ISAÍAS 45 - Guarani Bible with DC

YandeYa oyókuai Ciro

1YandeYa jei jembiparavo Ciro kotɨ.

Che ko aipoko araja ipo pe,

opaete tëtaguasu reta oñemomichi vaerä jae jeia re,

mburuvicha guasu reta re güɨnoi vaerä mbaepuere.

Che peYa aipeata öke reta Ciro japerä pe,

ngaraa kia ipuere oyokenda chugüi.

Jei ye vi chupe:

2“Che ajata nderenonde,

tape pɨ̈chɨi vae amboipe kavita,

öke reta jiero iyu vae pegua aakɨota

jare jiero öke imotätaka reta opata aakɨo kɨo.

3Che ameeta ndeve opaete mbaembae jepɨ vae, oñeomi oï vae,

oyekuaambaea pe oñeomi oï vae,

reikuaa vaerä, che ko jae ndeYa Israel iTumpa,

che ko roenɨi nderee pe vae.

4Aaɨu ramo cherembiokuai Jacob,

cherembiparavo, Israel iñemuña reta,

che roenɨi nderee pe,

jare amee ndeve tee yemboete pegua,

yepe tëi nde mbaetɨ chekuaa.

5Cheño ko jae opaete vae iYa, mbaetɨ yé ko ïru;

mbaetɨ yé ko ïru Tumpa chegüi.

Che ko amee mbaepuere ndeve ñeraro peguarä,

yepe tëi nde mbaetɨ chekuaa.

6Opaete ketɨ rupi:

Kuaraɨ oëa kotɨ,

kuaraɨ oikea kotɨ

oikuaa reta vaerä mbaetɨ yé ko ïru chegüi vae.

Cheño ko jae opaete vae iYa, mbaetɨ yé ko ïru chegüi.

7Che ko ayapo tembipe jare pɨtumimbi,

che ayapo mbɨakatu jare tembiporara.

Che, opaete iYa ko ayapo opaete kuae mbaembae.”

YandeYa opaete mbaembae iyapoa

8“Che ambouta ɨvate güi mbae jupi vae,

ambouta ama rami, ani ɨsápɨi rami.

Jare ɨvɨ omboresiveta,

yereroasayepe oñemuñata, temitɨ ia oñemuña rami,

jare mbae jupi vae, ipotɨta vi temitɨ rami.”

Che ndeYa ko ayapo opaete kuaekuae.

9¡Paravete jókuae oyoaka iYapoa ndive vae!

Tembiapo ñaeu pegua, oyovakeño ïru tembiapo ñaeu pegua reta ndive vae.

Ñaeu ngaraa omoë iñee iyapoa pe, jare jei chupe:

“¿Mbae pa reyapo?”

Ani ngaraa jei chupe: “Mbaetɨ reikatu rembaapo.”

10Paravete, kia jei yave tu pe: “¿Maera pa cheapo?”

Ani jei yave ichɨ pe: “¿Maera pa remaeño aa?”

11YandeYa, Tumpa Iyoambae Israel pegua,

ndeApoa jei körai:

“Peparandu cheve mbae oikota vae re.

¿Pe reta peekata pa cheve cheraɨ reta regua,

ani chemboeta pa kërai mbaembae ayapo vaerä?

12Che ko ayapo ɨvɨ jare pɨpegua kuimbae reta,

che ko ayapo ara jare amboyekuaa opaete pɨpegua reta.

13Che ko añono Ciro oporomoamɨri vaerä,

che amboipeta opaete tape chupe;

jae omopüa yeta tëta guasu chembae,

jare oyorata chembae vae reta tembipɨɨrä mombɨrɨ rupi ñogüɨnoi vae, okovarambae reve jese.”

YandeYa Imbaepuere yae ete vae jei jökorai.

14YandeYa jei körai Ciro pe:

“Egiptoɨgua reta iparavɨkɨ reta,

Etiopíaɨgua omaemee vae reta,

Sabáɨgua reta, kuimbae ipuku vae reta,

opata oñemee ndeve jare yogüɨrekota nderembiokuairä;

reñapɨtita opa reraja nderaɨkue,

oyetavatɨka retata nderóvai jare nemoñera retata körai:

‘Añetete oime Tumpa oï nde ndive,

mbaetɨ ïru Tumpa chugüi.’ ”

15Añetete, nde ko jae Tumpa oyeechambae,

Israel iTumpa, oporoepɨ vae.

16Opaete tovaicho reta oñemomichita jare imara yaeta opɨta.

Jare tumpa-raanga iyapoa reta imara yaeta opɨta.

17Ërei yandeYa oepɨta jekuae avei pegua tëtaguasu Israel,

jare ngaraa oñemomichiuka ani oñemomaraiuka reta opɨta jekuae avei rupi.

18Echa yandeYa, ara iyapoa,

Tumpa, ɨvɨ oyapo vae,

omopöra kavi jare oñono kavi jenda pe vae,

mbaetɨ oyapoiño,

oyapo ko oime vaerä pɨpe mbaembae;

jae jei körai:

“Che ko jae peYa, mbaetɨ yé oime ïru.

19Che mbaetɨ ko chemiari vɨari,

mbaetɨ ko cheñee amoë pɨtumimbía güi.

Mbaetɨ jae Jacob iñemuña reta pe:

‘Chereeka, mbaetɨ kia oïa pe.’

Che peYa ko, chemiari jupi rupi

jare isɨmbi rupi vae.

YandeYa jare tumpa-raanga reta Babilonia pegua

20Peyomboatɨ jare peyu

opaete tëtaguasu pegua reta jembɨregüe.

Mbaetɨ ko iyarakuaa jókuae tumpa-raanga ɨvɨra pegua

ovoɨ güɨroata vae reta,

jare oyerure reta jókuae oporoepɨ rapembae vae pe vae reta.

21Pemiari oyoupii jare peikuaauka oyoupe,

peparandu oyoupe:

¿Kia ra omombeu kuae regua iyɨpɨ güive voi?

¿Kia ra jei arakae güive voi ma?

Che ko, che peYa ko ayapo jókuae.

Mbaetɨ yé ko ïru Tumpa chegüi.

Mbaetɨ yé ko chegüi ïru Tumpa jupi vae jare oporoepɨ vae.

22Opaete ɨvɨ pegua reta, perovia cheré peasayepe vaerä,

echa che ko Tumpa, mbaetɨ yé ko ïru.

23Cheyé aeño ko añererökuavee,

cheyuru güi ko oë ñee jupi vae,

jare ngaraa ko opɨta oyembopombae:

Opaete vae oyetavatɨkata cheróvai,

jare cheree reño jei retata mbaembae oyapo vaerä vae,

24jare jei retata: ‘YandeYa reño ko oime jupi vae jare mbaepuere.’

Jare opaete oyemboyovaicho chekotɨ vae reta, oñemomaraiukata ko.

25Cheré opaete Israel iñemuña reta

oyembojupita jare oyemboeteta.”