DANIEL 4 - Guarani Bible with DC

Nabucodonosor imbokere

1“Che Nabucodonosor, mburuvicha guasu opaete tëta re, tëtaguasu reta re, jare opaete ïru ñee pe imiari vae reta, ɨvɨ pe yogüɨreko vae reta re vae jae: Mbɨakatu toñemoïru peve.

2Jupi ko aikuaauka vaerä peve opaete mɨakañɨ reta Tumpa Tuichagüe yae ete vae oyapo cheve vae.

3¡Tuicha yae ko mɨakañɨ reta Tumpa oyapogüe, jare imbaepuere yae rupi oyapo! Iporookuaía opambae ko, jare imbaepuere oiko aveita jekuae avei pegua.

4Che Nabucodonosor, aiko pɨagüive chero kavi pe jare cheporookuaía oguata kavi yae.

5Ërei metei pɨ̈tu cherupa pe aï yave apaɨu, jare chemongɨɨye yae; chemboyemongeta jókuae chepaɨu jare chembopɨatɨtɨ yae.

6Jáeramo aekauka yogüeru vaerä cheróvai yarakuaa katu vae opaete Babilonia pegua reta, oikuaauka reta vaerä cheve mbae ko oipota jei chepaɨu vae.

7Jare yogüeru ichoropa vae reta, yasɨtata re oyemboe vae reta, Caldeaɨgua reta jare maratuta vae imombeúa reta, jare amombeu chepaɨu chupe reta, ërei ngatu mbaetɨ ipuere oikuaauka reta cheve mbae ko oipota jei vae.

8Ou regua oike cheve Daniel, jae ko jee Beltsasar, chetumpa reta jee rami; jese oime oï Tumpa Iyoambae iespíritu. Chemiari chepaɨu re chupe körai:

9Beltsasar, ichoropa vae reta juvicha, aikuaa oime ko nderé Tumpa Iyoambae iespíritu, jare mbaetɨ etei metei ave yaikuaambae vae oñemi ndegüi, eikuaauka cheve chepaɨu pe aecha vae jare mbae ko oipota jei vae.

10Kuaekuae ko jae aecha cherupa pe aï ramboeve vae:

Aecha ɨvɨ mbɨte pe metei ɨvɨra

ɨvate jare tuicha yae vae.

11Okuakuaa kuae ɨvɨra, jare tuicha yae;

jäka iyapɨte oupitɨ ara, jare oyekuaa mombɨrɨ opaete ɨvɨ jembeɨ kotɨ güi.

12Jäka ipöra yae jare ia jeta yae,

güɨnoi tembíu opaete vae peguarä.

Iküaraɨa igüɨ pe ñogüɨnoi mɨmba reta ñana rupigua,

jäka reta rupi oyemboaitɨ güɨra reta,

jare chugüi oikove opaete vae reta.

13Aecha chepaɨu pe, cherupa pe aï ramboeve ogüeyɨ ara güi metei araɨgua omaangareko vae,

14jare täta yae osapúkai reve jei körai:

Peitɨ kuae ɨvɨra, jare peyasɨa jäka reta,

opa peyasɨa sɨa jäka raɨ reta jare opa pemoai iagüe reta.

Toyogüɨraja mɨmba reta ñana rupigua igüɨ pe ñogüɨnoi vae

jare jäka re ñogüɨnoi vae güɨra reta.

15Ërei iyɨpɨgüe peeyagüe peñapɨti peeya jiero pe jare jiero iyu vae pe,

peeya ñana pɨte pe.

Tiñäkɨ ɨsápɨi pe,

jare mɨmba reta ndive toiko ñana pɨte rupi.

16Iyemongeta toyepoepɨ chugüi,

topɨta metei mɨmba rami,

toiko jökorai chiu año.

17Kuae yemongeta oë ikotɨ vae araɨgua omaangareko vae reta güi ko,

jókuae iyoambae reta güi,

opaete oikove vae reta oikuaa vaerä

Tuichagüe yae ete vae ko güɨnoi mbaepuere

kuimbae reta iporookuaía re,

echa jae omee kia nunga vae pe oipota omee yave,

oñono mburuvicharä mbaeä etei kuimbae reta ipɨte pe vae.

18Che, mburuvicha guasu Nabucodonosor, aecha kuae mbaɨu. Nde Beltsasar eikuaauka cheve mbae ko oipota jei vae, echa opaete cheporookuaía pe yarakuaa katu vae reta mbaetɨ ipuere oikuaauka cheve mbae ko oipota jei chepaɨu vae; ërei nde ndepuere ko, echa Tumpa Iyoambae iespíritu oï nderé.

19Jayave Daniel, Beltsasar pe ombojee reta vae, ipɨakañɨ yae opɨta metei ora seri rupi, jare yemongeta reta ou chupe vae ombopɨatɨtɨ yae. Jare mburuvicha guasu jei chupe: ‘Beltsasar agüɨye tandembopɨajopa kuae mbaɨu jare mbae ko oipota jei vae.’ Beltsasar jei: ‘¡Cheruvicha guasu, kuae repaɨu vae toiko nderovaicho reta kotɨ, jare mbae ko oipota jei vae, toyembopo ikavimbae oipota ndeve vae reta kotɨ!

20Jókuae ɨvɨra reecha vae, okuakuaa jare tuicha yae oyeapo vae, jare jäka ojo oya ara re vae, jare oyekuaa mombɨrɨ opaete ɨvɨ jembeɨ kotɨ güi vae,

21jäkagüe ipöra yae vae, jare ia jeta yae vae, güɨnoi tembíu opaete vae peguarä, igüɨ pe yogüɨreko mɨmba reta ñana rupigua, jare jäka re oyemboaitɨ güɨra reta,

22jókuae ɨvɨra reecha vae, nde etei ko mburuvicha guasu, rekuakuaa jare tuicha yae reyeapo, echa okuakuaa ndembaepuere jare ojo oya ara re, jare ndembaepuere ojo oväe opaete ɨvɨ jembeɨ kotɨ.

23Jare nde mburuvicha guasu reecha metei araɨgua omaangareko vae, ara güi ogüeyɨ vae, jare jei: Peyasɨa kuae ɨvɨra jare pemboai; ërei iyɨpɨgüe peeyagüe peñapɨti peeya jiero pe jare jiero iyu vae pe ñana pɨte pe; tiñäkɨ ɨsápɨi pe, jare mɨmba reta ndive toiko ñana pɨte rupi, toiko jökorai chiu año.

24Cheruvicha guasu, kuae jae oipota jei vae; Tuichagüe yae ete vae ko jei kuae oyeapo vaerä ndeve mburuvicha guasu:

25Ndemombo retata kuimbae reta ipɨte güi, jare reikota mɨmba reta ñana rupigua ndive, jare ñana kaa rupigua reuta guaka reta rami, jare ɨsápɨi pe neäkɨta; jare jökorai reikota chiu año, reikuaa regua Tuichagüe yae ete vae ko güɨnoi mbaepuere kuimbae reta iporookuaía re, jare jae omee mborookuaía kia nunga vae pe oipota omee yave.

26Jare mborookuai jei oyeeya vaerä jókuae ɨvɨra iyɨpɨgüe vae, oipota jei, kërai ndeporookuaía oñeñovatuñota ndeve, reikuaa jare rerovia regua Tumpa ko güɨnoi mbaepuere opaete re vae.

27Jáeramo nde mburuvicha guasu, eendu cheporomboarakuaa: Eyapo jupi vae, agüɨye mo ndeyoa, ikavimbae reta reyapo vae jekovia pe, eyapo mboroparareko oiporara ñogüɨnoi vae reta pe, jayave güɨramoi kuae ndepɨagüive reiko vae oyembopukuta ndeve.’ ”

28Opaete kuaekuae reta oyembopo mburuvicha guasu Nabucodonosor re:

29Metei año oasa ma yave, mburuvicha guasu oguata oiko jo Babilonia pegua rupi yave,

30jei: “¿Jaeä pa kuae Babilonia guasu che ayapo chembaepuere rupi vae? ¿Ayapoä pa ko mburuvicha reta jëtarä, jare cheporookuaía imboetea yae vaerä?”

31Mburuvicha guasu imiari vɨteri oï ramboeve, ou chupe metei ñee ara güi: “Ndeve jae mburuvicha guasu Nabucodonosor: Mborookuaía oñepɨ̈ro ma ndegüi;

32jare kuimbae reta ipɨte güi ndemombo retata, jare mɨmba reta ñana rupigua ndive reikota, jare guaka reta rami ndemongaru retata; jökorai chiu año reikota, reikuaa regua kërai Tuichagüe yae ete vae ko güɨnoi mbaepuere kuimbae reta iporookuaía re jare jae omee mborookuaía kia nunga vae pe oipota omee yave.”

33Jare joko pe voi oyembopo Nabucodonosor re ñee oendugüe, jare omombo reta kuimbae reta ipɨte güi; jou ñana oiko güeye reta rami, jete ñäkɨ oiko ɨsápɨi oagüe pe, okuakuaa regua jete jaa güɨraké jaa rami jare ipöape güɨra reta ipöape rami.

Nabucodonosor ikuera

34“Ërei ara reta oyepapa oï vae iyapɨ ma yave, che Nabucodonosor amae ara kotɨ, jare ou akuera ye vaerä; jayave amboete Tuichagüe yae ete vae, jare ambotuicha oikove avei vae körai:

‘Imbaepuere jare iporookuaía opambae vae.

35Opaete ɨvɨ pegua reta mbaeä etei ko.

Jae oyapo jemimbota ara pe jare ɨvɨ pegua reta pe.

Mbaetɨ kia ipuere oyopia imbaepuere

36Joko pe voi oñemee cheve akuera ye vaerä, jare mbaepuere anoi cheporookuaía re vae, jare yemboete tuicha vae, jare chetuicha yae vae ou ye cheve, jare cheɨvɨrigua mburuvicha reta jare chemboarakuaa vae reta yogüeru chereeka; jare aja ye mborookuaía pe, jare chetuicha yae ete tenonde yave aikose vae güi.

37Añave che Nabucodonosor, amboete jare ambotuicha Mburuvicha guasu ara pegua, echa opaete jembiapo reta añete vae ko, jare jemimbota reta jupi vae ko;Dt 32.4. jare jae ipuere omomichi ipɨayemboete oiko vae.”