JEREMÍAS 35 - Guarani Bible with DC

Jeremías jare Recab iñemuña reta

1Joacim,2 R 23.36—24.6; 2 Cr 36.5-7. Josías taɨ oiko yave mburuvicha guasurä Judá pe, yandeYa jei cheve körai:

2“Ekua Recab iñemuña reta jëta pe jare nemiari jae reta ndive. Eroike reta yandeYa itupao pe metei cuarto pe jare emee tou reta vino.”

3Che, Jeremías, aja aeka Jaazanías (jae ko ïru Jeremías taɨ, Habasinías jɨmɨmino) tɨkeɨ reta jare taɨ reta, jare opaete jëtara Recab iñemuña reta,

4jare araja reta tupao pe, Hanán jemimboe reta icuarto pe, jae ko Igdalías taɨ, jae ko metei Tumpa jembiokuai. Jae ko mburuvicha reta icuarto iyɨpɨ pe; Maasías, Salum taɨ tupao jöke iyangarekoa icuarto iárambo.

5Añono Recab iñemuña reta jóvai tasa guasu jare kopa tɨnɨe vino pe, jare jae chupe reta: “Peu vino.”

6Jae reta jei: “Ore reta mbaetɨ ko rou vino, echa oreñemuñagüe Jonadab, Recab2 R 10.15; 1 Cr 2.55. taɨ, oyopia oregüi jare oreñemuña reta güi agüɨye etei vaerä rou vino.

7Oyopia vi oregüi royapo vaerä orerorä, romaetɨ vaerä kó pe jare rogüɨnoi vaerä uvarupa ani ɨvɨ yepe. Oreokuai roiko vaerä o guakapi pegua peño, roiko puku vaerä kuae ɨvɨ pe, ketɨgua rami roiko pɨpe vae pe.

8Jare ore reta royapo oreñemuñagüe Jonadab, Recab taɨ jei vae, mbaetɨ etei rou vino, ore jare orerembireko reta, oreraɨ reta jare orerayɨ reta,

9mbaetɨ vi romopüa orerorä, pɨpe roiko vaerä, uvarupa ave mbaetɨ rogüɨnoi ani ɨvɨ romaetɨ vaerä.

10Roiko o guakapi pegua rupi, royapo opaete oreñemuñagüe Jonadab oreokuai vae.

11Ërei Nabucodonosor mburuvicha guasu Babilonia pegua oporepeña kuae tëtaguasu re yave, royu kuae Jerusalén pe, rotekuarai vaerä sundaro Caldeaɨgua reta jare Siriaɨgua reta güi; jáeramo ko roiko Jerusalén pe.”

12Jayave yandeYa jei cheve:

13“Che, ndeYa Imbaepuere yae ete vae Israel iTumpa, romondo rere vaerä Judá pegua reta pe jare Jerusalén pe yogüɨreko vae reta pe: ‘Peyemboe jese reta, peyapo vaerä cheporookuai’, jei yandeYa.

14Jonadab, Recab taɨ iñemuña reta, oyapo iñemuñagüe oyókuai vae, agüɨye vaerä jou reta vino, jare mbaetɨi jou reta añave regua, echa oyapo reta iñemuñagüe oyókuai vae. Che poyókuai avei iyɨpɨ güive, ërei mbaetɨ peyapo che jae vae.

15Ambou avei peve cherembiokuai ñeemombeúa reta, jei vaerä peve: Peeya pereko reta ikavimbae jare pɨ̈chɨi yae peyapo vae. Agüɨye pemboete tumpa-raanga reta, agüɨye peyeokuai chupe reta, jare jökorai peiko avei vaerä ɨvɨ amee peve jare peñemuñagüe reta pe vae pe. Ërei ngatu pe reta mbaetɨ peipota peendu jare peyapo che jae vae.

16Jonadab, Recab taɨ iñemuña reta oyapo iñemuñagüe jeigüe vae; ërei ngatu pe tëta Israel mbaetɨ peipota peyapo che jae vae.

17Jáeramo che, peYa Imbaepuere yae ete vae Israel iTumpa, jae: Aruta Judá re jare Jerusalén pegua reta re, susere yavaetegüe amoërakua chupe reta vae; echa pe reta mbaetɨ peyapo che jae vae: ‘Poenɨi tëi, jare mbaetɨ pemboyevɨ cheve ñee.’ ”

18Jare Jeremías jei Recab iñemuña reta pe: “YandeYa Imbaepuere yae ete vae Israel iTumpa jei: ‘Pe reta peyapo ma peñemuñagüe Jonadab peokuai vae, jare opaete pemboegüe rupi peiko.

19Jáeramo che, peYa Imbaepuere yae ete vae Israel iTumpa jae, ngaraa oata Jonadab, Recab taɨ iñemuña reta güi oyeokuai avei vaerä cheve.’ ”