ZACARÍAS 10 - Guarani Bible with DC

YandeYa oyorata imbae vae

1Peiporu yandeYa pe ama taɨkuegua,

jae ama-vera oyapo vae ombouta peve jeta ama

jare kaa jokɨ katuta peve.

2Echa tumpa-raanga reta iñee mbaetɨ ko añetete,

jare maratuta vae imombeúa reta oecha apu,

ipaɨu re imiari jare oporombopɨakatu jaanga;

jáeramo tëta, vecha oikoiño vae rami, oiporara,

echa mbaetɨ iyangarekoa.

3Jáeramo yandeYa jei:

“Maangarekoa reta kotɨ chearasɨ oyepota tata rami.

Aiporaraukata mburuvicha reta pe.”

Ërei yandeYa Imbaepuere yae ete vae

oyangarekota imbae vae re,

Judá iñemuña reta re,

oyapota kavayu jëia yae ñeraro peguarä vae rami.

4Chugüi oëta ita o iguapɨka,

etaka o guakapi pegua oñeapɨti jese vae

jare güɨrapa ñeraro pegua,

jare opaete mburuvicha.

5Sundaro jëia yae vae ramita ñeraro pe.

Opɨ̈rota jovaicho reta re tuyuapo re rami.

Oñoraro retata, echa yandeYa oïta jae reta ndive;

jare kavayu regua reta oñemomaraiukata.

6YandeYa jei:

“Che amomɨ̈ratata Judá iñemuña reta,

José iñemuña reta ayorata jare amboyerova yeta.

Echa aɨu yae reta, jare ñogüɨnoita mbaetɨ etei aröɨro rami.

Echa che ko jae iYa Tumpa, aenduta iyerure reta.

7Efraín iñemuña reta sundaro jëia yae vae ramita.

Ipɨa oyeroviata vino jou vae rami.

Taɨ reta oecha yave oyerovia yaeta vi.

¡Ipɨa oyeroviata yandeYa re!

8Chetɨvɨñee pe aenɨita, jare amboatɨ retata,

echa che ayora retata.

Oñemuña retata jeta tenonde yave rami.

9Che ko amoai reta tëta guasu reta rupi,

ërei yepe tëi ñogüɨnoi mombɨrɨ, imaenduata cheré,

yogüɨrekota taɨ reta ndive jare oyerova reta yeta.

10Echa che aru yeta Egipto güi;

aru yeta Asiria güi.

Arajata Galaad jare Líbano pe oata yeta jendarä.

11Oasa retata ɨguasu Egipto pegua, ɨaparúa amokïriita.

Ɨ̈aka Nilo tɨpɨ yae vae amotinita,

jare Asiria ipɨa pochɨ amboaita.

Egipto imbaepuere amokañɨteita.

12Che ameeta chupe reta mɨ̈rata,

jare cheree re oguata retata. Che peYa jae kuae.”