Jeremías 38 - Biblia en Guaraní - ?anderuete ?e’? Por? 2015

Ojeity Jeremíaspe peteĩ pózope

1Ha ohendu Sefatías, Matan ra’y; Gedalías, Pasur ra’y; Jucal, Selemías ra’y; ha Pasur, Malquías ra’y, Jeremías he’i jave opaite hetãyguakuérape ko ñe’ẽ kóva:

2Péicha he’i Ñanderuete: Upe opytáva ko táva kóvape omanóta kyse pukúpe, ñembyahýi térã mba’asy iñasãiva rupi; ha umi ohasáva Caldeayguakuéra rendápe nomanomo’ãi, oikovéta uvei, ha hekove oñeme’ẽta ichupekuéra peteĩ jopói ramo.

3Péicha he’i Ñanderuete: Añetehápe ko táva kóva ho’áta Babilónia retã ruvicha soldadokuéra poguýpe, ha katuete ohapýta ko táva.

4Ha he’i umi mburuvicha tetã ruvichápe: Ko kuimba’e omanova’erãmante, ỹrõ omokangypáta ñande soldádo hembýva gueteri ko távape, ko’ã ñe’ẽ rupi omokangýta avei opaite tetãyguakuérape; ko kuimba’e ndohekái py’aguapy ko tetãme g̃uarã, mba’evaínte oheka ñandéve guarã.

5Ha tetã ruvicha Sedequías he’i: Péina ápe, ha’e oĩma pende pópe, che ndaikatúi añemoĩ penderehe.

6Upéramo ojapyhy hikuái Jeremíaspe ha oityuka ichupe, Malquías, tetã ruvicha ra’y, pózope, oĩva pe korapýpe. Ha omosã hikuái Jeremíaspe opoi hag̃ua ichupe upépe. Ha hypa pe pózo, tujúmante oĩ gueteri ipype, ha Jeremías ojasurupaite pe tujúpe.

7Ha Ébed-mélec, peteĩ Etiopiaygua, ha’e peteĩ oñekytĩ’o’itéva ha omba’apóva tetã ruvicha rembiguaiguasu ramo, ohendúvo omoĩ hague hikuái Jeremíaspe pe pózope,

8osẽ tetã ruvichaguasu rógagui oñe’ẽ hag̃ua Sedequíaspe oguapývahína Benjamin rokẽguasúpe ha he’i:

9Che jára, tetã ruvicha, umi kuimba’e ojapo vaiete ningo oitývo proféta Jeremíaspe pe pózope, upépe omanóta ha’e ñembyahýigui, ndaiporivéiguima pan ko tavapýpe.

10Upémaramo tetã ruvicha he’i Ébed-mélecpe, pe Etiopiayguápe: Egueraha nde poguýpe 30 kuimba’e ko’águi, ha eguenohẽuka proféta Jeremíaspe pe pózogui, omano mboyve.

11Ha Ébed-mélec ogueraha hendive umi kuimba’e, ha oho oike tetã ruvicha rógape oñeñongatuhápe aokuéra ha ojapyhy ao tuja sorokue, ha umía omboguejy peteĩ sã reheve Jeremías oĩháme.

12Ha pe Etiopiaygua, Ébed-mélec he’i Jeremíaspe: Emoĩ umi ao tuja sorokue nde jyva guýpe, pe sã guýpe. Ha Jeremías péicha ojapo.

13Ha sãme ohupi ha oguenohẽ hikuái Jeremíaspe pe pózogui, ha Jeremías opyta pe korapýpe.

Ñemiháme Sedequías omba’eporandu Jeremíaspe

14Upéi tetã ruvicha Sedequías omondo hembiguáipe Jeremías rendápe, ojegueru hag̃ua ichupe tetã ruvicha renondépe, Ñanderuete róga rokẽ mbohapyha ypýpe. Ha tetã ruvicha he’i Jeremíaspe: Aporandu porãse ndéve ha aníke reñomi chehegui mba’evete.

15Ha Jeremías he’i Sedequíaspe: Ha amyesakãmba ramo ndéve, katuete nde chejukaukáta; ha rohekombo’e ramo, nacherendumo’ãi.

16Ha tetã ruvicha Sedequías ome’ẽ iñe’ẽ ñemiháme Jeremíaspe, ha he’i ichupe: Ñanderuete rekovére ha ñande apohare rérape, ndorojukamo’ãi, ni noromoĩmo’ãi umi kuimba’e ndejukaséva pópe.

17Upémaramo Jeremías he’i Sedequíaspe: Péicha he’i Ñanderuete, Yvága atykuéra jára Israel Jára: Pya’ete reñemoĩ ramo Babilónia retã ruvicha remimbouguasu poguýpe, ne ánga oikovéta, ha ko táva kóva ndojehapymo’ãi, ha reikovéta nde ha nde rogayguakuéra.

18Ha nde nereñemoĩri ramo Babilónia retã ruvicha remimbouguasu poguýpe ko táva kóva ho’áta Caldeayguakuéra pópe, ha ohapýta hikuái, ha nde nerekañykuaamo’ãi ichuguikuéra.

19Ha tetã ruvicha Sedequías he’i Jeremíaspe: Che akyhyje umi Judayguakuéragui, ohasamava’ekue Caldeayguakuéra oĩháme, oñembosaráita cherehe añeme’ẽ ramo ipopekuéra.

20Ha Jeremías he’i: Nanemoĩmo’ãi hikuái ipópe. Ehendu ko’ág̃a Ñanderuete ñe’ẽ che ha’éva ndéve, ha oho porãmbáta ndéve ha reikovéta.

21Ha nde nereñemoĩséi ramo ipopekuéra, kóva ningo Ñanderuete ñe’ẽ Ha’e ohechaukámava chéve ndéve g̃uarã.

22Eikuaa porãke, umi kuña hembyva’ekue Juda retã ruvicha rógape oñeguenohẽmbáta Babilónia soldádo ruvicha renondépe; ha umi kuña voi oñembohorýta nderehe ha he’íta: Rejerovia ne irũnguéra rehe, ha’ekuéra katu nembotavy ojejopy vai jave, ha opoi ndehegui nde pykuéra oĩ jave tujúpe.

23Umi Caldeaygua oguenohẽmbáta ne rembirekokuéra ha nde ra’ykuéra, ha nerekañymo’ãi ipoguikuéra, re’áta uvei Babilónia retã ruvicha pópe, ha ko táva kóva ojehapypava’erã.

24Ha Sedequías he’i Jeremíaspe: Ani reikuaauka avavépe ko ñe’ẽ kóva ani hag̃ua remano.

25Ha umi mburuvicha oikuaa ramo che añe’ẽ hague nendive, ha ou ramo hikuái oporandu hag̃ua ndéve he’ívo: Emyesakã oréve mba’épa eréra’e tetã ruvichápe, aníke reñomi mba’eve orehegui, péicha ramo ndorojukamo’ãi; ha emombe’u avei oréve mba’épa tetã ruvicha he’íra’e ndéve.

26Eréta ichupekuéra: Ajerure tetã ruvichápe anivéma hag̃ua chemondo Jonatan rógape ani hag̃ua amano upépe.

27Uperire añetehápe umi mburuvicha ou Jeremías rendápe, ha oporandu ichupe hikuái; ha ha’e he’i ichupekuéra pe tetã ruvicha he’i haguéicha ichupe he’i hag̃ua. Upéramo oheja ichupe ha oho hikuái, ha avave ndoikuaái mba’eve pe ñemongeta ñemíme oje’eva’ekuégui.

28Upéicha Jeremías opyta pe korapy pegua cárcelpe Jerusalen ho’a peve Caldeayguakuéra pópe.