1CheYa Tumpa, ndekotɨño che ayerure;
2cheRu Tumpa ndereño ayeko:
Agüɨye emaeño tañemomaraiuka.
¡Agüɨye cherovaicho reta topuka cheré!
3¡Añetete, ngaraa etei oñemomaraiuka nderé oyeko vae reta!
¡Ërei oñemomaraiukata oyembopɨapochɨ jupimbae reve ndekotɨ vae reta!
4CheYa Tumpa,
eechauka cheve nderemimbota reta;
chemboe nderemimbota re;
5chemboe jare chereroata añete vae rupi,
echa nde ko jae Tumpa chereepɨ vae.
¡Ndereño ko aäro opaete ara!
6CheYa Tumpa,
nemaendúa ndepɨakavi reta re jare ndeporoparareko reta re,
kuae reta opambae ko.
7Agüɨye nemaendúa chetaɨrusu yave cheyoa vae re,
ayembopɨapochɨ ndekotɨ vae re;
cheYa Tumpa, nemaendúa cheré,
ndeporoaɨu jare ndepɨakavi renoi rupi.
8YandeYa ko ipɨakavi vae jare jupi vae;
jáeramo jae jemimbota oechauka iyoa vae reta pe,
9jare güɨroata jemimbota rupi oñemomichi vae reta;
¡omboe jupi rupi mbaetɨ oyembotuicha vae!
10Opaete yandeYa jemimbota ko mboroparareko jare añete vae,
iporogüɨrökuavee päve jare iporookuai reta oñovatu jare oyapo vae pe.
11CheYa Tumpa, neɨ̈ro cheve cheyoa yae vae re,
nderee imboetea yae jeko pegua.
12Kuimbae oipoɨu ndegüi vae,
nde remboeta kërai oiko vaerä.
13Oiko kavita,
iñemuña reta güɨnoita iɨvɨ ae.
14YandeYa oï oipoɨu chugüi reta vae ndive,
chupe reta oechaukata iporogüɨrökuavee päve.
15Jekuaeño amaeta cheYa re,
echa jae cherenoeta ñuai güi.
16CheYa, cheparareko, emae cheré,
echa che aeño aï jare chepɨatɨtɨ.
17Chepɨatɨtɨ reta oñemoïru cheve,
cherenoe chugüi.
18Emae chepɨatɨtɨ aï vae re jare aiporara aï vae re,
neɨ̈ro cheve opaete cheyoa re.
19Emae cherovaicho reta oyembojeta cheve vae re,
chemotareɨasɨ yeyé ñogüɨnoi.
20¡Eyangareko cheré jare chereepɨ!
¡Agüɨye emaeño tañemomaraiuka,
echa ndereño ayeko!
21Jupi jare sɨmbi rupi aiko vae tachereepɨ,
echa ndereño ayerovia.
22¡CheRu Tumpa,
eepɨ Israel iñemuña reta opaete oiporara vae güi!
Who We AreWhat We EelieveWhat We Do
2025 by iamachristian.org,Inc All rights reserved.
