2 Réyes 21 - Biblia en Guaraní - ?anderuete ?e’? Por? 2015

Manases oisãmbyhy

1Manases oñepyrũvo oisãmbyhy oguereko 12 áño, ha oisãmbyhy 55 áño Jerusalénpe; isy réra Hepsiba.

2Ha ojapo mba’evai Ñanderuete resa renondépe; oiko teko añáme, oiko haguéicha umi tetã Ñanderuete omosẽva’ekue Israel ñemoñare renonderãgui.

3Omopu’ã jevy umi yvy yvate itúva Ezequías oitypava’ekue, ha omopu’ã avei kuave’ẽmby rendanguéra Baálpe g̃uarã, ha ojapo peteĩ Asera ra’ãnga, ku Acab, Israel retã ruvicha, ojapo haguéicha; ha omomba’eguasu mbyjaita árare oĩvape, ha ombotuicha umívape.

4Omopu’ã avei kuave’ẽmby renda Ñanderuete rogaguasúpe omomba’eguasu hag̃ua ambue jarakuérape, pe óga rehe Ñanderuete he’iva’ekue: Jerusalénpe, che rogaguasúpe, che réra oñemomba’eguasúta.

5Ha omopu’ã kuave’ẽmby rendanguéra mbyjakuéra árare oĩvape g̃uarã, Ñanderuete róga korapy mokõivéva ryepýpe.

6Ha’e oikuave’ẽ avei ita’ýrape kuave’ẽmby renda ári, ha oñemoĩ oma’ẽ jasytataguata rehe, ha oiko mba’ekuaa ha paje apohára ramo; péicha omboheta hetave hembiapo vai Ñanderuete renondépe, ombopochyve ohóvo ichupe.

7Ha omoĩ peteĩ Asera ra’ãnga ha’e ojapoukava’ekue ha omohenda Ñanderuete rogaguasúpe, Ñanderuete he’i ramo jepe David ha ita’ýra Salomónpe: Pe óga pévape, Jerusalénpe oĩva, Che amoĩta che réra opaite ára peve ha Che aiporavova’ekue ko yvy pehẽngue kóva opaite Israel tríbu yvy apytégui.

8Ha ndahejamo’ãi Israélpe oñemosẽ ko yvy kóvagui, Che ame’ẽmava’ekue ituvakuérape, ha’ekuéra oñangareko guive che ñe’ẽ rehe ha ojapo ramo umi mba’e Che ha’eva’ekue guive ichupekuéra, ha opaite tembiapoukapy che rembiguái Moisés he’iva’ekue ichupekuéra ojapo hag̃ua.

9Ha’ekuéra katu naiñe’ẽrendúi, Manases omyaña myaña uvei ichupekuéra opaite tembiapo vaípe umi tetã ojapova’ekuépe ha upévare Ñanderuete omosẽva’ekue umíape Israelguakuéra renondégui.

10Ñanderuete katu oñe’ẽ jepi hembiguái profetakuéra rupi, he’ívo:

11Manases, Juda retã ruvicha, ojapopa avei ko’ã tembiapo aña ha hembiapo ivaivéva gueteri umi Amorgua rembiapokuégui, umía ningo oikova’ekue Manases mboyve, ha’e omoangaipa avei Judayguápe ijára gua’u ra’ãnga rupi;

12upévare Ñanderuete, Israel Jára, péicha he’i: Péina ápe che agueru mba’evaiete Jerusalen ha Judaygua ári, omboapysa rasy hag̃uáicha opaite ohendúvape ko’ã mba’evaiete.

13Che aiporúta pe medída aiporu haguéicha Samáriape g̃uarã ha pe balánza che aiporuva’ekue Acab rogayguakuéra ndive; ha amopotĩta Jerusalénpe oñemopotĩ háicha peteĩ ña’ẽ ojekaruha, ojejohéi ha oñemokã porã rire katu oñembojere ovapývo.

14Ha nañangarekomo’ãvéi che retã rembyre rehe, ha amoĩta hese ija’e’ỹva popekuéra; ha ahejáta hese ija’e’ỹvakuéra tojapyhy ha toisãmbyhy ichupekuéra.

15Ojapógui hikuái ivaíva che resa renondépe, ha chembopochýgui hikuái ituvakuéra osẽha ára guive Egíptogui ko ára kóva peve.

16Ha ko’ã mba’e ári, Manases oñohẽ hetaiterei heko potĩva ruguy, omyenyhẽ meve Jerusalen peteĩ apýra ambue apýra peve; ko’ã hi’angaipa rupi omoangaipa avei Judayguakuérape, ha ojapove ohóvo mba’e ivaíva Ñanderuete resa renondépe.

17Ambue Manases rembiapokue, opaite mba’e ojapova’ekue, ha hi’angaipa ojapova’ekue, oĩmbáma umi Juda retã ruvichakuéra rembiapokue kuatiañe’ẽme.

18Ha omano rire Manases, oñeñotỹ ichupe hóga ka’avotýpe, Uza ka’avotykuépe; ha ita’ýra Amon oisãmbyhy hendagupe.

Amon oisãmbyhy

19Amon oñepyrũ oisãmbyhy oguereko ramo 22 áño, ha oisãmbyhy mokõi áño Jerusalénpe. Isy réra Mesulémet, Haruz rajy, peteĩ Jotbaygua.

20Ha’e ojapo avei ivaíva Ñanderuete resa renondépe, itúva Manases ojapo haguéicha.

21Ha’e oiko itúva rapekue rehe, ha oiko umi jára gua’u rembiguáirõ ituvakuéra omomba’eguasuva’ekuépe, ha oñembo’e ichupekuéra.

22Ha opoi Ñanderuete, ituvakuéra Járagui, ha ndoikovéi Ñanderuete rape rehe.

23Upémaramo hembiguaikuéra opu’ã hese ha ojuka ichupe hógape.

24Upéi hetãyguakuéra ojuka avei umi opu’ãva’ekuépe tetã ruvicha Amon rehe; ha hetãyguakuéra omoĩ tetã ruvicha rendaguépe ita’ýra Josíaspe.

25Ambue Amon rembiapokue ojehaipa Juda ruvichakuéra rembiapokue kuatiañe’ẽme.

26Ha oñeñotỹ ichupe ityvýpe, Uza ka’avotykuépe, ha oisãmbyhy hekovia ita’ýra Josías.