1Tetã ruvicha Ezequías ohendupávo omondoro ijao ha oñemonde ao vosákuépe ha oike Ñanderuete rógape.
2Upérõ Ezequías omondo Eliaquímpe, mba’erepy ñangarekohára, ha Sebna, pe kuatiahaihára, ha pa’ikuéra apytégui umi itujamivévape ao vosákuépe oñemondéva, proféta Isaías, Amos ra’y rendápe.
3He’iuka hag̃ua ichupe Ezequías ñe’ẽ: Ko ára kóva ningo jepy’apy, jeja’o ha ñemotĩ ára; mitãkuéra onaceséma, isykuéra katu ikangypáma, ha ndaikatúi imemby.
4Ñanderuete, nde Jára ohendupánera’e opaite ñe’ẽ, Rabsaces he’imava’ekue, Asíria retã ruvicha he’iukava’ekue oñe’ẽvai hag̃ua Ñanderuete oikovéva rehe, ha iñe’ẽ rupi oñembohory asy Ñanderuetépe. Ñanderuete tohavira ichupe ha nde, Isaías, eñembo’e Judayguakuéra hembymíva rehehápe.
5Upéicha tetã ruvicha Ezequías rembiguaikuéra og̃uahẽ Isaías rendápe.
6Ha Isaías he’i ichupekuéra, péicha pejéta pende járape, péicha Ñanderuete he’i: Ani rekyhyjétei umi ñe’ẽ rehenduva’ekuégui, ni umi ñe’ẽvaiete he’iva’ekue Asíria retã ruvicha rembiguaikuéra cherehe.
7Eikuaa porãke, Che amoĩta ipype peteĩ pytu ha ohendúta peteĩ ñe’ẽguyguy oho jevy hag̃ua hetãme; ha og̃uahẽvo hetãme ho’áta kyse puku hãimbére.
8Ha Rabsaces oho jevývo, ojohu Asíria retã ruvichápe ojeityhína Líbna ári ojei haguére Laquísgui.
9Ha ohendu avei Tirhaca, Etiopía retã ruvicha, osẽ hague ojeity hag̃uáicha hi’ári. Upémaramo ojevy jey ha’e ha omondo ñe’ẽ rerahahára Ezequías rendápe he’ívo,
10péicha pejéta Ezequías, Juda retã ruvichápe: Aníke penembotavýtei pende Jára pende jeroviaha, ha ani peje: Jerusalén ndo’amo’ãi Asíria retã ruvicha pópe.
11Péina ápe nde rehendupa voi opaite mba’e Asíria retã ruvichakuéra ojapomava’ekue opaite tetãnguéra rehe, ohundipa voi, ha nde añoiténte piko rejesalváne.
12Oĩ nga’u piko peteĩ tetã jára oguenohẽkuaava’ekue hetãme che ypykuéra pógui. Ko’ã tetãnguéra ore rombopoguýma: Gozan, Haran, Résef ha Eden ñemoñarenguéra oĩva’ekue Telasárpe.
13Mamo piko oime Hamat retã ruvicha, Arpad retã ruvicha ha Sefarvaim táva ruvicha, Hena ha Iva retã ruvichakuéra.
14Ha Ezequías ojapyhy pe kuatiañe’ẽ umi ñe’ẽ reruhára pógui; ha omoñe’ẽmba rire ojupi Ñanderuete rógape ha oipyso pe kuatiañe’ẽ Ñanderuete renondépe.
15Ha Ezequías oñembo’e Ñanderuetépe, ha he’i: Israel Jára, reikóva querubinkuéra apytépe, Nde añoitéko ore Ruete yvy ape arigua tetãnguéra Jarateéva, nde voi rejapo yvagakuéra ha yvy.
16Ore Ruete emboyke nde apysa ha ehendu, ejesape’a ha ema’ẽ porã Senaquerib ñe’ẽ rehe, ha’e ombouva’ekue oñe’ẽvaiete hag̃ua nderehe.
17Añetehápe, ore Ruete, umi Asíria retã ruvicha ohundipáma tetãnguéra ha ijyvykuérape;
18ijarakuérape oitypa tatápe, umía ndaha’éi voígui jára añeteguáva, kuimba’e po rembiapokuénte, yvyra térã ita, ha upévagui Asiriaygua ohundikuaa avei.
19Ko’ág̃a, ore Ruete, ore Jára, orepe’a ipoguikuéra, ajerure ndéve, ha mayma yvy ape arigua toikuaa, nde añoitenteha ore Ruete, ore Jaratee.
20Upémaramo Isaías, Amos ra’y, he’iuka Ezequíaspe: Péicha he’i Ñanderuete, Israel Jára: Pe mba’e rejerureva’ekue chéve, Senaquerib, Asíria retã ruvicha rehe, ahendupákuri.
21Ko’ã ñe’ẽ ko’ãva Ñanderuete he’iuka ndéve: Pe kuñataĩ imarã’ỹva (Jerusalén) oñembohory Asiriayguakuérare, nde kupépe Jerusalén rajy oñakã mbovava nderehe.
22Mávarehe piko reñembohorýra’e ha mávarehe piko reñe’ẽvaietéra’e. Ha mávarehe piko remopu’ã ne ñe’ẽ, ha mávarehe piko remopu’ã nde resa, Israel Jára heko porãva rehe rejapo.
23Ne ñe’ẽ rerahahára rupi reñembohory Israel Jára rehe, nde erévo: Che ñorãirõ cárro atyguasu reheve ajupíkuri cérro ijyvatevehápe, oĩva Líbanope; ha upépe aikytĩ umi cédro ijyvatetéva ha umi cipres (yvyra ojoguáva pínope) iporãvéva, aity mombyryetevehápe, ika’aguy mbytépe.
24Che ajo’o hay’u hag̃ua, che py pytépe katu amokãmbáta Egípto ysyry.
25Nde piko ndereikuaái Che voi ambosako’ipa hague ko’ã mba’e, ymaiterei guive Che arekomava’ekue che akãme. Ha ko’ág̃a ae Che ajapoukáta nderupi heta sarambi, umi táva oñemombareteva’ekue tápia yvate reheve, ha rehundívo rembotaperepáta umívape.
26Umi oikóva ikangypa, okyhyje ha oñemondýi; ojogua umi ñu rupigua ñanáme, ka’avo kyrỹime, kapi’i heñóiva óga ariguápe, havirupa ha ipirupa otyarõ mboyve.
27Aikuaapa voi nde rekove, ne rembiapo ha nde ndepochyha cherehe.
28Nde reñemoĩ haguére cherehe ha reñembotuicha haguére avei, Che voi amoĩta peteĩ argólla ne tĩ rehe, ha amoĩta juru jokoha (fréno) nde jurúpe romondo jevy hag̃ua nde rapekuére reju hague rupi.
29Ha ndéve g̃uarã Ezequías ame’ẽta ko techaukaha: Ko áño kóvape pekarúta heñói reívagui, ha pe áño mokõihápe pekarúta heñói reívagui; ha pe áño mbohapyhápe peñemitỹta, ha pemono’õta, ha peñotỹta parralty ha pe’úta hi’akuégui.
30Ha umi hembýva, Judayguakuéra apytégui, oñembohapo jevýta ijyvy rehe, ha hi’áta yvate.
31Jerusalengua katuete hembýta Sion cérrope. Ñanderuete mborayhu ojapopáta ko’ã mba’e.
32Upévare péicha Ñanderuete he’i Asíria retã ruvicha rehe: Ha’e ndoikemo’ãi ko táva kóvape, hu’ykuéra ndoitymo’ãi ipype; isoldádo rete mo’ãha ndojehechamo’ãi ko táva renondépe, ha nomopu’ãmo’ãi yvy aty ohasa hag̃ua táva tápia ári.
33Pe tape ou hague rupi oho jevýta, ha ndoikemo’ãi ko táva kóvape, he’i pende Ruete.
34Che amo’ãta ko táva kóvape ha asalváta, che réra rehehápe ha che rembiguái David rayhupápe.
35Ha ojehu ningo pe pyharépe Ñanderuete yvága rembiguái osẽ ha ojuka Asiriaygua atyguasúgui 185.000 kuimba’épe, ha Jerusalengua opu’ãvo ambue pyhareve ohecha Asiriaygua re’õngue memeténte ojepyso joáva hikuái.
36Upémaramo Senaquerib, Asíria retã ruvicha, ojevy ha oho Nínivepe, ha upépe opyta.
37Ha ojehu ha’e oñembo’e jave Nisroc, ijára tupãópe, Adramélec ha Sarézer, ita’yrakuéra, ojuka ichupe kyse pukúpe ha okañy hikuái Ararat retãme. Ha ita’ýra Esarhadon oisãmbyhy hendaguépe.
Who We AreWhat We EelieveWhat We Do
2025 by iamachristian.org,Inc All rights reserved.
