JOSUÉ 8 - Guarani Bible with DC

Israel iñemuña reta opɨ̈ro tëta Hai jare opa omokañɨtei

1YandeYa jei Josué pe: “Agüɨye ekɨɨye, agüɨye vi eyembopɨtu, emboatɨ ndeyeupe opaete kuimbae reta ñeraro regua, jare eporepeña tëta Hai re. Mase, che amee ko ndepo pe mburuvicha guasu Hai pegua, opaete joko pegua reta, tëta jare iɨvɨ.

2Eyapo Hai jare joko pegua mburuvicha guasu pe, Jericó jare joko pegua mburuvicha guasu pe reyapo rami; jaeño pemombɨta peyeupe imbaembae reta jare jɨmba reta. Emondo toñemi kavi tokätɨro toñogüɨnoi tëta Hai ikupe rupi kuimbae ñeraro regua reta.”

3Jayave Josué jare opaete kuimbae ñeraro regua reta oyupavo yogüɨraja vaerä oporepeña tëta Hai re. Josué oiparavo treinta mil kuimbae ñeraro regua jare opa omondo pɨ̈tu yave,

4oyókuai reve körai: “Peendu kavi: Pekua tëta ikupe kotɨ rupi, peñemi kavi pekätɨro peï köiño tëta güi, peïndaivi peï.

5Ïru reta ndive royata tëta re, jare joko pegua reta ñogüɨnoe oreve yave tenonde yave rami, ore rotekuaraita chugüi reta.

6Jare jae reta oreraɨkuemoñata mombɨrɨ roeyauka tëta chupe reta regua; echa oyemongeta retata jekuae yandembotekuarai reta ye vae.

7Jayave pe reta peëta peñemi kavi pekätɨro peïa güi peike pepɨ̈ro tëta, echa yandeYa Tumpa omeeta peve.

8Peike ma joko pe yave, opa peapɨ yandeYa jei rami. Echa mborookuai ko.”

9Jayave Josué opa omondo, jare jae reta opa yogüɨraja oñemi kavi okätɨro ñogüɨnoi Bet-el jare Hai ipäu pe, Hai güi kuaraɨ oikea kotɨ, jare Josué opɨta ïru reta ndive teyupa pe.

10Pɨareve pe Josué opüa ndeimboveasɨ, omae jare oipapa kavi jae ndive ñogüɨnoi vae reta. Javoi ojo jae reta jenonde tenondegua reta ndive oporepeña vaerä tëta Hai re.

11Jare opaete kuimbae ñeraro regua reta jae ndive ñogüɨnoi vae yogüɨraja oväe tëta jóvai, jare oyembojeyupa reta Hai güi ɨvɨtuguasu kotɨ. Jökorai tëta Hai jare jae reta güɨnoi ɨvɨtu päu ipe kavi vae mbɨte pe.

12Jökorai Josué omondo omoñemi kavi okätɨro ñogüɨnoi cinco mil rupi kuimbae Bet-el jare Hai ipäu pe, tëta güi kuaraɨ oikea kotɨ.

13Jökorai opɨta reta mókoi yemboyao pe, opaete vae ñogüɨnoi tëta güi ɨvɨtuguasu kotɨ jare oñemi kavi okätɨro ñogüɨnoi vae, ñogüɨnoi tëta güi kuaraɨ oikea kotɨ. Jare Josué ojo oväe jókuae pɨ̈tu ɨvɨtɨ päu ipe kavi vae mbɨte pe.

14Mburuvicha guasu Hai pegua oikuaa kuae regua yave, ndeimboveasɨ jaɨai oë joko pegua reta ndive oñeraro vaerä Israel iñemuña reta ndive, ɨvɨtɨ päu ipe kavi vae Arabá pe, oikuaambae reve tëta ikupe kotɨ oime ɨ̈ru Israel iñemuña reta oñemi kavi okätɨro ñogüɨnoi vae.

15Jayave Josué opaete Israel iñemuña reta ndive ñamɨri rami oyeapo, opa otekuarai Hai pegua reta güi tape ñuu rupigua rupi.

16Jare Hai pegua reta oyomboatɨ oaɨkuemoña vaerä Israel iñemuña reta jare Josué; jókuae jeko pegua oeya reta ma tëta.

17Mbaetɨ metei ave kuimbae Hai pe ani Bet-el pe, oëmbae oaɨkuemoña Israel iñemuña reta vae; jare oporoaɨkuemoña reta jeko pegua oeya reta tëta iyangarekoambae.

18Jayave yandeYa jei Josué pe: “Eropövee mii renoi ndepo pe vae Hai kotɨ, echa che ameeta ndeve jókuae tëta.”

Jare Josué güɨropövee tëta kotɨ mii güɨnoi ipo pe vae.

19Jayave oñemi ñogüɨnoi vae reta jarembae pegua ñogüɨnoe oñemi kavi okätɨro ñogüɨnoia güi, jare oike reta opɨ̈ro tëta, omoendɨ reta jese tata jarembae pegua.

20Jare kuimbae Hai pegua reta oyerova omae jaɨkue kotɨ yave, oecha reta jëta güi opüa tätati ara kotɨ. Mbaetɨ kerupi otekuarai reta vaerä, echa Israel iñemuña reta otekuarai yogüɨraja ñuu kotɨ vae, oyerova chupe reta.

21Opaete Israel iñemuña reta Josué ndive ñogüɨnoi vae oecha yave, jókuae oñemi kavi okätɨro ñogüɨnoi vae reta opɨ̈ro ma tëta, jare omoendɨ reta ma jese tata yave, oyerova reta jare oporepeña Hai pegua reta re.

22Javoi tëta opɨ̈ro vae reta ñogüɨnoe joko güi oövaiti, jökorai Hai pegua reta opɨta Israel iñemuña reta mókoi yemboyao ñogüɨnoi vae ipäu pe, jare kuae reta omboɨpɨ oɨ̈raro Hai pegua reta opaetei oyuka regua.

23Ërei mburuvicha guasu Hai pegua, oipɨɨ reta jekove reveño jare güeru reta Josué pe.

24Israel iñemuña reta opa ma oyuka opaete Hai pegua reta ñuu rupi ñogüɨnoe oaɨkuemoña reta vae yave, oyerova ye Hai pe, jare opa vi oyuka joko pe opɨtagüe reta.

25Jókuae ara opaetei omano kuimbae jare kuña Hai pegua reta, jae ko doce mil,

26echa Josué mbaetɨ ombogüeyɨ ipo güɨropövee mii güɨnoi vae, omokañɨtei regua opaetei Hai pegua reta.

27Ërei Israel iñemuña reta omombɨta iyeupe mɨmba reta jare mbaembae tëta pegua, yandeYa oyókuai Josué rami,

28jare Josué oapɨ Hai, omokañɨtei oeya jekuae avei pegua, jökorai opɨta añave regua.

29Jare mburuvicha guasu Hai pegua ombosagüɨu metei ɨvɨra re kaaru regua, jare kuaraɨ oike ma yave ombogüeyɨuka ɨvɨra güi jetegüe, jare oñonouka tëta jöke pe jare omboatɨuka jese ita. Jókuae ita yatɨ oï vae oimeño añave rupi.

Josué omongeta mborookuai ɨvɨtɨ Ebal re

30Jayave Josué omopüa mɨmba oyeyuka oyeapɨ jese vae yandeYa pe, Israel iTumpa pe ɨvɨtɨ Ebal re,

31Moisés, yandeYa jembiokuai oyókuai Israel iñemuña reta rami, Moisés omombeu mborookuai vae oyekuatía oï rami: “Mɨmba oyeyuka oyeapɨ jese vae ita reta oñeopambae pegua.”