1Oyekuaa yave pepɨte pe ñeemombeúa ani ipaɨu katu vae, jare omoërakua yave maratuta vae ani mɨakañɨ,
2jare jókuae omoërakua peve maratuta vae ani mɨakañɨ vae oyembopo yave, jare jei yave peve: ‘¡Peyu yaja ñamee mbaemboete ïru tumpa reta pe, pe mbaetɨ peikuaa vae pe!’
3Agüɨye peyeapɨsaka jókuae ñeemombeúa iñee reta re, ani jókuae ipaɨu katu vae re. Echa yandeYa Tumpa ko pejäa oï oikuaa vaerä peaɨu ra yandeYa Tumpa opaete pepɨa ndive, jare opaete perekove ndive.
4Peiko yandeYa Tumpa jupíe, peipoɨu chugüi, peyapo iporookuai reta, peendu iñee reta, pemboete jare peyemboya jese.
5Jare jókuae ñeemombeúa ani ipaɨu katu vae tomano, echa pemboarakuaa peyemboyovaicho vaerä yandeYa Tumpa kotɨ, perenoe ɨvɨ Egipto güi jare pereepɨ yeokuaiasɨ katu güi vae, jare pemoñera pepia vaerä yandeYa Tumpa peokuai peyapo vaerä vae güi. Jökorai peekɨ ikavimbae pepɨte güi.
6Ërei nemoñera yave, nderɨkeɨ ani nderɨvɨ, ndesɨ imembɨraɨe, ani nderaɨ, nderayɨ ani nderembireko, ani ndevɨa-ïru, jei vɨari reve ndeve, reo vaerä remboete tumpa ambuae reta, nde reikuaambae jare neñemuñagüe reta oikuaambae vae,
7tëta reta ndeɨvɨrigua, köiño vae ani mombɨrɨ ndegüi vae itumpa reta, ɨvɨ jembeɨ güive ïru jembeɨ pe,
8agüɨye emborɨ katu jeko jare agüɨye eyeapɨsaka jese, agüɨye eiparareko emae jese, agüɨye tiparavete ndeve, agüɨye vi eikuaku;
9eyuka jókuae nunga. Jare nde tenonde epüa jese reyuka vaerä, jare nderaɨkue rupi opaete vae toyapi vi.
10Peyapi ita pe omano regua, oipota nemombia ndeYa Tumpa güi jeko pegua, nerenoe ɨvɨ Egipto güi, yeokuaiasɨ katu güi vae.
11Jökorai opaete Israel iñemuña reta toikuaa jare toipoɨu, jökorai ngaraa ma oime ikavimbae oyapo vae.
12Kia nunga tëta guasu reta yandeYa Tumpa omee peiko vaerä vae pe oyekuaa yave,
13kuimbae reta güɨröɨro Tumpa jare opa ombojopa tëtaɨgua reta, omoñera reve omboete vaerä tumpa ambuae, pe peikuaambae vae,
14peparandu kavi jare peeka mbegüe pe kavi. Jare oyekuaa yave jërakua vae añetete ko oyapo pɨ̈chɨi vae yave,
15pepïrimbae reve peyuka kɨsepuku pe jókuae tëta guasu pegua reta, pemboai reveDt 20.16-18; Jos 6.17. opaete pɨpegua jare peyuka reve opaete mɨmba.
16Jare pemboatɨ opaete mbaembae reta oka guasu pe jare peyatapɨ jese, opaetei tókai tëta guasu imbaembae ndive, mɨmba oyeapɨ jese vae re mɨmba oyeyukagüe opaetei oyeapɨ rami. Jókuae tëta guasu topɨta tëtagüerä, jare ngaraa ye ma oñemopüa.
17Agüɨye topɨta pepo pe mbae nunga okañɨtei vaerä vae, yandeYa agüɨye vaerä iyarasɨ pekotɨ, jaeño togüɨnoi mboroparareko peré, jare tomee jeta vaerä peñemuña, güɨrökuavee jee re peñemuñagüe reta pe rami,
18peyapo yave yandeYa Tumpa jei vae, peñovatu reve opaete mborookuai reta añave poyókuai jese peyapo vaerä sɨmbi vae yandeYa Tumpa jesa róvai.
Who We AreWhat We EelieveWhat We Do
2025 by iamachristian.org,Inc All rights reserved.
