Matéo 20 - Biblia en Guaraní - ?anderuete ?e’? Por? 2015

Pe parraltýre

ñe’ẽ mbojoja

1Ñanderuete retãguasu ningo ojoguaite ku óga járape osẽva ko’ẽjúvo oheka umi omba’apótava iparraltýpe.

2Ha opyta rire oñoñe’ẽme umi mba’apohára ndive, oñeme’ẽtaha ichupekuéra 1 denário (6 grámo óro morotĩ) peteĩ ára rembiapo rehe, ha upéi omondo ichupekuéra omba’apo hag̃ua iparraltýpe.

3Ha 9 hóra rupi ha’e osẽ jevy pe táva plázape ha ojohu ambue tapicha oiko reivahína.

4Ha he’i ichupekuéra: Tapeho avei peẽ che parraltýpe ha ame’ẽta peẽme heko peguáva mba’apo repy. Ha oho hikuái.

5Ha osẽ jevývo asaje pyte ha ka’aru pyte rupi ojapo jevy ojapo haguéicha.

6Ha osẽ jevývo ka’aruete, (5 hóra rupi), ha’e ojohu jevy ambue tapichakuérape oiko reíva, ha oporandu ichupekuéra: Mba’érehe piko peiko reipeína ko’ápe ko ka’aru pukukue javeve.

7Ha ombohovái hikuái ichupe: Avave naoremomba’apói. Ha upévo ha’e he’i ichupekuéra: Tapeho avei peẽ che parraltýpe.

8Ka’aru pytũvo pe parralty jára he’i imba’erepy rerekuápe: Ehenói umi mba’apoharakuérape ha eme’ẽ ichupekuéra hembiapo repy, eñepyrũ umi ipaha pegua ndive ha upéi umi tenondeveguarépe.

9Ha ou umi oñepyrũva’ekue hembiapo ka’aruete (la 5 rupi), ha peteĩteĩvape ome’ẽ peteĩ denário.

10Ha oúvo umi tenondeveguare oimo’ã oñeme’ẽvetaha ichupekuéra, oñeme’ẽ katu ichupekuéra peteĩ denárionte avei.

11Ha oguerahávo hikuái ipirapire, oñe’ẽ vai pe óga jára rehe,

12ha he’i hikuái: Ko’ã itapykuéva ningo omba’apo peteĩ hórante ha nde rembojoja orerehe, ore roaguantapa pe mba’apo pohýi kuarahy aku ára pukukuépe.

13Ha pe óga jára ombohovái peteĩvape ha he’i: Che angirũ (amígo), ndajapói nderehe mba’eve ivaíva, nereñe’ẽme’ẽipa ra’e chéve peteĩ denário rehe remba’apotaha.

14Eraha ne mba’éva ha tereho, ha che ningo ame’ẽse ko ára pahakuévo omba’apova’ekuépe pe pirapire ame’ẽ haichaite avei ndéve,

15térãpa ndaikatúi ajapo ajaposéva che mba’égui. Térãpa nde ndepy’arasy chendive chepy’a porã haguére.

16Ha péicha, umi itapykuevéva itenondeva’erã, ha umi itenondevéva itapykueva’erã.

Hesu he’i jevy omanotaha

17Ha Hesu ojupívo Jerusalénpe, ohenói umi 12 hemimbo’ekuérape, ha’eñoháme tape rehe, ha he’i ichupekuéra:

18Ko’ág̃a jajupiñaína Jerusalénpe, ha yvyarigua Ra’y ho’áta umi pa’i ruvicha ha kuatia haihára pópe, ojuka hag̃ua ichupe hikuái.

19Omoĩta ichupe umi tetã ambueygua poguýpe oñembohory hag̃ua hese, oñenupã hag̃ua ha oñemosãingo hag̃ua kurusu rehe; ha mbohapy ára rire katu oikove jevýta.

Pe mba’e Juan ha Jacóbo sy ojeruréva

20Upéramo og̃uahẽ Hesu hendápe Zebedéo rembireko imembykuéra ndive, oñesũ henondépe ha omba’ejerure ichupe.

21Ha ha’e oporandu ichupe: Mba’épa reipota. Ha ha’e he’i: Eréna ko’ã che memby mokõime toguapy Ñanderuete retãguasúpe, peteĩ nde akatúa gotýo ha ambue nde asu gotýo.

22Hesu katu he’i ichupe: Ndapeikuaái upe pejeruréva. Ikatúpa pey’u pe mba’e che hay’útavagui, ha ha’ekuéra he’i: Ikatu.

23Ha Hesu he’i jevy ichupekuéra: Pey’uva’erã pe che hay’úvagui, peguapy hag̃ua che akatúa térã che asu gotýo, katu ndachéi ame’ẽva’erã, upéva oñeme’ẽta umi che Ru ombosako’ívape g̃uarã.

24Ha umi ambue 10 hemimbo’e ohendúvo péva, ipochy umi ambue mokõi hemimbo’e ndive.

25Upémaramo Hesu ohenói ichupekuéra ha he’i: Peẽ ningo peikuaa umi tetã ruvicha oñembojaraha hetãyguakuéra rehe, ha mburuvichakuéra oiporu vai ipu’aka ojopy hag̃ua hapichakuérape.

26Ha pende apytépe ndaupeichamo’ãi, upe ituichasevéva pende apytépe, upéva oikova’erã pene rembiguái ramo,

27ha upe itenondeséva pende apytépe, oikova’erã pene rembijokuái ramo avei.

28Yvyarigua Ra’y ndoúi haguéicha oporojokuái hag̃ua, ou uvei oiko hag̃ua tembiguái ramo ha ome’ẽ hag̃ua hekove heta rehehápe.

Hesu omonguera mokõi hesatũvape

29Osẽvo hikuái Jericógui, omoirũ ichupe peteĩ aty ndetuicháva.

30Ha péina mokõi hesatũva, oguapyvahína tape yképe, ohendúvo hikuái Hesu ohasaha ohóvo, osapukái ha he’i: Oreporiahuverekomína, David Ra’y.

31Ha umi ohóva Hesu ndive oja’o ichupekuéra okirirĩ hag̃ua, ha’ekuéra katu osapukái hatãve: Ore Jára, David Ra’y oreporiahuverekomína.

32Ha Hesu opyta, ohenói ha oporandu ichupekuéra: Mba’épa peipota Che ajapo penderehe.

33Ha ha’ekuéra ombohovái: Ore Jára, rohechase jevy ningo.

34Ha Hesu oiporiahuverekoite ichupekuéra, ha opoko hesakuéra rehe, ha upevovete ohecha jevy hikuái; ha ou hikuái hapykuéri.