NÚMEROS 19 - Guarani Bible with DC

Ikɨa Tumpa jóvai vae reta oyetɨo vaerä

1YandeYa jei Moisés pe jare Aarón pe:

2“Kuae jae ko mborookuai yandeYa omee, jei reve: Ere Israel iñemuña reta pe, togüeru ndeve metei guaka pɨ̈ta vae, jete kavi yae vae, jare mbaetɨi yuvo oñeñono jese vae.

3Jare tomee sacerdote Eleazar pe, jare jae togüɨnoe teyupa güi ikatu pe, jare toñaseokɨ̈tiuka jóvai.

4Jare sacerdote Eleazar toupi ipoäka re tugüɨ, jare toñapiramo pɨpe chiu ye tupao guakapi pegua kotɨ.

5Jare topa toapɨuka guaka jae jovake; toapɨuka reta ipire, isoo, jugüɨ jare jepotigüe.

6Jaɨkue rupi sacerdote toipɨɨ ɨ̈vɨrare, ñana hisopo jare temimonderä pɨ̈ta vae, jare toitɨ tata pe, guaka ókai oïa pe;

7jaɨkue rupi sacerdote toputuka jemimonde jare toyoe vi jete ɨ pe, javoi toike teyupa pe; ërei tikɨa topɨta Tumpa jóvai pɨ̈tu regua.

8Jaeramiño vi jókuae kuimbae oapɨ guaka vae, toputuka jemimonde jare toyoe vi jete ɨ pe, ërei tikɨa topɨta Tumpa jóvai pɨ̈tu regua.

9Jare metei kuimbae ikɨambae Tumpa jóvai vae toupi guaka itanimbugüe jare togüɨraja teyupa güi ikatu pe, ikɨambaea pe. Israel iñemuña reta toñovatu jókuae tanimbu, oyapo vaerä ɨ yetɨo pegua. Kuae jae ko Tumpa iñɨ̈ro vaerä mbaeyoa re vae.Heb 9.13.

10Jare guaka itanimbugüe oupi vae toputuka jemimonde, ërei tikɨa topɨta Tumpa jóvai pɨ̈tu regua. Kuae mborookuai toiko jekuae avei pegua Israel iñemuña reta peguarä jare ketɨgua oiko jae reta ipɨte pe vae peguarä.

11Kia nunga vae oyavɨkɨ yave oipotagüe kia jëogüe, tikɨa topɨta Tumpa jóvai chiu ara.

12Mboapɨa ara pe jare chiúa ara pe toyetɨo jókuae ɨ yetɨo pegua pe, jare tikɨambae topɨta Tumpa jóvai; ërei mboapɨa ara pe jare chiúa ara pe mbaetɨ oyetɨo yave, tikɨa topɨta.

13Kia nunga vae oyavɨkɨ yave oipotagüe kia jëogüe, ërei mbaetɨ oyetɨo yave, tupao guakapi pegua yandeYa imbae ko omongɨa; jókuae nunga toyemombo ete kavi Israel iñemuña reta ipɨte güi; mbaetɨ ramo ɨ yetɨo pegua oñeapiramo jese, tikɨa topɨta Tumpa jóvai. Toiporara jeko ae re.

14Kia nunga vae omano yave pero guakapi pegua japɨpe, peyapo kuae mborookuai: Opaete joko pe oike vae jare ñogüɨnoi joko pe vae tikɨa topɨta Tumpa jóvai chiu ara.

15Oipotagüe mbaerɨru oyepea oï vae, ani oyeokenda kavimbae oï vae, tikɨa topɨta Tumpa jóvai.

16Jare oipotagüe oyavɨkɨ yave kia jëogüe ñana pe oï vae, kɨsepuku pe omano vae, ani omanoi vae, ani kia ikägüegüe, ani tɨvɨa, chiu ara tikɨa topɨta Tumpa jóvai.

17Jökorai ikɨa vae peguarä toipɨɨ reta guaka oyeapɨ Tumpa iñɨ̈ro vaerä mbaeyoa re vae itanimbugüe, jare toitɨkua reta ɨ ɨ̈aka pegua pe mbaerɨru pe.

18Javoi kuimbae ikɨambae oï vae toipɨɨ ñana hisopo, jare tomopöe jókuae ɨ pe, jare toñapiramo o guakapi pegua re, jare opaete mbaembae pɨpegua re, jare opaete joko pe ñogüɨnoi vae reta re, jare kia ikägüegüe oyavɨkɨ vae re, ani tëogüe ñana pe oï vae, kɨsepuku pe omano vae, ani omanoi vae, ani tɨvɨa re vae.

19Jókuae kuimbae ikɨambae oï vae toñapiramo, jókuae kuimbae ikɨa oï vae re mboapɨa ara pe jare chiúa ara pe; javoi chiúa ara pe oitɨo ma yave, jókuae ikɨa oiko vae toputuka jemimonde, jare jae etei toyeyoe vi ɨ pe; ërei tikɨa topɨta Tumpa jóvai pɨ̈tu regua.

20Jare ikɨa opɨta vae, mbaetɨ yave oyetɨo, jókuae nunga toyemombo ete kavi Israel iñemuña reta ipɨte güi, tupao guakapi pegua yandeYa imbae omongɨa jeko pegua; mbaetɨ oñeapiramo jese ɨ yetɨo pegua ramo; ikɨa ko Tumpa jóvai.

21Kuae mborookuai toiko jekuae avei pegua chupe reta. Jókuae japicha oñapiramo ɨ yetɨo pegua pe vae, toputuka vi jemimonde; jare ɨ yetɨo pegua oyavɨkɨ vae, tikɨa topɨta Tumpa jóvai pɨ̈tu regua.

22Jare opaete jókuae ikɨa vae oyavɨkɨgüe, tikɨa topɨta Tumpa jóvai. Jare kia nunga vae oyavɨkɨ yave metei ikɨa vae, tikɨa vi topɨta Tumpa jóvai pɨ̈tu regua.”