1Mburuvicha guasu Egipto pegua, omboatɨ ejército tuichagüe vae, yaipapa rapeä ɨvɨkuitï ɨguasu jembeɨ rupigua rami, jaeramiño vi jeta ɨguasu rupigua guataka reta, jare tavɨ rupi ikɨ̈reɨ tei oyemboiya Alejandro iɨvɨ re, omoïru vaerä jae imbae.
2Omboɨpɨ oguata Siria kotɨ imiari reve vɨakatu re, tëta guasuɨgua reta oipea chupe jöke jare oë oövaiti. Mburuvicha guasu yepe oyókuai reta jökorai echa ko Tolomeo jae jovaya.
3Ërei ngatu tëta ñavo rupi, Tolomeo oeya güɨraja järoarä.
4Ou yave oväe Azoto pe, oechauka reta chupe Dagón itupao ókai vae, jaeramiño vi tëta guasu jare iyɨvɨrigua reta opa oyemboai vae, maiaa jokoropi oyoa tëogüe okaipambae reta; jae reta etei omboatɨ Tolomeo japerä rupi oecha vaerä.
5Jokuaeɨgua reta imiari Jonatán jembiapo re mburuvicha guasu pe, omoï pɨ̈chɨi vaerä, ërei mburuvicha guasu kïriiño opɨta.
6Jonatán oë Jope kotɨ oövaiti vaerä mburuvicha jeta vae ndive. Joko pe oyopopɨɨ jare oke reta.
7Jonatán joko güi omoïru mburuvicha guasu ɨ̈aka Eléutero jee vae kotɨ, jare jokotɨ güi oyerova ye Jerusalén kotɨ.
8Jökorai mburuvicha guasu Tolomeo oyemboiya tëta reta re ɨguasu jembeɨ güive Seleucia Marítima kotɨ, ërei igüɨ rupi oyemongeta vɨari oiko kërai oitɨ vaerä Alejandro.
9Omondo ñee jeroataa reta Demetrio kotɨ jei vaerä chupe: “Eyu yamboyoupíe yemongeta: Che ameeta ndeve cherayɨ, añave Alejandro jembirekorä güɨnoi vae jare nde reikoñota mburuvicharä nderu iɨvɨ guasu pe.
10Ayembopɨaä amee cherayɨ Alejandro pe vae re, echa ko jae ikɨ̈reɨ tëi ma cheyuka.”
11Ërei oipotai ma omboeko jaanga Alejandro ikɨ̈reɨ ramo Tolomeo oyemboiya jae iɨvɨ re.
12Tolomeo, jökorai yave, opɨ̈ro tayɨ Alejandro güi jare omboasa Demetrio pe. Körai oñomoïru poi Alejandro ndive, joko güive oyovaicho vaerä opɨta reta.
13Joko güi Tolomeo oike Antioquía kotɨ jare oñeñono mburuvicha guasurä Asia re. Jökorai oï mburuvicha guasurä mókoi tëtaguasu re, jae ko Egipto re jare Asia re.
14Jókuae ara rupi, mburuvicha guasu Alejandro oiko Cilicia rupi, echa jokuaeɨgua reta opa oñemoäteɨ.
15Kuae oendu yave, omboɨpɨ oguata opüa vaerä Tolomeo re, ërei jae oövaiti ejército ipɨ̈rata yae vae ndive jare opa ombotekuaraiuka reta.
16Alejandro ojo oñepɨ̈ro Arabia kotɨ, jökorai Tolomeo oporomoamɨri ye.
17Ërei Zabdiel, tuvicha Arabia pegua, oiñäkaasɨa Alejandro jare omondo iñäkagüe Tolomeo pe.
18Ërei ngatu mókoi ara ma oasa yave Tolomeo omano, jare ñepɨ̈roa rupi oeya sundaro reta vae re opa oparapiti jokuaeɨgua reta.
19Demetrio opɨta mburuvicha guasurä año ciento sesenta y siete pe.
Jonatán oñomoïru Demetrio II ndive20Jókuae ara rupi, Jonatán omboatɨ Judeaɨgua reta oporepeña vaerä tëta mí Jerusalén re, jáeramo oyapo reta jeta tembiporu ñoraro pegua.
21Ërei amogüe Israel-ɨgua jeko ae güɨröɨro vae, jëta kotɨ oyovaicho vae reta, yogüɨraja mburuvicha guasu kotɨ imiari vaerä chupe Jonatán oimama tëta mí güɨnoi vae re.
22Mburuvicha guasu, oendu yave, iyarasɨ yae, jaema etei opüa oguata Tolemaida kotɨ, joko güi ombaekuatía Jonatán pe agüɨye vaerä okua räri jare ojo vaerä ɨmambae Tolemaida kotɨ imiari vaerä jae ndive.
23Jonatán oecha yave kuatía, oyókuai isundaro agüɨye vaerä opoi oñoraro güi, oiparavo mbovɨ arakuaa iya reta reta jare sacerdote reta, jare opa yogüɨraja reta oipoɨu reve yemboatɨa pe.
24Güɨraja korepoti, oro, temimonde jare jeta ïru mbota reta, jare oyemboɨ mburuvicha guasu jóvai Tolemaida pe, jae ipɨakatu omae jese
25yepe tei jëtaɨgua jeko güɨröɨro vae reta pe mbaetɨ etei ipöra.
26Mburuvicha guasu oyapo jae ndive itenondegua reta rami, jare omboete tuicha opaete iñeïru reta jóvai.
27Omoañete ye sundaro ruvicharä, ombopɨau ye vi tenondegua yemongeta oyeapo vae jare oipapa opaete mburuvicha ivɨaka reta ipɨte pe.
28Jonatán oiporu mburuvicha guasu pe agüɨye vaerä ma Judea omboepɨ impuesto jaeramiño vi mboapɨ reve distrito reta Samaria pegua, güɨrökuavee omee vaerä chupe nueve mil noveciento kilo korepoti.
29Mburuvicha pe ipöra kuae, jare oikuatía Jonatán pe tupapire opaete kuae re, körai:
30“Mburuvicha guasu Demetrio omondo tamaraeme jëtara Jonatán pe jare judío reta jëta pe.
31Aikuatía ye pɨau peve cherëtara Lástenes pe aikuatía peregua vae, peikuaa kavi vaerä pepɨta:
32‘Mburuvicha guasu Demetrio omondo tamaraeme jëtara omboete vae Lástenes pe.
33Echa Judaɨgua reta jae ko chevɨa-ïru, jare ombopo jembiapo reta chekotɨ jare oechauka kɨ̈reɨ ngatu chekotɨ ramo, ayapota ikavi vae ikotɨ.
34Amoañete chupe reta ipɨapotaa rupi yogüɨreko vaerä ɨvɨ Judea pe jare distrito reta Efraín, Lida jare Ramataim pe, Samaria güi oyemboyao vae jare oasa oyepapa Judea pe vae, jaeramiño vi opaete jókuae ɨvɨ jae reta imbae rupi. Opaetei Israel-ɨgua reta yogüɨraja güɨrökuavee mbaeyuka Jerusalén pe vae, cheɨ̈rota chupe año ñavo mburuvicha guasu oiporu chupe reta imbaagüɨye kó rupigua rupi impuesto omboepɨ vaerä re.
35Añave güive, cheɨ̈ro peve ïru impuesto reta, jae ko diezmo jare tributo reta cheve pemeese vae re, impuesto yukɨ regua jare impuesto oro regua mburuvicha guasu peguarä. Opaete re cheɨ̈ro peve.
36Jáeramo añave güive, opaete kuae ñee reta ngaraa ye kia omboai.
37Eikuatía ye pɨau kuae kuatía ïru jare emee Jonatán pe, jae oñono vera ɨvɨtɨ ikɨambae oïa pe, opaete vae oecha vaerä.’ ”
Jonatán omborɨ Demetrio II38Mburuvicha guasu Demetrio oecha yave tëta guasu oï pɨa güive ma jare mbaetɨ ma kia oyovaicho jae ndive, opa oyora isundaro reta, omondo jëta jëta ae rupi, jaeño ma omombɨta joko pe sundaro reta korepoti re oñoraro vae reta ɨembeɨ rupi güi yogüerugüe reta. Kuae jeko pegua, oyeapa ikotɨ tu amɨrigüe reta isundaro reta.
39Jayave metei kuimbae Trifón jee vae, tenonde yave Alejandro omborɨse vae, oecha yave ipɨakatu nungaä Demetrio kotɨ isundaro reta, ojo imiari Imalcué ndive, jae ko tuvicha Arabia pegua, Antíoco ombokuakuaa vae, Alejandro taɨ michi raɨ vae.
40Jae omoñera omee vaerä chupe jókuae michia raɨ oiko vaerä mburuvicha guasurä tu jekovia pe. Trifón imiari chupe opaete Demetrio jembiapo reta re jare kërai oyovaicho opɨta isundaro reta ndive vae. Trifón opɨta ɨma ngatu jokoropi.
41Jökorai ramboeve, Jonatán oiporu mburuvicha guasu pe ombosɨrɨ vaerä isundaro reta tëta mí Jerusalén güi jare ïru ñepɨ̈roa reta güi, echa iyapɨä güɨrekoasɨ Israel-ɨgua reta,
42Demetrio jei chupe: “Mbaetɨta kuaeño ayapo ndeve jare nerëta pe, güɨramoiño jëgua cheve yave, ajata vi pomboete tuicha rupi.
43Ërei añave eyapo ikavi vae jare embou ndesundaro reta tachemborɨ, echa chembae reta opa ma chereeya.”
44Jonatán omondo chupe Antioquía kotɨ tres mil kuimbae reta ipɨ̈rata jare jäta ngatu vae reta. Yogüɨraja yave oväe, mburuvicha guasu oyerovia yae omae jese reta.
45Jokuaeɨgua reta, ñogüɨnoi ciento veinte mil kuimbae reta vae ndive, oyomboatɨ tëta guasu pe oyuka vaerä mburuvicha guasu.
46Jae oñepɨ̈ro ma mburuvicha guasu reta jo guasu pe, jare jeta vae reta opa oë ikatu rupi yave, okua oyoe reta.
47Mburuvicha guasu Demetrio oenɨi judío reta omborɨ vaerä. Jae reta oyomboatɨ ɨmambae pegua ikotɨ; joko güi oñemoai reta tëta rupi, jare jókuae ara oporoyuka reta cien mil rupi.
48Oyatapɨ jare opavusu reta tëta guasu re, jökorai oepɨ reta mburuvicha guasu.
49Jokuaeɨgua reta oecha yave judío reta oyemboiya jókuae tëta re, okɨɨye täta, jare osapúkai reve jei reta mburuvicha guasu pe:
50“¡Ñaneɨ̈ro oyoupe! ¡Agüɨye mo judío reta toñoraro mbatee ore ndive jare ñanerëta kotɨ!”
51Jayave opoi reta jembiporu güi jare iñɨ̈ro oyoupe. Judío reta ombopɨakavi yae mburuvicha guasu, jare jërakua opaete ɨvɨ guasu rupi, joko güi oyerova reta ye Jerusalén kotɨ jeta teyupapo ndive.
52Ërei mburuvicha guasu Demetrio oï kavi ma yave jenda pe jare tëta opɨta ma yave kïrii ipogüɨ pe,
53mbaetɨ oyapo metei ave oñererökuaveegüe, mbaetɨ ma tenonde rami Jonatán ndive, omboekovia vaerägüe chupe jembiapo, omboɨpɨ güɨrekoasɨ.
Jonatán oyopokuaa Antíoco VI ndive54Kuae jaɨkue rupi, Trifón oyerova Antíoco ndive, jae ko ikunumi vɨteri vae. Joko pe omboguapɨ reta mburuvicharä Antíoco raɨ,
55jare opaete sundaro reta Demetrio oyoragüe oyemboya ikotɨ jare güɨropüa reta ñoraro Demetrio kotɨ, jae iñamɨri jare osɨi joko güi.
56Trifón oyemboiya yave elefante reta re, jae opɨ̈ro Antioquía pe.
57Kunumi Antíoco ombaekuatía Jonatán pe, omoañete jókuae kuatía rupi iparavɨkɨ sacerdote ruvicharä oiko vae jare mburuvicharä oiko jókuae irundɨ distrito reta re vae, jaeramiño vi ombojee mburuvicha guasu ivɨaka tenondegua ete reta ipɨte pe.
58Omondo vi chupe kopa oro pegua jare ïru mbae jou pɨpe vaerä, omee vi chupe ñee oɨu vaerä kopa oro pegua pe, oyemonde vaerä pɨ̈taasɨ vae pe jare oñono vaerä iyé broche oro pegua.
59Jëtara Simón ombojee sundaro ruvicha ɨvɨ Escala oï Tiro pe vae güive ojoi oya Egipto re.
60Jonatán oguata opaete provincia rupi jare tëta guasu reta Éufrates güi kuaraɨ oikea kotɨ ñogüɨnoi vae rupi, jare opaete ejército reta Siria pegua oñemoïru jae ndive. Joko güi ojo Ascalón kotɨ, joko pe jokuaeɨgua reta oövaiti omboete reve.
61Oasavi Gaza kotɨ, ërei jokuaeɨgua reta oyokenda jöke chugüi. Ërei jae oikëse, oyatapɨ jese jare opavusu ïru tëta raɨ reta iyɨpɨ rupigua re.
62Jayave Gazaɨgua reta oyembogüɨ, jare Jonatán iñeeröɨsa jae reta ndive, ërei güɨraja tembipɨɨrä tuvicha taɨ reta jare omondo Jerusalén kotɨ. Joko güi oguata ye Damasco kotɨ.
63Jonatán pe jërakua Demetrio isundaro ruvicha reta yogüeru oväe jeta sundaro reta ndive Cedes Galilea pegua pe, oyopia vaerä jae iparavɨkɨ.
64Jonatán ojo oñoraro jae reta ndive, jare oeya jëtara Simón Judea pe.
65Simón oyembojeyupa Bet-sur jóvai, mbovɨ ara rupi oimama güɨreko yave ramo okua jese.
66Ojoi jokuaeɨgua reta oyembogüɨ jare jayave ramo omboyoupíe jae reta ndive yemongeta, ërei opa oeyauka chupe jókuae tëta guasu, jayave joko güi oyemboiya jese jare oñono joko pe järoarä.
67Jökorai ramboeve, Jonatán, oyembojeyupa ma iejército ndive ɨupa Genesaret iyɨpɨ kotɨ. Ndei mboveasi omboɨpɨ oguata ɨvɨ Hasor kotɨ,
68ojo oiko ramboeve jókuae ñuu rupi oë chupe ejército tëta ambuaeɨgua reta, jare ïru ejército reta yepe oime vi jókuae ɨvɨtɨ kotɨ okätɨro vɨari ñogüɨnoi jese.
69Kuae reta oë yave iñemía güi okua Jonatán isundaro reta re.
70Opaete sundaro reta otekuarai, mbaetɨ metei ave opɨta, jaeñoete Matatías, Absalón taɨ, jare Judas Calfi taɨ, jae ko sundaro ruvicha reta.
71Jonatán omondoro jemimonde, oyatɨ ɨvɨkúi pe iñäka jare opoko oyerure.
72Jeseveño, oyerova ye jovaicho reta re okua, güɨraja oporomoamɨri jare opa ombosɨi jovaicho reta.
73Judío otekuarai vae reta oecha yave kuae, ou ye ikotɨ jare opoko reta oaɨkuemoña jae ndive, teyupa Cedes kotɨ tovaicho reta güɨnoia pe, joko pe oyembojeyupa vi jae reta.
74Jókuae ara omano tres mil rupi tëta ambuaeɨgua reta isundaro güi. Joko güi Jonatán oyerova ye Jerusalén kotɨ.
Who We AreWhat We EelieveWhat We Do
2025 by iamachristian.org,Inc All rights reserved.
