Salmokuéra 55 - Biblia en Guaraní - ?anderuete ?e’? Por? 2015

Ñembo’e ojeruréva Ñanderuete tohundi umi ñemiháme oporojukasévape - David purahéi arandu, Neginot guive

1Ehendumína, Nde, che Ruete, che ñembo’e, ha ani remboykétei che mba’ejerure asy ndéve.

2Ejapysaka porãmína, ha chembohovaimi, amba’ejerure asy jave ndéve che ñembo’épe, che mba’embyasy cheangekõigui.

3Umi cherayhu’ỹva ñe’ẽ chemyangekõi ha umi iñañáva chejopy asy, tembiapo vai oity cheári ha pochypópe chemuña hikuái.

4Che py’a oryryipa chepype, ha pe kyhyje ñemanoguigua ho’a cheári.

5Kyhyje ha ryrýi oupa cheári, ha cheñu’ã pe kyhyje ndetuicháva.

6Ha che ha’e: Máva tamora’e chembopepo ku pykasúicha, aveve hag̃ua mombyry apytu’u hag̃ua.

7Añetehápe mombyry akañyse, aiko hag̃ua py’aguapýpe umi ñu perõme. Selah

8Pya’e pya’e akañyse pe yvytu ratã renondégui.

9Ehundi ichupekuéra, Nde, che Jára ruvusu, embojuavy iñe’ẽnguéra, ahecha ningo itávape ipy’a hatã ha oñorairõha.

10Ára ha pyhare ombojere joa hikuái ikorapyjere yvate, ha ñorãirõ ha ñehundi oĩ ipy’apýpe.

11Ñaña reko oĩ itávape, ñembotavy ha ñemonda ndojeíri imbyteguikuéra.

12Cherayhu’ỹva oñembohory rire cherehe agueropu’akava’erãmo’ã, peteĩ cherehe ija’e’ỹva oñemoĩ rire cherehe, akañyva’erãmo’ã ichuguikuéra.

13Nde katu, kuimba’e, che pehẽngue, che irũ voi, ha che rayhuhára.

14Jaikómi oñondive mborayhupópe ñamombe’u ojupe umi mba’e ñemimby, ha jaiko amígo ramo Ñanderuete rogaguasúpe, peteĩ ñe’ẽme.

15Peteĩ tesa pirĩme tomano hikuái, ha hekove reheve toguejypa omanómava retãme, ipy’apýpe ha hogakuérape oĩ rehe ñaña reko.

16Che katu, che Ruetépe amba’ejerure asýta, Ha’e cheguenohẽta che jejopy vaígui.

17Ka’aru pytũme, pyhareve ha asajekuépe añembo’éta ha amba’ejerure asýta, ha Ha’e ohendúta che ñembo’e.

18Ha’e ombopy’aguapy jevýta che ángape, hetaiterei cherayhu’ỹva oñemoag̃ui ramojepe cherehe.

19Ñanderuete iguapyhaguasu guive cherendu, ha upéi oipy’apýta ichupekuéra nomoambuéigui hikuái hekovekuéra ni ndokyhyjégui hikuái Ñanderuetégui. Selah

20Pe iñaña rekóva omopu’ã ipo iñirũnguéra rehe, oikóva hendive py’aguapypópe, ha opyrũ hikuái iñe’ẽme’ẽmby rehe.

21Umi mba’e ijuru he’íva he’ẽve eíragui, ipy’apýpe katu ñorãirõ rehe ojepy’amongeta, iñe’ẽnguéra ikyrỹive acéitegui, ipahápe katu ñandekutu kyse pukúicha.

22Eity umi mba’e ipohýiva ha ndejopýva Ñanderuete ári, Ha’e oñangarekóta nderehe, Ha’e ndohejamo’ãi heko potĩva oñehundi.

23Ha Nde, che Ruete, reitýta ichupekuéra oñehundi hag̃ua yvykua pypukuguasúpe. Umi kuimba’e tuguy oñohẽva ha oikóva oporombotavy nog̃uahẽmo’ãi hi’ára mbyte peve, che katu nderehe ajerovia’aína.