ECLESIÁSTICO 43 - Guarani Bible with DC

1¡Jae täta ikavi jare ikɨaä etei ara igüɨ!

¡Jae mɨakañɨ tuichagüe vae yasɨtata reta!

2Kuaraɨ jembipe, jare jakugüe oñemoai ojo;

¡jae mɨakañɨgüe vae Tumpa iparavɨkɨ!

3Ara mbɨte ma yave omboakuvo ɨvɨ;

¿kia pa jösata jakugüe pe?

4Horno jaku vae rami ombochɨrɨrɨ jiero reta

jökorai vi ko kuaraɨ omboaku ɨvɨtɨ reta.

Metei tataendɨ jembipe vae opa oapɨ ɨvɨ,

jare jembipegüe opa tesa reta omboesaä.

5¡Jae oasa ete ko tuicha Tumpa, jókuae iyapoa!

Jae jeigüe rupi ko, kuaraɨ ojo oiko.

6Jae vi ko omoëuka yasɨ iara ara ae pe,

jare jae, ikañɨmaa opambae vae rami, omombeu ara reta.

7Jese ko yaikuaa arete reta jare ïru reta oñemokañɨmaa vae;

jape omomoe ojo pɨpei jembipe jäve ojo.

8Ërei ngatu, yasɨ ñavo oyembopɨau;

¡täta mɨakañɨ kërai oyepoepɨ vae!

Kañɨmaa yasɨtata ara re oï vae reta pegua,

omboesape jembipegüe pe ara oasavigüe.

9Yasɨtata reta jae ko ara imbokavía jare imopöraa;

jae jembipegüe ko omboesape ɨvategüe iyapɨmbae vae.

10Tumpa jeigüe rupi ko oiko oiko jenda pe

jare ikangɨä reta oporoäro vaerä.

11Emae yɨɨ re jare emboete iYapoa;

¡jae mɨakañɨ ikavigüe vae!

12Jembipegüe oupitɨ ara,

Tumpa omoai ipo pe yave.

13Tumpa imbaepuere pe oikɨ̈ti aravera reta japerä

jare ombou ararɨapu reta ñenupa rami.

14Metei vae reño oipea reta ara pegua mbaerɨru

jare omboveveuka amapɨtu uruapúa reta rami.

15Imbaepuere pe omotäta amapɨtu reta

jare omonguruvi amandau ita nunga vae.

16Jɨapu tätagüe omokana ɨvɨ,

jare imbaepuere topa tokana ɨvɨtɨ reta.

17Jare jae jeigüe rupi omopüa ɨvɨtu arayevɨ kotɨ güi,

ɨvɨtuguasu tätagüe vae kotɨ, ɨvɨtuai jare ararɨapu.

18Omoai iroɨ güɨra ovevegüe vae rami;

jare oa iroɨ tuku jeta vae rami.

Tïigüe omboesapegüe omboesaä tesa reta,

oecha oa rupive ipɨakaviä opɨta.

19Ɨsápɨi omoai yukɨ rami

jare ipotɨ rami oyapo zafiro reta rami.

20Ombou ɨvɨtuguasu iröɨsagüe,

jare opa omotäta ɨ ɨesaɨ reta rupi.

Metei tɨrɨyɨi vae opa oñemoai opaete ɨrɨru reta rupi;

opa oyasoi metei mbae täta vae.

21Oapɨ jare omotini, tata rami,

ɨvɨtɨ jovɨügüe jare ñana oasavía rupi oï vae.

22Ërei opaetei ombogüera ye ɨsápɨi oa amapɨtu güi vae,

jare opa oñemoai ombokavi vaerä ɨvɨ otinigüe vae.

23Tumpa, iyarakuaa pe, omokïrii ɨguasu,

jare oñono ipäu päu reta ɨguasu pe.

24Ɨguasu rupi oguata vae reta imiari ipɨgüe re,

jare yaendu yave täta ñanemopɨakañɨ.

25Joko ñogüɨnoi mɨakañɨgüe vae iparavɨkɨ reta,

oipotagüe mɨmba reta jare mbaeporou reta.

26Tumpa iporomborɨ rupi iñee mombeúa reta oyapo kavi mbae,

jare mborookuai omee chupe reta yave, oyapo ipɨapotaa.

27Mbaetɨ ma ko yamboarambogua vaerä oñejäaagüe ma:

Oipota jei, Tumpa ko jae opaete.

28Yamboete yoapɨ apɨ yé jae tuichagüe vae;

jae ko oasa ete tuicha opaete mbae oyeapo vae güi.

29Tumpa ko jae oasa ete kɨɨyea vae,

jare imbaepuere, mɨakañɨ ko.

30Pesapúkai pemboete vaerä

opaete vae ipueregüe, jeta ma ko jókuae;

pemboete mɨ̈rata pɨau reta pe,

jare agüɨye pekangɨ echa ngaraaí peupitɨ iyapɨ.

31¿Kia pa oecha imiari vaerä jese?

¿Kia omboete jökorai jae tuichagüe vae?

32Má ko tuicha mbae oñeomigüe reta;

che mbovɨño aecha jembiapogüe reta.

33Tumpa ko opaete oyapo,

jare jupi rupi oiko vae reta pe omee iyarakuaa.