1Moisés imiari Israel iñemuña reta itenondegua reta pe:
“YandeYa jei körai:
2Kia nunga vae oyapo yave ñererökuavee yandeYa pe, ani jee re oñererökuavee mbae oyapo vaerä yave, tombopo iñee, toyapo opaete jeigüe.
3Ërei metei kuña taɨrusu vae oyapo yave ñererökuavee yandeYa pe, oiko vɨteri tu ipo pe yave,
4jare tu oikuaa jókuae ñererökuavee oyapo vae yave, mbaetɨ mbae jei chupe yave, tombopo iñee, toyapo opaete oñererökuavee vae.
5Ërei tu oyopia chugüi yave, jókuae ñererökuavee oyapo tëi vae mbaetɨta ombopo; yandeYa iñɨ̈rota chupe, echa tu oyopia chugüi.
6Ërei metei kuña taɨrusu vae oime reve imenda ïrurä vae oyaporai voi yave ñererökuavee yandeYa pe ani jei yave ñererökuavee yandeYa pe; javoi omenda yave,
7ime oikuaa yave jókuae oyapogüe, ërei mbaetɨ mbae jei chupe yave, tombopo iñee, toyapo opaete oñererökuavee vae.
8Ërei ime oyopia chugüi yave, jókuae oyaporai voi ñererökuavee vae, mbaetɨta ombopo; yandeYa iñɨ̈rota chupe.
9Ërei imemano vae ani ime omombo vae oyapo yave ñererökuavee yandeYa pe, tombopo iñee.
10Metei kuña omenda vae oyapo ñererökuavee yandeYa pe ime jo pe yave, Tumpa jee re oñererökuavee mbae oyapo vaerä yave,
11ërei ime oikuaa reve mbaetɨ mbae jei chupe yave, tombopo iñee, toyapo opaete oñererökuavee vae.
12Ërei ime oyopia chugüi yave, mbaetɨta ombopo; echa ime omboai, jare yandeYa iñɨ̈rota chupe.
13Opaete ñererökuavee ani Tumpa jee re oñererökuavee mbae oyapo vaerä vae, ime ipuere omoañetete ani omboai.
14Ërei ime mbaetɨ mbae jei chupe yave, omaeño ara reta oasa yave jaema ko omoañetete jókuae ñererökuavee oyapo vaerä vae; echa mbaetɨ mbae jei chupe oendu rupive.
15Jare mbovɨ ara ma oendu güire oyopia chugüi yave, jae toiporara jembireko mbaetɨ ombopo oñererökuavee oyapo vaerä vae re.”
16Kuae ko jae mborookuai reta yandeYa oyókuai Moisés vae, kuimbae jare jembireko regua, jare kuimbae jare tayɨ regua, taɨrusu yave tu ipo pe vɨteri oiko yave regua.
Who We AreWhat We EelieveWhat We Do
2025 by iamachristian.org,Inc All rights reserved.
