Apocalípsis 9 - Biblia en Guaraní - ?anderuete ?e’? Por? 2015

1Ha pe yvága rembiguái 5-ha ombopúvo ituru ahecha peteĩ jasytata ho’áva áragui yvýpe, ha oñeme’ẽ ichupe pe yvykua pypukuete lláve.

2Ha ha’e oipe’ávo pe yvykua pypukuete (yvypore’ỹ) rokẽ ojupi tatatĩ ha omoypytũmba pe kuarahy ha pe ára.

3Pe tatatĩgui osẽ tukueta oñemosarambíva yvy apére, ha oñeme’ẽ ichupekuéra pu’aka oñeme’ẽ háicha alacránpe oporojopi hag̃ua.

4Ha oje’e ichupekuéra ani hag̃ua ojapovai ka’avo yvy pegua, ni ñana, ni yvyrakuéra rehe, umi tetãyguakuérape oguereko’ỹva isyváre Ñanderuete ra’ãnga jopyha (márca) rehénte uvei.

5Ndojehejái katu ojuka hag̃ua ichupekuéra, ombohasy hag̃uánte uvei ichupekuéra 5 jasy pukukue rupi, ha pe mba’asy oñandukáva ha’ete ku alacran oporojopi ramoguáicha.

6Umiha árape tetãyguakuéra omanosete ramojepe nomanomo’ãi, pe ñemano okañýtagui ichuguikuéra.

7Umi tuku ojogua kavajúpe oñembosako’íva oñorãirõ hag̃uáme iñakãnguéra ári oguereko peteĩ mba’e ojoguáva peteĩ coróna oroguiguávape, ha hovakuéra kuimba’e rováicha.

8Hi’avakuéra ojogua kuña akã raguépe, hãinguéra leõ rãime.

9Ipyti’a mo’ãha ojogua peteĩ camisa hierroguiguápe ha ipepo hyapu cárro ruéda ojeréva pya’etévape, térã kavajukuéra oñani ramo ñorãirõháme ramoguáicha.

10Huguái alacran popĩaicha térã ñuatĩcha ombohasy hag̃ua tetãyguakuérape 5 jasy pukukue rupi.

11Umi tuku ruvicha ningo aña retã rembiguaiguasu, oñembohéra Israelgua ñe’ẽme Abadon, ha Greciaygua ñe’ẽme Apolion, he’iséva porombyaihára.

12Peteĩ jehasa asyguasu ohasáma, oĩvehína katu ambue mokõi.

13Ha pe yvága rembiguái 6-ha ombopúvo ituru, che, Juan, ahendu ñe’ẽpu osẽva kuave’ẽmby renda oroguiguáva ratĩ pa’ũgui, oñemohendáva Ñanderuete renondépe,

14ha he’i pe yvága rembiguáipe oguerekóva ipópe pe turu 6-ha: Ejora umi irundy yvága rembiguáipe oñeñapytĩva Éufrates rembe’ýpe.

15Ha ojejorávo umi irundy yvága rembiguáipe oñembosako’íva pe hóra, pe ára, pe jasy ha pe áñope g̃uarã ojuka hag̃ua tetãygua aty (vore) mbohapyhápe oikóva guive yvy apére.

16Ha che ningo ahendu oĩha 200.000.000 (200 millónes) kavaju arigua.

17Ha techapaýpe ahecha ikavajukuéra ha hi’ariguakuérape, ha’ekuéra omonde ipyti’a mo’ãha pytãva, hovýva ha sa’yjúva. Umi kavaju akãnguéra ningo ku leõ akãicha, ijurukuéragui osẽ tata, tatatĩ ha azúfre (ojogua fósforope).

18Ko’ã mbohapy plága: tata, tatatĩ ha azúfre osẽva kavaju jurúgui ha’e ojuka hag̃ua opaite tetãygua aty (vore) mbohapyhápe, oikóva gueteri yvy apére.

19Umi kavaju pu’aka ningo oĩ ijurúpe ha huguáipe; huguaikuéra ningo ojogua mbói akãme, ha umíva rupi oporombyai.

20Ha umi ambue tetãygua nomanoiva’ekue ko’ã plága rupi, noñembyasýi hikuái ojapovai haguére omomba’eguasuve uvei ohóvo Satanáme ha ijára gua’úpe ojejapova’ekue órogui, plátagui, bróncegui, ita ha yvyrágui, ndohecháiva, nohendúiva ni ndoguatáiva.

21Noñembyasýi oporojuka haguére, ni ombopaje haguére, ni oñemboheko vai haguére ambue kuña ndive, ni omonda haguére ha ndojevyséi Ñanderuete rendápe.