1Nde katu, che ra’y, eñemombarete Hesu Crísto jeporiahuverekópe.
2Ha umi mba’e nde rehenduva’ekue che jurúgui, heta techahare rovake, péva eikuaauka kuimba’e ikatupyrývape ojerovia hag̃ua, ha’ekuéra ombo’ekuaa jevy hag̃ua ambuekuérape.
3Nde, Timotéo, eropu’aka ñande jehasa asy Hesu Crísto rehehápe, isoldádo porãvaicha.
4Opaite soldádo ohóva ñorãirõme, ndojepy’apýi inegociorã rehe, oñeha’ã uvei ombovy’a hag̃ua huvichápe, ome’ẽtava ichupe hembiapo repy.
5Opaite umi oñeha’ãmbáva ramojepe, carrerahápe ndohupitymo’ãi avei hepyrã noñaníri ramo hekoitépe.
6Pe kokue jára omba’apo pohýiva ikokuépe, ohupity ra’ẽta ikoga’a.
7Ejepy’amongeta porã ko che ha’éva rehe: Ñanderuete tome’ẽ ndéve arandu rehechakuaa porã hag̃ua opaite mba’e.
8Nemandu’a tapiákena Hesu Crístore, Ñanderuete omoingoveva’ekue omanova’ekue apytégui, Ha’e David ñemoñare, ha eñangarekókena remyasãi hag̃ua hekópe pe evangélio che amombe’u haguéicha ndéve.
9Ko evangélio kóva rehehápe che aĩ cárcelpe, añeñapytĩ peteĩ mba’evai apoháraicha, Ñanderuete ñe’ẽ porãite katu avave ndaikatúi oñapytĩ.
10Upévare che aropu’aka opaite mba’e umi poravopyre rehehápe, ha’ekuéra ohupity hag̃ua avei pe salvacion Hesu Crísto rupi ha oike hag̃ua heko jajaipávape.
11Ko ñe’ẽ kóva ningo hi’añetehína: Ñamanóma ramojepe hendive, jaikove jevyva’erã avei hendive;
12jahasa asy ramo ñaína hesehápe, ñande ñaisãmbyhyva’erã avei hendive; ñande ñambotovérõ (ñanegárõ) ichupe, Ha’e avei ñanembotoveva’erã.
13Ñande ja’a ramojepe angaipápe, ha’e ndopoimo’ãi ñandehegui, Ha’e ndaikatúigui oñembotove ojupe voi.
14Opavavépe emomandu’a ko’ã mba’ére Ñanderuete renondépe ha ehekombo’e ichupekuéra ani hag̃ua oñoñe’ẽ’api hikuái, kóva naiporãi mba’everãme ha ombyaimante umi ohendúvape.
15Eñeha’ãmba reiko hag̃ua hekópe Ñanderuete renondépe, hembijokuái porãvaicha natekotevẽi reguerotĩ, emyasãi hekópe uvei Ñanderuete ñe’ẽporãite (evangélio).
16Eñemboyke umi profecía gua’úgui, ko’ãva rupi oñembohetave ohóvo yvyarigua reko vai.
17Imbo’epy ojogua kuru pochýpe, oñemyasãivéva ohóvo, ijapytépe ojejohúma avei Himenéo ha Filétope,
18ha’ekuéra opiáma pe añetegua rapégui, omyasãigui Ñanderuete omoingovemaha umi omanova’ekuépe, ha upéicha omombiáma avei ñande apytégui umi ojeroviava’ekuépe.
19Oĩ katu Ñanderuete kuatiañe’ẽ apytépe peteĩ ñe’ẽporã opytáva ku itaguasúicha, hi’ári oñemopu’ãva peteĩ óga, ko itaguasu kóva nomýiri ni noñemoambuéi, péicha he’i ko ñe’ẽ kóva: Ñanderuete oikuaa porã imba’eteévape, (Nahum 1,7; Juan 10,27). Ha tojei teko vaígui opavave ojeroviáva añetehápe Hesu Crísto rehe, Ijára ramo.
20Peteĩ ogaguasúpe oĩ opaichagua mba’yru: Mba’yruoroguiguáva, plataguiguáva, yvyraguiguáva ha ñay’ũguiguáva. Umi mba’yru óro ha plataguiguáva ojeporu ombovy’a ha ombotuicha hag̃ua pe karaiguasúpe oúvo mbohupa ramo, ha umi ambue mba’yru ojeporu ambuekuérape g̃uarã.
21Upéicha avei umi ojeroviaitéva Ñanderuete rehe toñemboyke opaichagua mba’evaígui, oiko hag̃ua Ñanderuete renondépe imba’yru oroguiguáva térã plataguiguávaicha, Ñanderuete oiporukuaáva opaichagua tembiapo porãme, oñembosako’iva’ekue guive Ha’érupi.
22Ejehekýi karia’y rete rembipota vaígui, ha ejapyhy uvei opaite mba’e porãva: Justícia (tekojoja), jerovia, mborayhu, py’aguapy, py’apotĩ reheve, ha eñembo’e Ñanderuetépe nde py’apotĩ reheve.
23Ejehekýi umi ñe’ẽ joapi výro reívagui, eikuaa porãke umía oguerunteha ñorãirõ (ha py’arasy rei).
24Hesu Crísto rembiguái natekotevẽi oñorãirõ, ipy’a porãva’erã uvei opavave ndive, ikatupyryva’erã oporombo’e hag̃ua ha ipacienciakuaava’erã avei.
25Ñemomirĩme ha teko porã reheve ohekombo’eva’erã umi oñemoĩvape hese, ha oha’ãrõva’erã Ñanderuete omoambue hag̃ua ipy’aro (ipy’a vai) py’a porãme, ojohu hag̃ua hikuái avei pe añetegua rape,
26ha opáyvo ojehekýi Satana ñuhãgui, oiko hag̃ua Ñanderuete rembipota poguýpe.
Who We AreWhat We EelieveWhat We Do
2025 by iamachristian.org,Inc All rights reserved.
