ISAÍAS 42 - Guarani Bible with DC

YandeYa jembiokuai

1“Mase, ko oï cherembiokuai, che ayangarekota jese vae;

cherembiparavo, chepɨa oyerovia jese vae;

jese añono cheEspíritu;

jae güeruta jupi vae opaete tëtaguasu reta peguarä.

2Ngaraa osapúkai, jare ngaraa iñeeäta,

ngaraa ave iñee oenduka kaye rupi,

3ngaraa omopë täkuarasɨ oyekagüe,

jare ngaraa ombogüe mechero ogüeta ma oï vae;

añete vae rupi güeruta jupi vae.

4Ngaraa ikangɨ jare ipɨtu,

oñono regua jupi vae opaete kuae ɨvɨ pe;

jare tëtaguasu reta ɨguasu jembeɨ rupigua reta oärota mborookuai jae omeeta vae.”

5Körai jei yandeYa Tumpa, ara Iyapoa,

jae oyapo ara;

jae oyapo ɨvɨ jare mbaembae oñemuña pɨpe vae;

jae omee ɨvɨ ipo reta pe ipɨ̈túe vaerä,

jare tekove, ɨvɨ iárambo yogüɨreko

7Reipea vaerä jesambae reta jesa,

renoe vaerä tembipɨɨ reta tembipɨɨrɨru güi,

jare tembipɨɨrɨru pɨtumimbi vae pe yogüɨreko vae reta.

8Che ko ndeYa, kuae ko jae cheree;

ïru vae pe ngaraa amee cheyemboetea,

jare tumpa-raanga reta pe ave ngaraa amee cheyemboetea.

9Mase, kërai oyembopo opaete mbaembae amoërakua iyɨpɨ güive voi vae,

jare añave amoërakua ye mbae ipɨau vae,

amombeu peve ndei oyekuaa mbove.”

Tairari mbaemboete pegua Tumpa iporoepɨ re

10Petairari yandeYa pe tairari ipɨau vae,

pemboete, opaete ɨvɨ pegua reta;

ɨguasu rupi peguata vae reta,

jare ɨguasu ipo reta,

ɨguasu jembeɨ reta jare opaete pɨpegua reta.

11Toyerovia ñuu reta jare pɨpegua tëta guasu reta,

Cedar iñemuña reta jëta raɨ raɨ rupi.

Totairari Sela pegua reta oyerovia güi,

tosapúkai reta ɨvɨtɨ reta iyapɨte güi.

12Tomee reta mbaemboete yandeYa pe,

tomoërakua reta mbaemboete chupe oñemee vae,

tëtaguasu reta ɨguasu jembeɨ rupigua rupi.

13YandeYa oëta, metei jëia yae ñeraro regua vae rami,

jare oñerarota, ñeraro regua yavaetegüe rami;

osapúkai pukaita jare omoamɨrita jovaicho reta.

14YandeYa jei:

“Arakae, iyɨpɨ güive chekïrii

mbaetɨ mbae jae jare ayembopɨaguasu;

ërei añave cheräseta, metei kuña imembɨrasɨ oï vae rami,

chepüae jare chepɨ̈tupa potaecha.

15Opata amboai ɨvɨtɨ jare ɨvɨtɨ guasu,

opata amombiru ñana reta jokoropigua;

opata ɨ̈aka reta jare ɨupa reta amondɨpa.

16Jesambae reta arajata tape, jae reta oikuaambaea rupi,

jae reta japerä rupi pɨtumimbi amoembipeta,

tape pɨ̈chɨi vae ambokavita.

Kuaekuae, ayapota chupe reta,

mbaetɨta aeya reta jae aeño.

17Tumpa-raanga reta re güɨrovia vae reta,

mbae iä reta re güɨrovia vae reta,

mbae iä reta re oñemotumpa vae reta,

imara yaeta opa oyerova reta.”Israel iñemuña reta iñeereenduä

18“Iyapɨsambae reta, peendu,

jesambae reta, pemae peecha vaerä.

19Mbaetɨi kia jesaä jare iyapɨsaä mbatee cherembiokuai cheremimondo rami vae,

mbaetɨi kia jesaä jare iyapɨsaä mbatee cherembiparavo cherembiokuai rami vae.

20Echa oecha tëi jeta mbaembae, ërei mbaetɨ mbae jei;

oendu tëi, ërei mbaetɨ oendu vae ramiño.

21YandeYa oyerovia jupi vae oaɨu yae jeko pegua,

jáeramo ombotuicha yae iporookuai reta, imboetea yae vaerä;

22ërei kuae tëta güi jeta mbae oñemaepɨ̈ro,

opaetei oyepɨɨ reta oñeñono tembipɨɨrä ɨvɨkua pe,

opa oyokenda oñono tembipɨɨrɨru rupi;

oyemombae jese reta, mbaetɨ kia oyora vaerä;

opa oipɨɨ güɨraja reta, mbaetɨ kia oñemoë jese reta vaerä.”

23¿Ërei, kia pa pegüi reta oenduta kuae?

¿Kia pa oenduta oï kuae mbaembae oasata vae regua?

24¿Kia pa omee Israel, Jacob iñemuña reta,

oñepɨ̈rouka jare oyepɨɨuka vaerä?

YandeYa ko oyapo jókuae,

yandeYa yandeyoa ikotɨ vae;

mbaetɨ peipota peguata jae jeia rupi,

mbaetɨ peipota peyapo iporookuai reta.

25Jáeramo ko oitɨ iyarasɨ jese reta

ñeraro yavaetegüe rupi, opa oapɨ rami opɨta reta,

ërei jeseve mbaetɨ oipota reta oendu.