ECLESIÁSTICO 40 - Guarani Bible with DC

Mbɨatɨtɨ reta kuimbae peguara vae

1Tumpa oñono tee mbɨatɨtɨ tuicha vae

jare mbaravɨkɨ tätagüe vae kuimbae reta pe,

ichɨ jɨe güi oë rupive ma

opaete oikove vae reta ichɨ oyerova rupive:

2Yemongeta reta, pɨakɨɨye

jare mbɨatɨtɨ reta oäro ñogüɨnoi ñamano regua.

3Tenda ikavigüe pe ojo oguapɨ oï vae güive

kuae oime ɨvɨkúi pe tanimbu rupi oyapakua oï vae pe iyapɨ,

4jókuae äka-regua ikavigüe overa vera vae güɨraja iyé vae güive

oime mɨmbapire pe oñeoma oï vae pe iyapɨ,

¡mbɨatɨtɨ tätagüe vae, ñomotareɨ, yemongeta, kɨɨye,

mano güi kɨɨye vae, mbochɨ jare ñoraro!

5Oyapakua oputuu yave,

oke yave, ombopɨakaviä jókuae yemongeta reta.

6Oputuu jaangaiño ma michi pegua,

ërei ipɨakaviäñoi opaɨu reve ma,

täta ma okɨɨye ipaɨu reta güi,

kia omoña güɨreko vae güi oipota osɨi oiko vae rami.

7Oecha ma oasayepe rupive, jae opa,

jare oñemokïrii oecha ko mbaetɨ ave mbae.

8Kuae oikota opaete pegua, kuimbae reta pe jare mɨmba reta pe,

ërei chiu yoarambo yé iyoa vae reta pegua.

9Mbaerasɨ, yoyuka reta, taku, ñoraro reta,

maemegua, ñemokañɨtei, karuai jare mano,

10jae ko mbae ikavimbae oyeapo jeko kavimbae reta pegua vae,

joko pe iyapɨ vaerä teko chupe reta.

11Opaete ɨvɨ güi ou vae reta, ɨvɨ pe ko opa reta ojo;

jare ara pe ojo yeta jókuae ara güi ko ou vae.

12Opaete mbota yomongɨa pegua vae, jare mbae jupimbae opata okañɨ,

ërei jupi rupi oiko vae oikota ko oiko.

13Mbaeyekou jupimbae reve vae ɨ oguatagüe opa tɨpa vae rami ko

ani ramo ɨupa amandɨ pe tɨnɨe vae ramita ko;

14tuicha yave, ita reta omboyapayereta,

ërei güɨramoi peguaño opaeteita tɨpa.

15Ipɨarai vae reta ngaraa mbae güɨreko;

jare iporogüɨrovia mbae vae oguapɨ katu aveita ita ikɨse vae re.

16Ñana reta ɨ oguata vae jembeɨ rupi oë vae rami,

jare jarembae opa yɨpi ïru vae ñana reta güi.

17Ërei mboroparareko ko jaema täta,

jare jaema opɨtata isɨmbi oï jenda pe.

Opaete vae güi ikavi vae

18Vino reta jee ngatu ko,

ërei má ko ikavi mbaeyekou ñaväe vae.

19Metei tëta guasu oyeapo ramo vae joko pe oñemuña vae reta ko opoko omoërakua güɨreko,

ërei jókuae güi má ikavi vae jae ko arakuaa ñaväe vae.

Mɨmba jare temitɨ jae ko kuimbae omboyerovia vae,

ërei jókuae güi má ikavi vae jae ko tembireko iporoaɨu vae.

20Vino reta jae yandepɨa omboyerovia vae,

ërei jókuae güi má ikavi vae jae ko oyopota oï vae reta oyoaɨu vae.

21Mimbɨ jare arpa täta ko oyoupíe kavi yemongoi ndive,

ërei jókuae güi má ikavi vae jae ko ñanekü añetegüe jei vae.

22Mbae ikavigüe jare ipöra vae jae ko yanderesa pe täta ikavi vae,

ërei chugüi má ikavi vae jae ko ñana jovɨü kavi oï vae.

23Ñochëi jare guataïru jae ko tape mombeúa ikavigüe vae,

ërei chugüi má ikavi vae jae ko metei tembireko iyarakuaa katu vae.

24Yotɨvɨ vae jare kia jese yaiko vae ko yandereroasa susere güi,

ërei chugüi má ikavi vae jae ko yomboete pe yaasayepe vae.

25Oro jare korepoti ombotuicha kuimbae,

ërei chugüi má oporombotuicha vae jae ko arakuaa ikavigüe vae.

26Mbaeyekou jare mbaepuere ko jae yandepɨa omboyerovia vae,

ërei chugüi má ikavi vae jae ko Tumpa yamboete vae.

Kia ñavo Tumpa omboete vae pe ngaraa mbae oata,

jare ngaraa ma ko yemborɨ oeka vaerä.

27Tumpa yamboete vae metei mbaepotɨ renda rami ko,

opaetei oñova güɨnoi ikavigüe.

Agüɨye eiko kia re

28Cheraɨ michi, agüɨye reyerure reagüe eiko;

má ko ikavi ñamano yayerure reagüe yaiko vae güi.

29Kia ñavo tembíu ambuae re oiko vae

oiko oikoiño ma ko.

Oime kia re yakaru yaiko vae yamboeteä ma ko jókuae;

iyarakuaa vae ngaraa jókuae oyapo.

30Ikaru katu vae pe täta ipöra oyerure oiko vae,

ërei ipɨa pe ou tëi oyemongeta jaekaviä ko jókuae vae.