ECLESIÁSTICO 27 - Guarani Bible with DC

1Jeta ko korepoti oipota güɨnoi güi iyoa vae,

jare kia oipota oikokatu vae oyemboesaä ko.

2Ita oyekagüe rupi ko oyeatɨka ɨvɨra oyemboakuagüe reta;

jökorai ko oñemoinge mbaeyoa mbae oyeguagüe ndive jare mbae oñemee vae ndive.

3Metei vae mbaetɨ täta oï Tumpa kotɨ yave,

järembae oñemokañɨteita jo.

4Ürupe ñamotumo yave, jatɨgüeño ko opɨtata;

jare metei kuimbae yaendu osɨi yave, yaikuaata ko imbaeyavɨ reta.

5Mbaerɨru reta tuyuapo pegua ñañonota yaecha horno pe;

jaema kuimbae ñajäata ko yoaka pe.

6Ɨvɨra iagüe ko omboyekuaa metei ɨvɨra oñeotɨ kavi ko vae;

jökorai vi ko, oyekuaa kuimbae osɨi yave jeko.

7Agüɨye kia embotuicha ndei reendu osɨi mbove;

jökorai ko ñajäa kia.

8Yemboete reeka yave, reväeta ko,

jare ndemboaruandata ñeapevaka ikavigüe rami.

9Güɨra reta oyomboatɨ iñeïru vae reta ndive;

jare añetegüe oikota ko kia oyemboe jese vae re.

10Yaguapope okätɨro opoko vaerä jembia re

jare mbaeyoa kia kuimbae oyapo vae reta re.

11Iporoparareko vae reta jaeñoi ko iyarakuaa reve imiari,

ërei iyarakuaambae oyemboambuaeta yasɨ rami.

12Iyarakuaambae ndive rei yave, ejäa kavi ndeyeupe ndeara,

ërei yarakuaa vae ndive rei yave, ndepuere ɨma reiko.

13Iyarakuaambae reta iñee oporomboarasɨ ko,

jare ipuka mbaeyoa pe oyekou güi ko.

14Järea rea reendu jei mbae Tumpa jee re yave

opaecha ndea omopüa;

jare oñoraro reta yave, reyapete ndeapɨsa.

15Ipɨayemboete vae reta oñeraro yave, oimeta ko tëogüe;

¡yavaete ko! ¡Yaendu yae jei mbae ikavimbae oyoupe yave!

Mbae oyemombeumbae vaerä vae jökoraita ko

16Mbaetɨ iyuru oyopia vae re ngaraa kia güɨrovia katu;

jare ngaraa oväe metei äve ichëirä.

17Eaɨu nechëi jare agüɨye embotavɨ;

nemiari avei jae imiari ndeve vae re yave,

agüɨye ye mo eeka.

18Yavɨa oyoe vae yamboai yave,

yaporoyuka vae rami ete ko.

19Metei güɨra ojoyepe yandepo güi rami ko;

ojo ko ndepo güi nechëi, ngaraa ye ma ko reväe.

20Agüɨye eeka, oime matɨ yae ma oï;

guasu metei ñuai güi oasayepe vae rami ko.

21Metei yembopere yandepuere yayokua,

metei yekura yandepuere ñaneɨ̈ro oyoupe,

ërei kia ñavo mbaetɨ oikuaku mbae oyemboyekuaambae vae,

mbaetɨ ma ko mbae re oäro vaerä.

Añetembae vae

22Kia jesa omosapɨmi vae, oime mbae jaekavimbae oyapo;

ërei kia oikuaa ma vae, ngaraa oya jese.

23Nderóvai ndereroa roa yoaɨu pe

jare oyepopete opaete reregüe re,

ërei ndekupe kotɨ ambuaeyee ma oyeendu

jare neñee ae pe ndepɨaka ye.

24Jeta mbae aröɨro, ërei metei äve mbaetɨ jae rami vae,

jare Tumpa güɨröɨro vi.

25Kia ñavo ara kotɨ omombo ita vae, jae iñäka reiko oata,

jare kia ñavo oporombopere tavɨ rupi vae, jaeñoi ko vi oyembopere.

26Kia ñavo oyoo metei ɨvɨkua vae oata ko pɨpe

jare kia ñavo oñono metei ñuai vae opɨtata ko oyepɨ pɨpe.

27Kia ñavo ikavimbae oyapo vae, jókuae ko oata iárambo,

jaema oikuaa potaä ko ketɨ güi ko ou vae.

28Oyembotuicha vae oporoyóyai jare oporokura ko,

ërei tembiporara, yaguapope rami ko, okätɨro jese.

29Kia ñavo jeko kavi vae okañɨtei vae re oyerovia vae oata ñuai pe,

jare oiporarata ndei omano mbove.

Neɨ̈ro jare iñɨ̈rota vi ndeve vae

30Mbochɨ jare ñomotareɨ jae ko mbae ikavimbae vae,

ërei iyoa vae güi osɨrɨä etei ko.