1Evy’a nde ikatu’ỹva nememby ha nde memby’ỹre reikóva, epurahéi ha esapukái vy’apópe ne’ĩra haguére nememby; umi kuña ojepoíva imembyvéta umi kuña omendávagui.
2Embotuichave nde róga tymba pirekueguiguáva, eipysopa ne aosãingo pererĩ rembotuicha hag̃ua ikotykuéra, ani rejejokótei, embopukuve nde róga pirekueguiguáva sãnguéra ha emoinge hatãve nde poste’ikuéra yvy guýpe.
3Rejepysóta nde akatúa ha nde asu gotýo; ha ne ñemoñarenguérape oñeme’ẽta tetãnguéra mba’e ha ha’ekuéra oikóta umi táva oñembotapereva’ekuépe.
4Ani rekyhyjétei, nderejesareamo’ãi, ha ani retĩtei, nereñemotĩmo’ãi, nderesaraipáta katu ne mitãrõ guare ñemotĩgui, ha pe ñemotĩ nanemenavéi ramoguarégui.
5Nde apohare ningo ne ména, nde Ruete, oñembohérava yvága atykuéra Jára; ha Israel Jára Heko porãva ndejogua voi; oñehenoiva’erã ichupe ko yvy tuichakue Jaraiteha.
6Ñanderuete nerenóivo reiko ko kuñakarai ojepoívaicha ha oñembyasývaicha ipy’apýpe. Mba’éicha piko peteĩ ména hesaráita hembireko tenondeguarégui, he’i Ñanderuete.
7Sapy’amínte apoi ndehegui, ha upéi rogueru jevýta ha ahechaukáta ndéve Che rohayhuha.
8Sapy’amínte añomi che rova ndehegui, Che chepochy haguére nendive, ko’ág̃a katu Che roiporiahuvereko jevy, he’i pende Ruete, ndejoguamava’ekue.
9Ojehu haguéicha Noe árape, ame’ẽ che ñe’ẽ ichupe ha’évo: Ndejaho’imo’ãvéima ýpe ko yvy tuichakue; upéicha ame’ẽ ko’ág̃a che ñe’ẽ, ndachepochyveimaha nendive, ha ndorohaviramo’ãveimaha avei.
10Umi cerrorusu oku’epa ramojepe, ha umi cérro oryryipa ramojepe che poriahuvereko katu noñemboykemo’ãi ndehegui, ha che ñembopy’apeteĩ nendive ndopamo’ãi, he’i nde Ruete, ndeporiahuverekóva avei.
11Angái, angái, nde rejepy’apýva, nde revy’a’ỹva ha reñemoangapyhy’ỹva, péina ápe Che romboguapýta ita vera hovy pa’ũme.
12Ne rovetãnguéra ajapóta ita vera pytãgui, ne rokẽnguéra ita vera hovýgui, ha nde korapyjere yvate tuichakue ita vera hepyetévagui.
13Ha opaite nde ra’ykuéra oikóta nde Ruete remimbo’ekuéra ramo; ha pe py’aguapy oñemboheta hetavéta ichupekuéra g̃uarã.
14 Justíciape reñemopu’ãta, emboyke pe kyhyje, natekotevẽvéigui rekyhyje, ha eñemomombyry pe ñemondýigui, natekotevẽvéigui reñemondýi.
15Oñemoĩ ramo hikuái nderehe, eikuaa porãke, nosẽi hague che py’apýgui, ha upe oñemoĩva nderehe ho’ava’erã katuete ne renondépe.
16Pema’ẽ porãke, Che voi ajapova’ekue pe hiérro rehe omba’apóvape, ha’e oipeju tatapỹi rendy ojapo hag̃ua iñorãirõ rembiporurã, péicha Che ajapova’ekue avei pe mba’e mbyaihárape, ombyai hag̃ua jey.
17Mba’eveichagua ñorãirõ rembiporu oñemopu’ãva nderehe nanderupitymo’ãi ha opaichagua juru oñe’ẽvaíva nderehe nde voi remboykéta, ko’ã mba’e pende Ruete voi ojapo hembiguaikuérape g̃uarã ha che jehovasa omoirũ avei ichupekuéra.
Who We AreWhat We EelieveWhat We Do
2025 by iamachristian.org,Inc All rights reserved.
