Éxodo 36 - Biblia en Guaraní - ?anderuete ?e’? Por? 2015

1Upéicha Bezaleel, Aholiab ha maymaite kuimba’e ojeporavóvape Ñanderuete omoarandu ha ombokatupyry ojapo hag̃ua opaite tembiapo pe óga jojohuhápe g̃uarã ha ojapo hag̃ua opaite ambue mba’e Ñanderuete he’iva’ekue guive ichupekuéra.

Moises ojoko hetãyguakuéra me’ẽmby

2Upéicha Moises ohenói Bezaleel, Aholiab ha opaite ambue kuimba’e Ñanderuete omoarandu ha ombokatupyrývape ha mayma kuimba’e Ha’e oiporavova’ekuépe omba’apo hag̃ua pe tembiapoguasu pévape.

3Ha’ekuéra orecibi Moises pógui opaite Israel ñemoñarenguéra remime’ẽ ojejapo hag̃ua pe óga jojohuha. Ha Israel ñemoñarenguéra ko’ẽ ko’ẽ rehe oguerúnte hemime’ẽ ome’ẽseitereíva.

4Ha og̃uahẽmbávo umi mba’apohára omba’apo hag̃ua pe óga jojohuhápe,

5he’i Moiséspe: Tetãyguakuéra oguerúma hetaitereive mba’e oñekotevẽvagui pe óga jojohuhápe g̃uarã.

6Upéramo Moises he’iuka mayma Israelguakuérape: Kuimba’e ha kuñakuéra anive pegueruve pene me’ẽmby ko óga jojohuhápe g̃uarã. Péicha ojejoko tetãyguakuérape ani hag̃ua ogueruve hemime’ẽmbynguéra.

7Israelguakuéra ogueruve oñekotevẽgui, ha hembypáma.

Óga jojohuha apo

8Upéicha umi iñarandúva omba’apo pe tembiapoguasu pévape, ojapopa hag̃ua pe óga jojohuhápe g̃uarã: 10 aosãingo líno inimbo ojepokapyrévagui, aorã (páño) hovýva, pytãva, pytãũvagui; ha ombojegua hag̃ua querubin ra’ãnga iporãitévape,

9peteĩ aosãingo ipukuva’erã 12,25 métro, ha ipeva’erã 1,75 métro; opaite ko’ã aosãingo tuichakue peteĩcha.

10 Cínco aosãingo oñembojoaju ojuehe, ha péicha avei oñembojoaju ojuehe umi ambue 5 aosãingo.

11Ha oipojuráta ojuehe sã hovýpe pe aosãingo rembe’y pahápe; ha peichaite ojapóta avei ambue aosãingo rembe’y rehe oñembojoaju porã hag̃ua.

12 Cincuénta jepojura (lazáda) ojapo hikuái pe aosãingo tenondegua rembe’y rehe, ha 50 jepojura pe aosãingo rembe’y mokõiha pegua rehe; peteĩ jepojura opytáta ambue jepojura rovái.

13Ojapo avei 50 ty’ãi (gáncho) órogui, ipype ombojoaju hag̃ua peteĩ aosãingo ambue rehe, ha péicha omba’apo hikuái pe óga jojohuhápe.

14Ojapo avei aosãingokuéra kavara ragueguiguáva omo’ã hag̃ua pe aosãingo tenondegua; ojapo hikuái 11 aosãingo.

15Peteĩ aosãingo ipukú 13,12 métro ha ipe 1,75 métro, umi 11 aosãingo tuichakue peteĩcha.

16Ha ombojoaju ojuehe 5 aosãingo peteĩ atýpe ha 6 aosãingo ambue atýpe.

17Ojapo hikuái avei 50 jepojura pe aosãingo rembe’y rehe, oñembojoapy hag̃ua umi ambue 50 jepojura pe aosãingo mokõiha rembe’y rehe.

18Ojapo hikuái avei 50 ty’ãi (gáncho) bróncegui ombojoaju hag̃ua umi aosãingo ojuehe ha oiko hag̃ua ichugui peteĩ aosãingoguasuetéva (oñu’ã hag̃ua pe óga jojohuha ape).

19Ha ojapo hikuái ambue mo’ãha ovecha pirekuégui oñembopytãmbyrévagui, ha ambueve vaka ypegua pirekuégui opytapa hag̃ua ojo’ári.

20Ojejapo avei pe óga jojohuhápe g̃uarã umi tábla oñembo’ýva yvyra acáciagui.

21Peteĩteĩ tábla ipukuva’erã 4,37 métro ha ipeva’erã 65 centímetro.

22Peteĩteĩ tábla oguerekóta mokõi clávo yvyraguiguáva, ikatu hag̃uáicha oñembojoaju ojuehe; péicha ojapo hikuái mayma tábla pe ógape g̃uarã.

23Ojejapo 20 tábla pe óga jojohuha tápiare g̃uarã opytáva súrpe.

24Ha ojejapo avei 40 ipyenda plátagui opyta hag̃ua umi 20 tábla guýpe; mokõi pyenda peteĩ tábla guýpe, ha mokõi clávo yvyraguiguáva cáda táblape g̃uarã.

25Ha pe ambue óga tápia nórtepe g̃uarã ojejapo avei 20 tábla.

26 Cuarénta pyenda plataguiguáva reheve; mokõi pyenda peteĩteĩ tábla guýpe g̃uarã.

27Ha pe óga tápia kuarahyreike gotýo g̃uarã ojejapo 6 tábla.

28Pe óga hakuaha (esquína) mokõive yke gotýo g̃uarã oĩva kuarahyreike gotýo ojejapóta mokõi tábla,

29ha umía oñembojoaju iguýguio ha yvatéguio peteĩ argólla reheve; péicha ojejapo mokõive hakuaha rehe.

30Péicha ojeporu ko tápiare g̃uarã 8 tábla ha 16 ipyenda plataguiguáva, peteĩteĩ táblape g̃uarã mokõi pyenda.

31Ojapo avei umi alfajía yvyra acáciagui; 5 alfajía pe óga yke peteĩháme g̃uarã,

32ha 5 alfajía ambue óga yképe g̃uarã, ha 5 alfajía pe óga kupépe g̃uarã, pe kuarahyreike gotýo.

33Ha ombohasa hikuái umi alfajía umi tábla mbyte rupi peteĩ hakuahágui ambue hakuaha (apýra) peve.

34Ha’ekuéra ojaho’i umi tábla órope ha ojapo hese g̃uarã argollakuéra, ombohasa hag̃ua upérupi umi alfajía, ko’ãva ojaho’i avei órope.

35Ojejapo umi aosãingo hovýva, pytãva, pytãũva ha líno inimbo jepokapyrégui; ha ojapo hikuái hese querubin ra’ãnga iporãitereíva.

36Ha hese g̃uarã ojapo hikuái irundy horcon yvyra acáciagui ha oñu’ã órope; ha omboyku irundy ipyenda plátagui.

37Ojapo hikuái umi aosãingo pe óga jojohuha rokẽ rehe g̃uarã, aorã hovýva, pytãva, pytãũva ha líno inimbo ojepokapyrégui, pe tembiapo ikatupyrýva rembiapokue;

38ha 5 horcon iclavokuéra reheve; ha oñu’ã órope umi horcon arigua jeguaka ijalfajía reheve, umi 5 pyenda katu ojejapo bróncegui.