1Ore roagradece ndéve, Nde, ore Ruete, ndéve romomba’eguasu, ag̃uiete oĩ nde réra, ne rembiapo techapyrãva (milágro) omombe’u porã nde réra tuichaitéva.
2Ñanderuete ningo he’i: Chénte aiporavo upe ára aporombojovake hag̃ua hekoitépe.
3Oryryipa ramojepe yvy ha mayma oikóva guive ipype, Che voi ningo amopu’ã hatã ipyendakuérape. Selah
4Ha’éma voi umi oñembotuichávape: Ani peñembotavy, ha umi heko vaívape: Ani pejejapótei.
5Che ha’e umi oñembotuichávape: Ani peñembotuicha; ha umi oñemoakãrapu’ãvape che ha’e: Ani peiporu vai pende pu’aka, ani peñe’ẽvai peñemoakãrapu’ãháme.
6Pe ñembojovake ndoúi kuarahyresẽ guio ni kuarahyreikéguio, térã yvýguio.
7Ñanderuete voi ombojovake yvyariguakuérape, peteĩme Ha’e omomirĩ, ambuépe Ha’e ombotuicha.
8Peteĩ váso oĩma Ñanderuete pópe ha pe víno hyjúiva oñembojehe’apáma ambue mba’e reheve omonga’uve hag̃ua, ha Ha’e oñohẽta katuete ha ho’ukapava’erã ichupekuéra opa peve, ha Ha’e omboy’ukava’erã mayma heko vaívape oikóva guive ko yvy apére.
9Che katu tapiaite amombe’úta ha apurahéita amomba’eguasu hag̃ua Jacóbo Járape.
10Mayma heko vaíva ratĩ (pu’aka) Che amopẽva’erã, ha pe heko potĩva ratĩ katu che amopu’ãveva’erã.
Who We AreWhat We EelieveWhat We Do
2025 by iamachristian.org,Inc All rights reserved.
