GÁLATAS 1 - Guarani Bible with DC

Tamaraeme

1Che Pablo, temimondo (mbaetɨ kuimbae reta cheparavo ani chemondo, jaeño Jesucristo, jare yandeRu Tumpa omoingove ye Jesucristo omanogüe reta ipɨte güi vae),

2jare opaete yanderɨvɨ che ndive ñogüɨnoi vae reta roikuatía kuae tupapire opaete peporogüɨrovia vae reta Galacia pe peï vae pe.

3YandeRu Tumpa jare yandeYa Jesucristo ipɨakavi jare ipɨakatu toï pe ndive.

4YandeYa Jesucristo oñemee omano vaerä yandeyoa reta re,Mt 20.28; Mc 10.45; 1 Ti 2.6; Tit 2.14. yandeyora vaerä teko ikavimbae vae ɨvɨ pegua güi. Echa kuae ko jae yandeRu Tumpa jemimbota.

5YandeRu Tumpa toyemboeteuka jekuaekuae avei rupi. ¡Amén!

Mbaetɨ yé ïru ñee ikavi vae

6Chepɨakañɨ yae kërai ɨmambae yae peyembosɨrɨ Tumpa peparavo Cristo ipɨakavi rupi vae güi, perovia vaerä mboromboe ambuaeyee vae re.

7Ërei mbaetɨ ko ïru ñee ikavi vae. Jaeño oime amogüe pembojopa vae. Echa jae reta güɨrova ñee ikavi vae Cristo regua.

8Ërei oime yave kia oregüi ani metei araɨgua omombeu peve mboromboe ambuaeyee vae, romombeu ma peve vae güi, Tumpa toiporarauka chupe.

9Kuae roe ma tenonde peve, ërei añave tae ye peve: Oime yave kia oporomboe ambuaeyee, pemboresive ma vae güi, Tumpa toiporarauka chupe.

10Mbaetɨ etei aipota ɨvɨ pegua reta chembotuicha. Aipota Tumpaño1 Ts 2.4. chembotuicha vaerä. Mbaetɨ vi aipota ɨvɨ pegua reta ambopɨakatu vaerä, echa jökorai yave Cristo jembiokuaiä ma ko che.

Pablo iparavɨkɨ

11Peikuaa kuae re cherɨvɨ reta: Kuae ñee ikavi vae che amoërakua vae mbaetɨ ko kuimbae iyemongeta.

12Echa mbaetɨ amboresive ani aikuaa kia nunga kuimbae güi, jaeño Jesucristo oechauka cheve.

13Pe reta peikuaa ko aikose judío reta iporomboe pe vae. Echa ayapo yepi jeta yae ikavimbae vae oporogüɨrovia vae reta pe, jare aipota tëi opa amboi.Hch 8.3; 22.4-5; 26.9-11.

14Jare judío reta iporomboe re oasa ete ye cherëtaɨgua cheaveigua reta jeta vae güi. Echa cherägüɨro yae cheñemuñagüe reta jeko re.Hch 22.3.

15Ërei Tumpa cheñono tee iyeupeguarä chesɨ jɨe peve, jare cheparavo ipɨakavi jeko pegua. Jare jae oipota ma yave,

16oikuaauka cheve Taɨ,Hch 9.3-6; 22.6-10; 26.13-18. che amoërakua vaerä judiombae vae reta pe. Kuae oyeapo yave, mbaetɨ aparandu jese kia pe;

17mbaetɨ vi aja Jerusalén pe tenonde ma temimondo yogüɨreko chegüi vae reta pɨri. Ërei aja Arabia pe, jare joko güi ayu ye Damasco pe.

18Kuae jaɨkue rupi, mboapɨ año oasa ma yave, aja JerusalénHch 9.26-30. pe aikuaa vaerä Pedro, jare apɨta jae ndive quince ara.

19Ërei mbaetɨ aecha metei ave ïru temimondo reta, jaeño aecha Jacobo yandeYa tɨvɨ.

20Mase, kuae aikuatía peve vae añete ko. Tumpa rovake añete ko.

21Kuae jaɨkue rupi aja ɨvɨ Siria jare Cilicia pe;

22ërei Cristo re oporogüɨrovia vae reta Judea pegua mbaetɨ chekuaa reta.

23Jaeño oendu jei reta vae: “Jókuae kuimbae ikavimbae vae oyapo yepi yandeve vae, añave omoërakua mborogüɨrovia tenonde yave oipota tëi opa omboai vae.”

24Jáeramo omboete reta Tumpa cheré.