1María jare Aarón iñeenguru Moisés kotɨ, kuña Cus iñemuña pegua jeko pegua, echa jae omenda kuña Cus iñemuña pegua ndive.
2Jei reta vi: “¿Moisés rupiño pa yandeYa imiari? ¿Mbaetɨ pa imiari vi yande rupi?” Jare kuae oendu yandeYa.
3Jare jókuae kuimbae Moisés ipɨaguasu yae vae ko, opaete kuimbae reta ɨvɨ pegua güi.
4Jare yandeYa jei Moisés pe, Aarón jare María pe: “Pe mboapɨ reta, pekua tupao guakapi pegua pe.”
Jare yogüɨraja mboapɨ reve.
5Jayave yandeYa ogüeyɨ amapɨtu re, jare ou oñeñono tupao guakapi pegua jöke pe, jare oenɨi Aarón jare María; jare yogüɨraja päve jóvai.
6Jare jae jei chupe reta: “Peyeapɨsaka añave cheñee re: Oime yave pepɨte pe cheñeemombeúa, ayeechaukata chupe, ipaɨu pe chemiarita jae ndive;
7ërei cherembiokuai Moisés ndive mbaetɨ jökorai, echa jae jupi rupi kavi ko oyapo opaete mbaravɨkɨHeb 3.2. chero pe,
8oyoova pe ko chemiari kavi yae jae ndive, mbaetɨ mbae iä rupi; jae chereecha etei. Jayave, ¿maera pa mbaetɨ peipoɨu peñeenguru cherembiokuai Moisés kotɨ?”
9YandeYa iyarasɨ yae ete ikotɨ reta; jare ojo joko güi.
10Jare amapɨtu osɨrɨ tupao guakapi pegua iárambo güi ñoete iroɨ morotï vae rami oë María re pire mbaerasɨ ókui vae; jare Aarón omae María re yave oecha jese pire mbaerasɨ ókui vae.
11Jare Aarón jei Moisés pe: “Atataɨ cheya, agüɨye eñono añave oreré kuae mbaeyoa; echa orearakuaambae rami royapo jare oreyoa.
12Agüɨye María ipire topɨta michia raɨ omano oa vae ipire rami, echa jókuae nunga oa ichɨ jɨe güi yave, ipire ichuumbi äve voi ma ko oa.”
13Jayave Moisés oyerure yandeYa pe, jei reve: “Romoñera añave cheTumpa, rembogüera vaerä.”
14Jare yandeYa jei Moisés pe: “Tu ondɨvɨ jova re yave, ¿mbaetɨta pa chiu ara imara opɨta? Toñerenoe María teyupaNm 5.2-3. güi ikatu pe chiu ara pegua, jare jaɨkue rupi toyereru ye.”
15Jökorai María oñerenoe teyupa güi chiu ara pegua, jare Israel iñemuña reta mbaetɨ yogüɨraja joko güi María ou ye regua oyea jae reta ndive.
16Jaɨkue rupi ñogüɨnoe Hazerot güi, jare yogüɨraja oyembojeyupa reta ñuu Parán pe.
Who We AreWhat We EelieveWhat We Do
2025 by iamachristian.org,Inc All rights reserved.
