Isaías 24 - Biblia en Guaraní - ?anderuete ?e’? Por? 2015

Ñanderuete ombojovake yvy tuichakue

1Pema’ẽ porãke, Ñanderuete omonandi ha omboi ko yvy, sarambi ojapo ko yvy apére, ha omosarambipa umi ipype oikóvape.

2Umi ára umívape tetãyguakuéra ha pa’ikuéra oñondive ohasa asýta, upéicha ojehúta avei tembiguaikuéra ha ijárape, tembiguái kuña ha kuñakaraípe, umi ojoguáva ha umi ovendévape, umi oiporukáva ipirapire hapichápe ha umi oiporúva pirapire hapichágui.

3Ko yvy oñemonandiete ha oñemondapaitéta, Ñanderuete he’ígui ko’ã mba’e katuete ojehuva’erã avei.

4Oñembyasy ko yvy; ko yvy tuichakue ipirupa ha oñehundi, upévagui ohasa asyete avei umi karaiguasu oikóva guive ko yvy apére.

5Omongy’a hikuái ko yvy tuichakue, omboyke hikuái Ñanderuete rembiapoukapy, omokarẽ hikuái hekoite peguáva ha tapia opyrũ hikuái pe ñe’ẽ oñeme’ẽmava’ekue rehe ichupekuéra.

6Ko’ã mba’e ko’ãva rupi ou pe maldicion ombotapere hag̃ua ko yvy, ha umi ipype oikóva oñehundíta; ko’ã mba’e rupi oñehundi umi yvy apére oikóva, ha mbovymi yvyarigua hembýta.

7Pe víno oñehundi, pe parralty ipiru, ipyahẽ asy joa umi ipy’aroryva’ekue.

8Opa rei pe tambor pu ha opa rei avei umi ovy’áva ayvu, opa rei avei árpa pu rory asýva.

9Ndo’uvéi puraheipópe pe víno, ha iro voi ningo umi ho’úvape g̃uarã.

10Oñembotapere pe táva, opaite ogakuéra oñemboty, ani hag̃ua avave oike.

11Ojesapukaipa, ndaiporivéigui víno táva callekuérape, opaichagua vy’a opa rei, oñemosẽma vy’a yvy ape árigui.

12Pe táva itapere, hokẽguasu ho’a oñembyaipágui.

13Tetãnguérape ojehúta umi mba’e ojehu háicha olívo rakã ojetyvyro ramo, ha oñemono’õ rire pe parral’a ojehasa jevy oñembyaty hag̃ua hembymimíva.

14Ko’ã hembýva osapukái joáta kuarahyreike guive, opurahéita torypápe Ñanderuetépe g̃uarã, Ha’e ipu’akapa haguére.

15Upévare pemomba’eguasu Ñanderuetépe umi tetã kuarahyresẽme ha umi tetã yguasu rembe’ýpe peikóva guive, pehenói Ñanderuete, Israel Jára rérape.

16Y apýra guive rohendúta purahéi omomba’eguasúva Ñanderuetépe, Ha’e ombojovake haguére hekoitépe, che katu, ha’ékuri: Añehundíta, añehundíta, angái che, angái che, ko ojehútava chéve. Mondahakuéra omonda ojeporiahuvereko’ỹre, hembiapo vaieta rupi ombyai pe teko porã.

17Ñemondyiguasu, yvykua ha ñuhã oĩ opaite yvyariguápe g̃uarã ko yvy tuichakuépe.

18Ha ojehuva’erã, pe okañýva ñe’ẽ oporomongyhyjévagui ho’áta yvykuápe; ha pe osẽva pe yvykuágui ho’áta ñuhãme; pe ára rovetã yvate pegua ojepe’áta ha pe yvy guapyha rapo oryryipáta.

19Ko yvy osusũ ha ojekapaitéta, oñemongu’éta ko yvy ha ovavaitéta.

20Ko yvy ovaváta ku oka’úvaicha, kyháicha oñemongu’e yvyarigua rembiapo ivaieterei haguére, ho’apáta ha araka’eve nopu’ãmo’ãvéima.

21Ha ojehuva’erã upe ára upévape, Ñanderuete, yvágape oĩva, ombojovakéta yvága atykuéra ha umi tetã ruvichápe, ko yvy apére oñemoĩva’ekue hese.

22Ha oñembyaty jo’a jo’áta ichupekuéra, oñembyaty jo’a háicha cárcelpe oĩvape ha upépe oñembotýta ichupekuéra yvykua pypukúpe, ha ohasa rire heta ára ojehaviráta.

23Pe jasy ha pe kuarahy otĩta yvága atykuéra Járagui, ou vove Ha’e oiko hag̃ua tetã ruvichaguasu ramo Sion cérrope ha Jerusalénpe. Upérõ Ha’e oisãmbyhýta ha umi karai ancianokuéra ohecháta heko jajaipa.