1Ñanderuete yvága rembiguái ou Gilgálgui Bokímpe, ha he’i: Che poguenohẽ Egíptogui ha pomoinge ko yvýpe, yma ame’ẽ haguéicha che ñe’ẽ peẽme. Araka’eve ndaheja reimo’ãi che ñe’ẽ ame’ẽva’ekue peẽme.
2Che katu ha’eva’ekue peẽme: Ani peikótei Canaanguakuéra ndive jekupytýpe, peity uvei ikuave’ẽmby rendakuéra, peẽ katu nacheñe’ẽrendúi. Mba’érehepa pejapo péicha.
3Upévare Che ha’e avei peẽme: Namosẽmo’ãvéima Amorguakuéra pene renonderãgui, toiko uvei hikuái ñepysãnga ramo pene renonderãme, ha ijarakuéra oikóta peẽme g̃uarã ñuhã ramo.
4Ñanderuete yvága rembiguái he’i rire ko’ã ñe’ẽ Israel ñemoñarenguérape, ha’ekuéra hatã ojahe’o joa.
5Ha ombohéra hikuái pe tenda péva Boquim (he’iséva jahe’o renda), ha upépe oikuave’ẽ hikuái kuave’ẽmby Ñanderuetépe g̃uarã.
Josue omano6Josue omomaitei paha rire hetãyguakuérape, ha’ekuéra ohopa itríbu yvýpe.
7Ha Israelguakuéra omomba’eguasu Ñanderuetépe Josue ha umi karai anciáno oikove aja pukukue, ko’ãva oipytyvõ Josuépe oisãmbyhy hag̃ua Israelguakuérape ha ohechamava’ekue avei opaite Ñanderuete rembiapoguasueta Ha’e ojapomava’ekue Israelguakuéra rehe.
8Ha Ñanderuete rembiguái Josue, Nun ra’y, omano oguerekóvo 110 áño.
9Ha oñotỹ hikuái ichupe ijyvy Timnat-heréspe, Efrain cérrope, Gaas cérrogui nórte gotýo.
10Ha opaite Israelguakuéra uperõguare ha’e omano rire, ita’ýra ha itajyrakuéra oikóva hendaguépe hesarái Ñanderuetégui, ha naimandu’avéi Ñanderuete rembiapo rehe, Ha’e ojapomava’ekue ituvakuéra resa renondépe.
Israel opoi Ñanderuete rapégui ha mbojovakeharakuéra rembiapógui11Uperire Israel ñemoñarenguéra ojapo mba’e ivaietéva Ñanderuete resa renondépe omomba’eguasúvo umi Baálpe (ambue tetã jára gua’úpe).
12Opoi hikuái Ñanderuetégui, ituvakuéra Jára, oguenohẽva’ekue ichupekuéra Egípto retãgui, ha oho hikuái ambue jára rapykuéri, umi tetã ijerekuévo omomba’eguasúva avei; ha péva ombopochy Ñanderuetépe.
13Ha opoi rire hikuái Ñanderuetégui, omomba’eguasu Baal ha Astarótpe.
14Ha Ñanderuete ipochyeterei Israel rehe, ha omoĩ ichupekuéra mondahakuéra pópe ha umía ovende ichupekuéra, ha oheja avei ichupekuéra hesekuéra ija’e’ỹva pópe; ha Israelguakuéra ndaikatuvéima oñemoĩ hesekuéra ija’e’ỹva rehe.
15Mamo oikoha rupi, Ñanderuete po ojopy ichupekuéra mba’e pohýi rupi, Ha’e he’i haguéicha ichupekuéra, ha tuicha jepy’apy ohasa hikuái.
16Upéi Ñanderuete omopu’ã mbojovakehára osalva hag̃ua ichupekuéra umi mondaha poguýgui.
17Naiñe’ẽrendúi avei hikuái umi mbojovakehárape, oho uvei hikuái ambue jára rapykuéri, ha omomba’eguasu avei ichupekuéra, pya’e oñemboyke hikuái ituvakuéra Jára rapégui, umíva iñe’ẽrenduva’ekue Ñanderuetépe, ko’ãva katu nahanirivéi.
18Ha Ñanderuete omopu’ã vove Israelguakuérape mbojovakehára, ha ha’ekuéra oikove aja, Ñanderuete voi oĩhína ko’ãva ndive, ha osalva Israelguakuérape hesekuéra ija’e’ỹva pógui; Ñanderuete voi oiporiahuverekógui ichupekuéra ojejopy vai ha ojahe’ógui.
19Ha omanóvo pe mbojovakehára, ha’ekuéra opoi jevy Ñanderuetégui, ha oñemboheko vaive ituvakuéragui, omomba’eguasúvo ambue jarakuérape, ha oñesũ henondepekuéra; ha noñemboykéi hembiapo vaígui, ni heko vaígui.
20Ha Ñanderuete pochy hendy Israel rehe, ha he’i: Ko tetã kóva omboykégui che rembiapoukapy ame’ẽmava’ekue ituvakuérape, ha naiñe’ẽrenduvéi,
21Che avei namosẽmo’ãvéi henonderãgui ko’ã tetãnguéra Josue ohejava’ekue omanoha árape.
22Umíva rupi aha’ãta (aprováta) Israélpe, ohecha hag̃ua oñeha’ãmba ramo oiko porã hag̃ua Ituvaite rape rehe, ituvakuéra oiko haguéicha, térã nahániri.
23Ko’ã mba’e rupi Ñanderuete ndoipotái Israelguakuéra ombopoguy pya’e Canaanguakuérape ha upévagui Josue nombopoguypaiva’ekue.
Who We AreWhat We EelieveWhat We Do
2025 by iamachristian.org,Inc All rights reserved.
