APOCALIPSIS 17 - Guarani Bible with DC

Kuña iyaguasa pota vae

1Jayave jókuae chiu araɨgua reta chiu kopa güɨnoi vae reta güi metei ou jei cheve: “Eyu kuae pe. Aechaukata ndeve kërai oñejäauka jókuae kuña iyaguasa pota vae ɨ reta re oguapɨ oï vae.

3Jayave araɨgua chereraja Espíritu Santo imbaepuere pe ñuu kotɨ. Jare joko pe aecha metei kuña oguapɨ oï metei mbaemɨmba guasu pɨ̈ta vae chiu iñäka vae jare payandepo jäti vae re. Jare jókuae mbaemɨmba guasu re oyekuatía oï jeta tee jare jókuae tee reta rupi jei ikavimbae vae Tumpa kotɨ. Ap 13.1.

4Jare jókuae kuña jemimonde pɨ̈taü jare pɨ̈taasɨ, jare oñemopöra oro, ita ipöra yae vae reta pe; güɨnoi ipo pe metei kopa oro pegua, tɨnɨe oï mbae pɨ̈chɨi vae pe jare ikavimbae vae pe; Jer 51.7.

5jare jesɨva re oyekuatía metei tee yaikuaambae, jei körai: “BABILONIA GUASU. JAE KO IYAGUASA POTA VAE RETA ICHƗ JARE MBAE PƗ̈CHƗI ƗVƗ PEGUA.”

6Jare aecha kuña osavaɨpo oporogüɨrovia reta jare oyeyukauka omombeu Jesús re vae reta jugüɨ pe. Aecha yave chepɨakañɨ yae.

7Jayave araɨgua jei cheve: “¿Maera pa nepɨakañɨ? Tamombeu ndeve yaikuaambae vae kuña regua, mbaemɨmba guasu kuña ou jese vae regua, jókuae chiu iñäka jare payandepo jäti.

8Mbaemɨmba guasu reecha vae oikose, ërei mbaetɨ ma oiko. Oëta ɨvɨkua guasu güi,Dn 7.7; Ap 11.7. ërei ojo yeta kañɨtei pe. Jare ɨvɨ pe yogüɨreko vae reta oecha yave jókuae mbaemɨmba guasu oikose vae, ipɨakañɨ retata, jókuae jee mbaetɨ oyekuatía oï tembikuatía tekove opambae vaeSal 69.28; Ap 3.5; 13.8. pegua pe ɨvɨ oyeapo güire vae reta. Ipɨakañɨ retata oecha yave mbaemɨmba guasu oikose, mbaetɨ ma oiko, oiko yeta vae.

9Kuae pe oyeechata kia iyarakuaa vae: Jókuae chiu iñäka oyembojaanga chiu ɨvɨtu guasu kuña oguapɨ jese vae re,

10oyembojaanga chiu mburuvicha guasu reta re. Pandepo chugüi reta oa ma. Metei oimeño oiko, jare metei ndeiño ou. Jare jae ou yave, michi peguaño oikota.

11Jare jókuae mbaemɨmba guasu oikose ërei mbaetɨ ma oiko vae jae ko juría mburuvicha guasurä vae. Ërei jókuae chiu vae güiño oëta jare jae ojota vi kañɨtei pe.

12Jare jókuae payandepo jäti reecha vae oyembojaanga payandepo mburuvicha guasu reta re.Dn 7.24. Kuae payandepo reve ndeiño güɨnoi iporookuaía. Ërei güɨnoi retata mbaepuere yogüɨreko vaerä mburuvicha guasu retarä metei ora pegua jókuae mbaemɨmba guasu ndive.

13Opaete kuae payandepo mburuvicha guasu reta metei ramiño ko iyemongeta, jare omee retata mbaepuere jókuae mbaemɨmba guasu pe.

14Kuae reta oñerarota Vecha kuimbae taɨrusu vae ndive; ërei Vecha kuimbae taɨrusu vae omoamɨri retata. Echa Vecha kuimbae taɨrusu vae jae ko Imbaepuere yae ete mbaepuere güɨnoi vae reta güi vae jare mburuvicha guasu reta Juvicha guasu,Dt 10.17; Ap 19.16. jare jae ndive ñogüɨnoi vae, oñeenɨi vae reta, oyeparavogüe jare jupi vae reta.”

15Jei vi cheve: “Ɨ reta re reecha jókuae kuña iyaguasa pota vae oguapɨ oï vae, oyembojaanga ko tëta reta, jeta yae vae reta, tëtaguasu reta jare ñee ambuae mbuae vae reta re.

16Jare jókuae payandepo jäti reecha mɨmba guasu re vae omotareɨta jókuae kuña iyaguasa vae, omombota oeya inandi reve; jouta kuña isoo jare oapɨ tata pe;

17echa Tumpa oñono ipɨa reta pe oyapo reta vaerä jae jemimbota, omometei vaerä iyemongeta jare omeeta iporookuaía reta mbaemɨmba guasu pe, oyembopo regua Tumpa jei vae.

18Jare jókuae kuña reecha vae jae ko tëta guasu opaete ɨvɨ pegua mburuvicha guasu reta re mbaepuere güɨnoi vae.”