Romayguakuérape 1 - Biblia en Guaraní - ?anderuete ?e’? Por? 2015

1Che Páblo, Hesu Crísto rembijokuái, Ha’e cherenói ha cheporavova’ekue amoherakuã hag̃ua Ñanderuete salvacion rape.

2Ko Ñanderuete rape Ha’e oikuaaukava’ekue iprofetakuéra rupi oĩ Ñanderuete kuatia ñe’ẽme.

3Hesu Crísto, Ñanderuete Ra’y voi ningo, ha’e ko salvacion rape; Hesu ho’o rupi David ñemoñare,

4Ipytu Porã katu Ha’e Ñanderuete Ra’y voi. Pytu Porãmbáva pu’aka omoingove jevyva’ekue Hesúpe omanova’ekue apytégui.

5Hesu Crísto rupi rohupitýma Ñanderuete poriahuvereko (grácia) ha ore, apóstol rembiapo romoherakuã pe salvacion rape opaite tetãnguérape ojerovia hag̃ua hese ha iñe’ẽrendu hag̃ua ichupe.

6Umíva apytépe ningo peñehenóima avei peẽ Romayguakuéra peiko hag̃ua Hesu Crísto mba’etee ramo.

7Opaite peẽ peiméva guive Rómape Ñanderuete penderayhu ha pendeporavo pende reko porã hag̃ua. Ñandejára, Ñanderuete ha Ñandejára Hesu Crísto poriahuvereko ha ipy’aguapy toĩ penendive.

Páblo ohose avei Rómape

8 Agradece raẽ che Ruetépe, Hesu Crísto rupi, opavave penderehe, oñemombe’u haguére oparupiete pene rerakuã porã ha pejeroviaha hekópe Hesúre.

9Ñanderuete voi ningo che rechahare, amba’apoha ichupe g̃uarã che pytu porãme, amombe’u hag̃ua Hesu Crísto ha’eha pe salvacion rape, ha Ha’e añoite oikuaa mba’éichapa manterei chemandu’a penderehe opaite che ñembo’épe;

10meme árape ajerure avei che ñembo’épe Ñanderuetépe aha hag̃ua avei pene rendápe, Ha’e oipota ramo.

11Che pohechasete ambohasa hag̃ua Pytu Porãmbáva me’ẽmby peẽme, peẽ peñemombareteve hag̃ua pehóvo,

12ha ñañomoangapyhy hag̃ua oñondive pe jerovia jarekóva rupi.

13Che hermanokuéra ahayhúva ndaipotái ningo pepyta peikuaa’ỹre, che añeha’ãmbáma hague heta jevy poñandu hag̃ua, opáichavo ko’ág̃a peve máramo ndaikatúi, ahupity hag̃ua avei pende apytépe, che remiñotỹnguéra (frúto) ahupity haguéicha avei ambue tetãyguakuéra apytépe.

14Greciayguakuéra térã tetã ambueyguakuérape, iñarandúva térã iñarandu’ỹvape, amombe’uva’erã ko salvacion rape ichupekuéra adevégui;

15upévarehe che amyasãi avei ko salvacion rape Rómape.

Pe perdon

oñeme’ẽ jerovia rupi

16Che natĩri amombe’u hag̃ua ko salvacion rape, oĩgui ipype Ñanderuete pu’aka osalva hag̃ua opaite ojeroviávape guive Hesu Crísto rehe, Judayguakuérape raẽ, upéi katu avei opaite ambue tetãyguakuérape.

17Ñanderuete perdon oñeme’ẽhína tetãyguakuérape ojeroviávape g̃uarã añetehápe Hesu Crísto rehe, ojehai voi ningo Ñanderuete kuatiañe’ẽme: Upe oñemopotĩmava’ekue oikoveva’erã ojerovia haguére Hesu Crísto rehe, (Habacuc 2,4).

Ñanderuete ohechauka ipu’aka hembiapokue rupi

18Ñanderuete jehavira pohýi ouva’erã yvágagui opaite iñañáva ha omboykéva guivépe Ñanderuetépe ipy’apýgui, ha umi oñeha’ãmbávape ojoko hag̃ua pe añeteguáva.

19Heta mba’e ikatúva jaikuaa Ñanderuetégui Ha’e ohechaukáma ichupekuéra.

20Ñanderuete reko ha ipu’aka ojehecha’ỹva ojekuaa katu hembiapokue porã rupi voi, Ha’e ojapo guive ko yvy ha opaite mba’e oĩva guive ipype, upévare umi iñañáva ha omboykéva Ñanderuetépe ipy’apýgui ndojohumo’ãi peteĩ discúlpa (pe ñembojovake árape).

21Oikuaa ramojepe hikuái Ñanderuetépe, nomomba’eguasúi ni ndohechakuaái ichupe Ijaratee ramo, upévare oñehundi ipensamiénto heko pegua’ỹva rupi ha ipy’apy iñypytũmba mba’e výro rei reheve.

22Oikose ramojepe hikuái iñarandúva ramo, itarovaiterei hikuái.

23Omboyke Ñanderuete reko jajaipáva, omomba’eguasu hag̃ua hendaguépe kuimba’e rembiapokue, taha’e kuimba’e térã kuña ra’ãnga, taha’e mymba, guyra térã mbói ra’ãnga.

24Upévare Ñanderuete opoi ichuguikuéra oiko hag̃ua ipy’apy rembipota vai ha mba’e ky’a tie’ỹ poguýpe, oñemongy’ave hag̃ua ohóvo heteteépe.

25Ha’ekuéra omyengovia Ñanderuete añetegua, japúre; omomba’eguasu ha oservi hikuái Ñanderuete rembiapokue, omomba’eguasu rãngue Ijapoharépe, Ha’émante oñemomba’eguasuva’erã ára atyguasukuéra pukukuépe.

26Upévare Ñanderuete opoi ichuguikuéra ho’a hag̃ua ipy’apy rembipota ky’a vai poguýpe; ikuñakuéra jepe oiko rãngue kuimba’e ndive, oiko kuña kuña ndive,

27ha upéicha avei kuimba’ekuéra oheja kuña jeporu hekópe, haku hendy ojuehe; kuimba’e kuimba’e ndive ojapo heta mba’e ky’a, ha upévare ohupity Ñanderuete jehavira heteteépe hembiapo vai rupi.

28Ha’ekuéra opoi haguére Ñanderuetégui, Ñanderuete opoi avei ichuguikuéra, ha oñeme’ẽ hikuái ipy’apy rembipota ky’a vaípe, ojapo hag̃ua umi mba’e ojejapo’ỹva’erãva,

29upévare henyhẽ ningo hikuái avei opaichagua mba’e hekope’ỹvagui, takúgui, ha’enteségui, ñañágui, envídiagui, ha upéi oporojukasénte, oñorãirõsénte, odesconfiánte, ombotavysénte, ijurumy’ỹi,

30oñe’ẽvai rei hapicháre, oñemoĩ Ñanderuete rehe, ijuruguasu, ojererovu (ojejapo), hova mokõi, ojepy’amongeta mba’evaíva rehe naiñe’ẽrendúi ituvakuérape,

31naiñakã porãi, opyrũ iñe’ẽ rehe (naifiélri), ndoporohayhúi, ndoporoporiahuverekokuaái.

32Ha’ekuéra oikuaa porã Ñanderuete rembipota ha hembiapoukapykuéra, ha oikuaa avei umi ojapóva ko’ãichagua mba’evai ojejukava’erãha, upeichavérõ jepe ojapo hikuái ko’ã mba’evai ha ovy’a gueteri ohechávo hapichakuéra omoirũ ramo ichupekuéra heko vaikuérape.