Éxodo 37 - Biblia en Guaraní - ?anderuete ?e’? Por? 2015

Pe óga jojohuha rembiporukuéra

1Bezaleel ojapo avei pe karameg̃ua péva acácia yvyrágui; ipukukue 1,10 métro, ipekue 65 centímetro ha ijyvatekue 65 centímetro.

2Ha ojaho’i hikuái oroitépe hyepy ha okáguio ha ojapo hikuái avei órogui peteĩ alfajía ijerekuévo.

3Omboyku hese g̃uarã irundy argólla órogui umi hakuaha (ijesquína) irundyvépe g̃uarã; peteĩ yke gotýo mokõi argólla ha ambue yke gotýo ambue mokõi argólla.

4Ojapo hikuái avei hi’ýva acácia yvyrágui, ha ojaho’ipa órope,

5ha omoinge hi’ýva umi argólla kuára rupi oĩva pe karameg̃ua yke rehe, ojeguerahakuaa hag̃ua pe karameg̃ua.

6Ojapo hikuái avei pe karameg̃ua juru ñembotyha (tápa) oroitégui; ipukukue 1,10 métro, ha ipekue 65 centímetro.

7Ojapo avei mokõi querubin (ángel ruvicha) órogui, oñenupãmbyréva martíllope, pe karameg̃ua apýra mokõivépe g̃uarã.

8Peteĩ querubin oñemoĩ peteĩ apýrape ha pe ambue querubin ambue apýrape; umi querubin ha pe karameg̃ua ojejapo peteĩ óro pehẽnguégui.

9Ha umi querubin pepo ojepyso hi’ári, ipepokuérape oñu’ã hag̃ua pe karameg̃ua; umi querubin opyta ojovái ha hovakuéra oma’ẽ pe karameg̃ua juru ñembotyha rehe.

10Ojapo hikuái avei peteĩ mesa acáciagui; ipukukue 88 centímetro, ipekue 44 centímetro ha ijyvatekue 66 centímetro;

11ha ojaho’i oroitépe, ha omoĩ hese peteĩ jeguaka ijerekuévo.

12Omoĩ avei hese peteĩ alfajía ipéva 8 centímetro ijerekue rehe, ha pe alfajía apýra jerekue rehe ojapo peteĩ akã jeguaka (coróna) oroguiguáva.

13Ha ojapo hikuái avei hese g̃uarã irundy argólla óro ñemboykupyrégui, ha omoĩ irundyve hakuahápe (esquína) irundyve hetyma rehe.

14Pe alfajía guýpe opyta umi argólla ha ikuárape oñemoinge hi’ýva ojegueraha hag̃ua pe mesa.

15Hi’yvakuéra ojapo hikuái acáciagui ojegueraha hag̃ua pe mesa, ha ojaho’ipa órope.

16Ojapo avei umi tembiporu oĩva’erãva pe mesa ári, umi ña’ẽmbeguasu (fuénte), umi ña’ẽmbe (platíllo), jarrokuéra ha vasokuéra oroitégui.

17Ojapo avei pe tataindyenda órogui, martíllope oñenupãmbyréva; ipyenda, hi’ýva, ijyvakuéra, ijyvoty ryru, iñapokytã (mba’e apu’ã) ha ijyvoty ra’ãngakuéra ojueheguáva.

18Hi’ývagui osẽ 6 jyva; mbohapy jyva peteĩ tataindyenda yke, ha mbohapy jyva ambue tataindyenda yke.

19Peteĩ jyva rehe oĩ mbohapy yvoty ryru, peteĩ iñapokytã ha peteĩ yvoty ra’ãnga, ha ambue jyva rehe mbohapy yvoty ryru, peteĩ iñapokytã ha peteĩ yvoty ra’ãnga; péicha ojejapo avei umi 6 jyva rehe.

20Ha pe tataindyenda ýva ru’ãme oĩ irundy yvoty ryru, iñapokytã ha yvoty ra’ãnga.

21Peteĩ apokytã umi jyva peteĩha ha ambue mokõiha guýpe, ha ambue apokytã umi jyva mbohapyha ha irundyha guýpe, ha ambue apokytã umi jyva 5-ha ha 6-ha guýpe.

22Umi apokytã ha umi jyva ojejapo peteĩ óro pehẽnguégui, oñenupãmbyre martíllope.

23Ojapo oroitégui avei umi 7 temiendy, tataindy mopotĩha ha ña’ẽmbekuéra.

24Opaite hembiporukuéra ojejapo 33,50 kílo oroitégui.

25Ojapo avei pe kuave’ẽmby renda ojehapy hag̃ua mba’e ryakuã porã, yvyra acáciagui, 44 centímetro ipukukue ha péicha avei ipekue; ijyke irundy peteĩcha, ha ijyvatekue 88 centímetro; ha hetégui osẽ 4 hatĩ.

26Ha oñu’ã oroitépe: Ijape, ijykekuéra, ijerekue rehe, hatĩnguéra, ha avei pe jeguaka ijapýra jerekuévo.

27Ojapo avei mokõi argólla órogui pe jeguaka apýra guýpe, umi mokõive hakuaha (esquínape) mokõive yke gotýo, oñemoinge hag̃ua ipype umi hi’ýva ojeguerahakuaa hag̃ua.

28Ha ojapo umi hi’ýva acáciagui, ha oñuãmba órope.

29Ojapo avei hikuái pe acéite omona hag̃ua, ha pe mba’e ryakuã porã hyakuã asy hag̃ua, pe mba’e ryakuã porã apoha katupyrýva ojapo háicha.