JUECES 15 - Guarani Bible with DC

1Oasa mbovɨ ara rupi, metei ara trigo oyepoo iara pe, Sansón ojo jembireko pɨri güɨraja chupe metei kavara kuimbae raɨ. Ojo oväe yave jei:

—Taike tamae cherembireko re o pe.

Ërei kuña tu mbaetɨ omaeño oike,

2jei chupe:

—Ayemongeta ko mbaetɨ ma reipota, jáeramo amee ndevɨa-ïru pe. Ërei ngatu oime ipɨkɨɨ maepöra yae chugüi vae; jókuae ereko tɨke jekovia pe.

3Ërei Sansón jei chupe:

—¡Añave mbaetɨ eteita filisteo reta chemboeko, ikavimbae ayapo chupe reta yave!

4Jayave ojo oipɨɨ tresciento aguara, jare oñapɨti metei vae juguai ïru juguai ndive, oñono reve jókuae mókoi vae juguai re mbae jendɨ vaerä;

5jaɨkue rupi omoendɨ tata, jare oyora aguara reta filisteo reta jemitɨ pɨte pe, jare oapɨ trigo oyemboatɨgüe, oyemboɨgüe, uva jare olivorupa.

6Filisteo reta omboɨpɨ oparandu kia ra jókuae oyapo vae, jare oikuaa reta Sansón ko oyapo, oyepɨ vaerä jembireko, tu omee tayɨ chugüi Sansón ichëi pe vae jeko pegua yave, yogüɨraja reta opa oapɨ kuña jare tu.

7Jayave Sansón jei:

—Kuae peyapo vae jeko pegua, ¡Tumpa jee re ngaraa cheapɨ ayepɨ regua peré!

8Jare oporepeña jese reta iyarasɨ yae reve opa regua ikägüe oakɨo kɨo oyuka. Jare ojo oiko ɨvɨkua oï ɨ̈vavira Etam pe vae pe.

Sansón omoamɨri filisteo reta Lehi pe

9Jayave filisteo reta yogüeru oyembojeyupa Judá pe, oñemoai reta Lehi kotɨ,

10jare kuimbae reta Judá pegua oparandu chupe reta:

—¿Maera pa ko peyu peporepeña oreré?

Jare jae reta jei:

—Royu ko roipɨɨ Sansón royapo vaerä chupe jae oyapo oreve rami.

11Kuae oendu yave, Judá pegua reta yogüɨraja tres mil kuimbae ɨvɨkua oï ɨ̈vavira Etam pe vae pe, jare jei reta Sansón pe:

—¿Mbaetɨ pa reikuaa filisteo reta güɨnoi ko mbaepuere oreré vae? ¿Maera pa oreñono kuae teko pe?

Sansón jei chupe reta:

—Jae reta oyapo cheve rami ko che ayapo vi chupe reta.

12Jayave jae reta jei chupe:

—Ore reta royu ko ropɨɨ romee filisteo reta ipo pe.

Sansón jei:

—Pere añetete cheve Tumpa jee re, mbaetɨta ra pe reta cheyuka.

13Jare jae reta jei chupe:

—Mbaetɨ, ngaraa royuka, jaeño orekɨ̈reɨ ropɨɨ jare romee filisteo reta ipo pe.

Jayave oipɨɨ jare oñapɨti mókoi tɨmasa ipɨau vae pe, jare güɨnoe reta oñemi oïa güi.

14Yogüeru oväe reta Lehi pe yave, filisteo reta oë chupe osapúkai reve oyerovia güi. Ërei yandeYa iespíritu ou jese, jare omondoo tɨmasa reta oyeokua pɨpe vae opa ókai rami;

15javoi oipɨɨ mburika jañɨkagüe ndei ave otini ete vae, pɨpe oyuka mil filisteo.

16Jaɨkue rupi jei:

“Metei mburika jañɨkagüe pe ayapo metei jare mókoi atɨ;

mburika jañɨkagüe pe ayuka mil kuimbae reta.”

17Opa imiari yave omombo ipo güi mburika jañɨkagüe, jare ombojee jókuae oporoyukaa Ramat-lehi.

18Jare Sansón oyaporai yae ma ɨuve ramo, oenɨi yandeYa jare jei chupe: “¿Remaeñota pa cheyuka ɨuve kuae itumpa-raanga pota vae reta ipɨte pe, remee güire aporomoamɨri?”

19Jayave Tumpa oipea ɨvɨkua Lehi pe oï vae; jare oë ɨ joko güi, Sansón jou jókuae ɨ, jare oyandu ipɨ̈rata ye. Jáeramo jókuae ɨesaɨ oï añave Lehi pe vae ombojee En-hacore.

20Sansón oiko Israel iñemuña reta juvicharä veinte año rupi, filisteo reta jókuae ara rupi güɨnoi mbaepuere jókuae ɨvɨ re yave.