LEVÍTICO 7 - Guarani Bible with DC

Mborookuai reta kërai oyeapo vaerä mbota ñɨ̈ro pegua jare mbaemboepɨ oñemoïru reve vae

1Jaeramiño jae kuae mborookuai kërai oyeapo vaerä mɨmba oyeyuka ñɨ̈ro pegua jare mbaemboepɨ oñemoïru reve vae. Kuae ko jae oñeñono tee kavi yae Tumpa peguarä vae.

2Mɨmba oyeyukagüe opaetei oyeapɨta vae oyeyukaa pe toñaseokɨ̈ti mbota ñɨ̈ro pegua; jare jugüɨgüe pe toñapiramo mɨmba oyeyuka oyeapɨ jese vae iyɨke yɨke re.

3Jare tomee opaete ikɨragüe: Júguai ikɨragüe jare opaete ikɨra oñova ichuri churigüe vae,

4ipɨ̈rɨkɨti reta jare ikɨragüe oñova vae, jare ikupepɨte japɨpe ikɨragüe oï vae, jare ipɨ̈rɨkɨti reta ndive toekɨ iyambia oï ipɨa re vae.

5Jare sacerdote toapɨ mɨmba oyeyuka oyeapɨ jese vae re mbota oyeapɨ vae cheve. Jae ko cheɨ̈ro vaerä mbaeyoa re vae.

6Opaete sacerdote reta tou joko güi oñeñono teea pe; kuae ko mbae oñeñono tee kavi yae Tumpa peguarä vae.

7Mɨmba oyeyuka mbaeyoa re vae rami ko mɨmba oyeyuka ñɨ̈ro peguarä vae; metei mborookuaiño togüɨnoi reta: Topɨta sacerdote imbaerä, jókuae mbota oyapo cheɨ̈ro vaerä mbaeyoa re vae pe.

8Jare sacerdote omee yave kia nunga vae re mɨmba oyeyuka opaetei oyeapɨ vae, jókuae mɨmba ipiregüe topɨta sacerdote imbaerä.

9Jaeramiño vi opaete mbota oyemboyɨ horno pe vae, jare takɨpe pe ani ɨvɨyapepo pe vae, topɨta sacerdote omee mɨmba oyeyuka oyeapɨ jese vae re vae pe.

10Jare opaete mbota temitɨ jäɨ ikuigüe: Trigokúi otinigüe ani oyemómbɨu olivo iasaite pe vae, topɨta Aarón iñemuña reta imbaerä, oyovake toñemee chupe reta.

Mborookuai reta kërai oyeapo vaerä mɨmba oyeyuka yembopɨakatu peguarä vae

11Jae kuae mborookuai reta, kërai oyeapo vaerä mɨmba oyeyukagüe yembopɨakatu peguarä oñemee cheve vae:

12Oñemee yave mbota yasoropai pegua Tumpa pe, toñemee mɨmba oyeyukagüe ndive mbɨyape oyembovumbae olivo iasaite pe oyemómbɨu vae, jare mbɨyape ipïreriasɨ vae oyembovumbae olivo iasaite pe oñeapiramo vae, jare mbɨyape trigokúi ipɨuasɨ vae olivo iasaite pe oyemómbɨu vae.

13Mbɨyape oyembovugüe ndive toñemee mɨmba oyeyukagüe yasoropai pegua jae ko yembopɨakatu pegua oñemee Tumpa pe vae.

14Jare opaete mbota reta oñemee vae güi, toñemee mbota oñererökuavee oñemee cheve vae, topɨta sacerdote oñapiramo mɨmba oyeyukagüe yembopɨakatu pegua jugüɨgüe pe vae imbaerä.

15Jare mɨmba oyeyukagüe yembopɨakatu pegua isoo yasoropai pegua toyeu jókuae ara oñemee oï yave; agüɨye toeya kërai ave yepe ïru ara peguarä.

16Ërei omee yave mɨmba oyeyukagüe iñererökuavee ombopo vaerä ani ipɨa-kɨ̈reɨ ngatu rupi vae, toyeu jókuae mbota jókuae ara oñemee yave, jare jembɨregüe toyeu pɨareve pe.

17Jare mboapɨ araa pe oimeño jókuae soo yave toyeapɨ.

18Ërei mboapɨ araa pe oyeu yave jókuae mɨmba oyeyukagüe yembopɨakatu pegua isoogüe, jókuae mɨmba oyeyuka oñemee vae, Tumpa güɨröɨrota jare ngaraa vi oyepapa omee vae pe; pɨ̈chɨi yae ko, jare jókuae soo jou vae toiporara.

19Oime yave mbae ikɨa vae oya jókuae soo re, agüɨye toyeu; toyeapɨ tata pe.

Opaete ikɨambae oï vae ipuere jou soo.

20Ërei che peYa jóvai ikɨa oï reve jou yave jókuae mɨmba oyeyukagüe yembopɨakatu pegua isoogüe chembae, toyemombo ete kavi jëtara reta ipɨte güi.

21Jaeramiño vi oime yave opoko mbae ikɨa vae re, japicha ikɨagüe re, ani mɨmba oyeumbae vae re, ani oipotagüe mbae pɨ̈chɨi ikɨa vae re, jare jökorai reve jou yave mɨmba oyeyukagüe yembopɨakatu pegua chembae, jókuae jou vae toyemombo ete kavi jëtara reta ipɨte güi.”

Mborookuai reta mɨmba ikɨragüe regua jare jugüɨgüe regua

22Ërei yandeYa jei ye Moisés pe:

23“Ere Israel iñemuña reta pe: Agüɨye etei peu toro ani vecha kuimbae taɨrusu vae ani kavara ikɨragüe.

24Mɨmba omanoiño vae ani mɨmba pochɨ vae ñana rupigua jembia ikɨragüe, peiporu oipotagüe mbae peyapo vaerä, ërei agüɨye peu.

25Echa oipotagüe jou yave mɨmba ikɨragüe oyeapɨ oñemee cheve vae, jókuae jou vae toyemombo ete kavi jëtara reta ipɨte güi.

26Jaeramiño vi oipota rupi peikoa rupi, agüɨye peu güɨra reta jugüɨgüe ani mɨmba reta jugüɨgüe.

27Oipotagüe jou yave mbae nunga tugüɨ, toyemombo ete kavi jëtara reta ipɨte güi.”Mbaembae reta oñemee sacerdote pe vae

28Ërei YandeYa jei Moisés pe:

29“Ere Israel iñemuña reta pe: Mɨmba oyeyukagüe yembopɨakatu pegua cheve omee vae, togüeru cheróvai.

30Togüeru mbota yembopɨakatu pegua oyeapɨta cheróvai vae, ikɨragüe togüeru ipɨtiagüe ndive togüɨrökuavee tomee mɨmba oyeyukagüe oñererökuavee oñemee cheve vae.

31Jare sacerdote toapɨ ikɨragüe mɨmba oyeyuka oyeapɨ jese vae re, ërei ipɨtiagüe topɨta Aarón peguarä jare iñemuña reta peguarä.

32Jare tomee sacerdote pe mɨmba oyeyukagüe yembopɨakatu pegua güi iu iyakatu kotɨgua, mbota oñererökuavee oñemee cheve vae.

33Jare topɨta jókuae sacerdote Aarón iñemuña reta güi omee mɨmba jugüɨgüe jare ikɨragüe vae imbaerä.

34Echa Tumpa oekɨ mɨmba oyeyukagüe reta yembopɨakatu pegua güi, Israel iñemuña reta omee vae güi ipɨtía oñererökuavee oñemee vae, jare iugüe mbota oñererökuavee oñemee cheve vae; kuae reta omee sacerdote Aarón peguarä jare iñemuña reta peguarä, mborookuai jekuae avei pegua toiko Israel iñemuña reta peguarä.”

35Jae ko kuae tembíu Aarón jare iñemuña reta imbaerä, mbota reta oyeapɨ cheve vae, jókuae ara jae oñono tee chesacerdoterä yave güive.

36Kuae mborookuai che amee chupe reta, jókuae ara jae reta oyeparavo Israel iñemuña reta güi yave güive, mborookuai jekuae avei pegua toiko peve jare peñemuña yoapɨ reta pe.

37Jae ko kuae mborookuai mɨmba oyeyukagüe opaetei oyeapɨ vae reta regua, mbota temitɨ jäɨgüe regua, mɨmba oyeyukagüe mbaeyoa regua, jare mɨmba oyeyuka ñɨ̈ro pegua regua, jare oñeñono tee Tumpa pe vae regua jare mɨmba oyeyukagüe yembopɨakatu regua.

38Kuaekuae re ayókuai Moisés ɨvɨtɨ Sinaí re, jókuae ara amee mborookuai Israel iñemuña reta pe, omee reta vaerä mbota che peYa pe, ñuu Sinaí pe.