JUECES 4 - Guarani Bible with DC

Débora jare Barac omoamɨri Sísara

1Aod omano güire, Israel iñemuña reta oyapo ye ikavimbae yandeYa jesa róvai,

2jare yandeYa omee reta Jabín mburuvicha guasu Canaán pegua ipo pe, oporookuai tëta Hazor pe vae. Isundaro reta juvicha ko jae Sísara, jae oiko Haroset-goim pe.

3Jabín güɨnoi noveciento käretou jiero pegua, jare veinte año rupi oiporarauka yae Israel iñemuña reta pe. Jayave Israel iñemuña reta oyerure mbɨatɨtɨ ndive yandeYa pe.

4Jókuae ara rupi mburuvicharä oiko metei kuña Israel iñemuña reta re, jae ko ñeemombeúa Débora, Lapidot jembireko.

5Débora oyepokuaa oguapɨ karandaɨ igüɨ pe (jáeramo: “Débora ikarandaɨ” jei chupe vae), Ramá jare Bet-el ipäu pe, ɨvɨtɨ reta Efraín pegua pe, jare Israel iñemuña reta yogüeru yepi ípɨri oñono kavi vaerä chupe reta teko reta.

6Jae omondo güeruruka Barac,Heb 11.32. Abinoam taɨ, tëta Cedes pe oiko vae, jókuae tëta oï Neftalí iñemuña reta iɨvɨ pe, jare jei chupe:

—YandeYa Israel iTumpa ndeokuai körai: “Ekua ɨvɨtɨ Tabor pe jare emboatɨ diez mil kuimbae Neftalí iñemuña pegua reta jare Zabulón iñemuña pegua reta.

7Che amboukata Jabín isundaro juvicha Sísara, ou vaerä ɨ̈aka Cisón pe oñeraro nde ndive, ikäretou reta ñeraro pegua ndive jare isundaro reta ndive. Ërei che ameeta ndepo pe.”

8Barac jei chupe:

—Nde reo cherupíe yave ajata, ërei mbaetɨta ko reo cherupíe yave ngaraa aja.

9Débora jei:

—Ajata nderupíe, jaeño kuae ñeraro reota reyapo vae rupi agüɨyeta reyembotuicha, echa yandeYa omee Sísara, kuña ipo pe.

Jayave Débora ojo Barac jupíe Cedes pe.

10Joko pe Barac omboatɨ Zabulón iñemuña reta jare Neftalí iñemuña pegua reta diez mil kuimbae. Débora ojo vi jupíe.

11Jare ceneo Heber, Hobab, Moisés jovaya iñemuña osɨrɨ yepe jëtara ceneo reta güi jare ojo oñemoëta ɨvɨtɨ päu Zaanaim jee vae pe, Cedes iyɨpɨ pe oï vae pe.

12Sísara oikuaa yave Barac oyeupi ko ɨvɨtɨ Tabor re,

13omboatɨ ikäretou jiero pegua reta noveciento, jare opaete isundaro reta jae ndive ñogüɨnoi vae, jare yogüɨraja Haroset-goim güi ɨ̈aka Cisón pe.

14Jayave Débora jei Barac pe:

—¡Epüa, echa kuae ara ko yandeYa omeeta ndepo pe Sísara! ¡YandeYa ojo ma perenonde!

Jare Barac ogüeyɨ ɨvɨtɨ Tabor güi diez mil isundaro ndive,

15jare yandeYa omoamɨriuka Sísara jare isundaro reta oñeraro ma yave Barac ndive; jare Sísara ogüeyɨ ikäretou güi otekuarai ipɨ re.

16Ërei Barac omoña käretou reta jare sundaro reta Haroset-goim pe regua. Jókuae ara opaetei Sísara isundaro reta omano kɨsepuku pe, mbaetɨ etei jembɨre metei yepe.

17Jare Sísara otekuarai ojo oväe Jael jo guakapi pegua pe, jae ko ceneo Heber jembireko, echa Jabín mburuvicha guasu Hazor pegua omae kavi oyoe ceneo Heber ndive jare jo pegua reta ndive.

18Jare Jael oë oövaiti, jei chupe:

—Eyu cheya, eyu kuae pe agüɨye ekɨɨye.

Javoi Sísara oike o pe jare Jael omboyasoi asoya pe, jökorai omoñemi;

19jayave Sísara oiporu ɨ jou vaerä, echa ɨuve oyaporai yae ma. Jael oipea ɨrɨru mɨmbapire pegua neche oñovatu pɨpe vae jare omee jou; jare omboyasoi ye oñono asoya pe.

20Sísara jei chupe:

—Epɨta neröke pe, kia ou jare oparandu ndeve oime ra kia kuae pe oï vae yave, ere chupe mbaetɨ ko vae.

21Ërei Sísara ikangɨ yae güi jopeɨ jare oke. Jayave Jael oipɨɨ martillo jare metei etaka o guakapi pegua omoata jese vae, jare ojo oyeendumbae (vɨari) reve oyatɨka Sísara iñäka-ɨke re, oikutu ɨvɨ re. Jökorai omano Sísara.

22Jare Barac oaɨkuemoña Sísara ojo oväe Jael jo pe yave, Jael oë oövaiti jare jei chupe:

—Eyu, taechauka ndeve kuimbae reaɨkuemoña reyu vae.

Barac oike o guakapi pegua pe yave, oecha Sísara oyepɨso omano oï ɨvɨ re, jare etaka oyekutu oï iñäka-ɨke re.

23Jökorai jókuae ara Tumpa omoamɨri Jabín mburuvicha guasu Canaán pegua, Israel iñemuña reta jóvai.

24Jare Israel iñemuña reta omboɨpɨ güɨnoi mbaepuere Jabín re opa omokañɨtei regua.