ÉXODO 38 - Guarani Bible with DC

Oyeapo mɨmba oyeyuka oyeapɨ jese vae jiero iyu vae pegua(Ex 27.1-8)

1Bezaleel oyapo vi ɨvɨra käti pegua mɨmba oyeyukagüe opaetei oyeapɨ jese vae, ipɨgüe güɨnoi mókoi metro veinticinco centímetro päve irundɨ reve iyɨke, jare ɨvategüe güɨnoi metei metro veinticinco centímetro.

2Jare irundɨ ekina ñavo re oyapo chupe guakarätiecha vae, kuae reta metei güiño oyeapo mɨmba oyeyuka oyeapɨ jese vae ndive, jare oñova jiero iyu vae pe.

3Oyapo vi opaete mɨmba oyeyuka oyeapɨ jese vae pegua tembiporu reta jiero iyu vae pegua katuai, tanimbu jɨru, sɨpe, tasa guasu, tätapɨi imomboa jare tätapɨi jɨru.

4Jare oyapo mɨmba oyeyuka oyeapɨ jese vae japɨpe pegua güɨrapembɨecha vae jiero iyu vae pegua, jare oñono mɨmba oyeyuka oyeapɨ jese vae japɨpe ikúa pe.

5Oyapo vi chupe irundɨ argolla, jare oñono jókuae güɨrapembɨecha vae irundɨ iekina ñavo re.

6Oñopa vi ɨvɨra käti ɨvɨra oyepɨasa vae reta, mɨmba oyeyuka oyeapɨ jese vae reguarä, jare oñova jiero iyu vae pe.

7Jare ɨvɨra oyepɨasa vae reta oësɨvo argolla reta rupi, mɨmba oyeyuka oyeapɨ jese vae iyɨke yɨke regua rupi, pɨpe oyereraja vaerä. Jókuae mɨmba oyeyuka oyeapɨ jese vae oasavi oyapo, jare ɨvɨra pegua.

Ɨrɨru jiero iyu vae pegua

8Kuña reta iepeo tupao guakapi pegua pe oï vae güi oyapo vi ɨrɨru, jare iguapɨka jiero iyu vae pegua.Oyeapo tupao guakapi pegua joka(Ex 27.9-19)

9Bezaleel oikëse vi tupao guakapi pegua jokarä. Arayevɨ kotɨ güɨnoi cuarenta y cinco metro asoya pukugüe lino oñepövagüe pegua.

10Veinte poste, jare veinte iguapɨka jiero iyu vae pegua, jare poste itɨ̈ai jare iyapɨte regua korepoti pegua.

11Ɨvɨtuguasu kotɨgua oka güɨnoi cuarenta y cinco metro asoya pukugüe, veinte poste jare veinte iguapɨka jiero iyu vae pegua, poste itɨ̈ai reta jare iyapɨte regua korepoti pegua.

12Jare kuaraɨ oikea kotɨgua oka güɨnoi veintidó metro y medio asoya pukugüe, payandepo poste jare payandepo vi iguapɨka, jare poste itɨ̈ai reta jare iyapɨte regua korepoti pegua.

13Jare kuaraɨ oëa kotɨgua oka güɨnoi veintidó metro y medio asoya pukugüe.

14Jare öke iyɨke kotɨgua asoya güɨnoi chiu metro pukugüe, mboapɨ poste jare mboapɨ iguapɨka;

15jare öke jovaicho kotɨgua asoya güɨnoi mboapɨ poste jare mboapɨ iguapɨka.

16Opaete asoya reta oka re oyere vae lino oñepövagüe pegua ko.

17Poste reta iguapɨka jiero iyu vae pegua ko, jare itɨ̈ai reta jare iyapɨte regua korepoti pegua. Opaete poste reta iyapɨte regua korepoti pegua katuai ko.

18Asoya oka jöke reguarä oyeapo vae, jae ko ipoki ombaapo vae jembiapo, vecharaagüe inimbo jovɨ vae pegua, pɨ̈taü vae, pɨ̈taasɨ vae jare lino oñepövagüe pegua, güɨnoi juri metro pukugüe jare mókoi metro veinticinco centímetro ɨvategüe, asoya reta oka re oyere vae rami.

19Irundɨ poste, irundɨ iguapɨka ndive jiero iyu vae pegua, jare itɨ̈ai reta, jare tɨ̈ai oñova vae korepoti pegua jare iyapɨte omopöra vae korepoti pegua vi.

20Opaete etaka reta, tupao guakapi pegua, jare oka ikësea regua reta jiero iyu vae pegua.

Mbaembae oyeporu vae

21Kuae ko jae mbaembae tupao guakapi pegua oyeapo yave oyeporu vae, tupao guakapi pegua yemomaendúa pegua, Moisés iporookuai rupi oyeapo vae reta, levita reta oyapo vae, Itamar, sacerdote Aarón taɨ jei vae rupi oyeapogüe.

22Jare Bezaleel, Uri taɨ, Ur jɨmɨmino, Judá iñemuña pegua oyapo opaete mbaembae reta, yandeYa oyókuai Moisés vae.

23Jare omborɨ Aholiab, Ahisamac taɨ, Dan iñemuña pegua, jiero pegua mbaravɨkɨ oikatu oyapo vae, mbae oikatu ojäa kavi oyapo vae, ipoki ombaapo vecharaagüe inimbo jovɨ vae pe, pɨ̈taü vae pe, pɨ̈taasɨ vae jare lino oyeambae pegua pe.

24Opaete mbota oro oyeporu mbaravɨkɨ pe tupao guakapi pegua peguarä vae, jae ko noveciento sesenta y cinco kilo jare treinta gramo, o mbaemboetea pe korepoti oñejäa rami.

25Jare Israel iñemuña reta oyepapa yave korepoti oyemboatɨgüe, jae ko tres mil tresciento diecinueve kilo jare quiniento veinticinco gramo, o mbaemboetea pe korepoti oñejäa rami.

26Jare metei ñavo omee reta cinco gramo korepoti,Mt 17.24. o mbaemboetea pe korepoti oñejäa rami; opaete oyepapa vae reta veinte año güi kutɨ, jae ko seisciento tres mil quiniento cincuenta.Ex 30.11-16.

27Oime vi tres mil tresciento kilo korepoti oyeapo vaerä okɨta reta iguapɨka, tupao guakapi pegua peguarä jare asoya o imboyaoa oï jese vae iguapɨkarä. Opaete reve cien guapɨka; guapɨka ñavo re oyeporu treinta y tres kilo korepoti.

28Jare jókuae korepoti tres mil tresciento diecinueve kilo vae güi oyeapo poste reta itɨ̈ai jare iyapɨte regua.

29Mbota jiero iyu vae oñemee vae, jae ko dos mil tresciento treinta y seis kilo jare cuatrociento gramo,

30kuae reta güi oyeapo tupao guakapi pegua jöke iguapɨka reta, jare mɨmba oyeyuka oyeapɨ jese vae jiero iyu vae pegua, jare japɨpe pegua güɨrapembɨecha vae jiero iyu vae pegua, jare opaete tembiporu mɨmba oyeyuka oyeapɨ jese vae pegua,

31jökorai vi oyeapo poste reta iguapɨka jare etaka reta oka ikësea regua, jare oka jöke iguapɨka reta, jare opaete tupao guakapi pegua ietaka reta.