróvo pe ñana vai pemondoro avei hendive pe trígo ra’ỹimi.

30Peheja tokakuaa oñondive ñemono’õha ára peve, ha ñemono’õha árape ha’éta umi oikytĩvape: Pembyaty raẽ pe ñana vai ha pejokua aty atýpe ojehapy hag̃ua; ha pe trígo katu peñongatu che róga mba’e ra’ỹi oñeñongatuhápe.

31Ha omombe’u avei ichupekuéra ambue ñe’ẽ mbojoja: Ñanderuete retãguasu ñesãmbyhy ningo ojoguaite mostáza ra’ỹime, peteĩ kuimba’e ojapyhyva’ekue ha oñotỹ ikokuépe.

32Upéva ningo opaite mba’e ra’ỹigui imichĩve, ha okakuaa rire katu tuichave opaichagua ka’avógui, ha oñembo’yvyra rakãvo, umi guyra árare ovevéva oñembohupa hakã rehe.

33Hesu omombe’u avei ichupekuéra ambue ñe’ẽ mbojoja: Ñanderuete retãguasu ñesãmbyhy ningo ojoguaite pe levadúrape, peteĩ kuñakarai ombojehe’ava’ekue 40 kílo harína rehe ombovupa hag̃ua.

34Opaite mba’e Hesu he’íva hetãyguakuérape he’ínte ñe’ẽ mbojoja rupi, ha mba’evete nde’íri ichupekuéra, ndaha’éi ramo ñe’ẽ mbojoja rupi.

35Oiko hag̃ua pe proféta he’iva’ekue: Añemoñe’ẽta ñe’ẽ mbojoja reheve; aikuaukáta mba’e ñemiháme oĩva guive ko yvy ári iñepyrũ guive, (Salmokuéra 78,2).

36Ha omondopa rire hetãyguakuérape hogakuérape, Hesu oike avei peteĩ ógape. Ha hemimbo’ekuéra oñemboja hendápe ha he’i Hesúpe: Eréna oréve mba’épa he’ise pe ñe’ẽmbojoja pe ñana vai reheguáva.

37Ha Ha’e he’i: Pe oñotỹva umi mba’e ra’ỹi porã ningo pe yvyarigua Ra’y (Hesu).

38Pe kokue ningo hína ko múndo; pe mba’e ra’ỹi porã ningo hína Ñanderuete retãguasu ra’ykuéra; ha pe ñana vai katu aña ra’ykuéra.

39Satana, upe hese ija’e’ỹva ningo oñotỹva’ekue pe ñana vai; ha pe ñemono’õha ára katu he’ise pe ñembojovake oikova’erã ára pahápe; ha umi mono’õhára katu umi yvága rembiguaikuéra (angelkuéra).

40Pe ñana vai oñembyaty háicha ha oñemombo tatápe, peichava’erã avei pe ára pahápe (og̃uahẽvo pe ñembojovakeha ára).

41Yvyarigua Ra’y omondóta ijyvága rembiguaikuérape ombyaty ha omosẽ hag̃ua Ñanderuete retãguasúgui opaite umi oporomoñepysãngava’ekue ha hembiapo vaívape,

42ha omombopáta tatakua rata rendýpe, upépe oikóta pe tasẽ ha tãi pururũ (tapia g̃uarãme).

43Upe árape umi heko potĩva omimbíta kuarahýicha, Itúva yvága pegua retãguasúpe. Pe ijapysáva ohendu hag̃ua, tohendu.

44Ñanderuete retãguasu ñesãmbyhy ningo ojoguaite mba’erepyeta ñúme oñeñotỹva’ekuépe, ha peteĩ kuimba’e ojohu rire omokañy jevy; ha vy’apópe oho oñemumba opaite mba’e oguerekóva rehe, ha oho ojogua upe ñu upéva.

45Ñanderuete retãguasu ñesãmbyhy ningo ojoguaite avei pe ñemuhárape ohekáva peteĩ pérla (ita hepy) porãva,

46ha ojohúvo pe pérla hepyetéva, oñemumba opaite oguerekóva guive rehe, ha ojogua pe pérla.

47Ñanderuete retãguasu ñesãmbyhy ningo ojoguaite avei peteĩ pira rédpe ojeitýva yguasúpe ha ombyaty opaichagua pira.

48Ha henyhẽvo pe red, umi pira kutuhára ombotyryry (otira) ha onohẽ y rembe’y peve, ha oguapyhápe oiporavo umi iporãvéva ha omoĩ ajakápe, ha ivaíva guive katu omombopa.

49Ha peichava’erã avei upe ára pahápe: Osẽta yvága rembiguaikuéra ha oipe’áta umi iñañáva umi heko potĩva apytégui,

50ha omombóta umi iñañávape tatakua rendýpe, ha upépe oikóta tasẽ ha tãi pururũme.

51Peikuaa piko mba’épa he’ise ko’ã mba’e; ha ombohovái hikuái: Roikuaa porã.

52Ha Hesu he’i ichupekuéra: Upévare umi mbo’ehára iñarandúva oikéva guive Ñanderuete retãguasúpe, ojoguaite ko óga járape oguenohẽva imba’e ñongatupy apytégui mba’e ipyahu ha itujáva.

Hesu oho itáva Nazarétpe

53Ha he’ipa rire ko’ã ñe’ẽ mbojoja, Hesu oho upégui.

54Ha Hesu og̃uahẽ rire itávape, oporombo’e Ñanderuete rógape, ha ohecharamoite hikuái, ha he’i joa: Mamógui piko ou iñarandu ha ipu’akaitéva, ojapo hag̃ua umi tembiapo techapyrãva (milágro).

55Kóva piko ndaha’éi pe carpintéro ra’y. Isy piko ndahérai María, ha ityvyrakuéra piko ndaha’éi Jacóbo, Jose, Simon ha Júdas.

56Ha heindykuéra piko ndoikói ñande apytépe, ha mamógui piko ou ichupe ko’ã mba’e ko’ãva.

57Ha ipochy hese hikuái. Ha Hesu he’i ichupekuéra: Opaite proféta rerakuã ivai itáva ha hogateépe.

58Upévare ndojapói upépe heta tembiapo techapyrãva, ha’ekuéra ndojeroviái haguére hese.