EZEQUIEL 41 - Guarani Bible with DC

1Javoi chereroike tupao pe, jare ojäa okɨta reta, güɨnoi ipɨguasugüe mboapɨ metro jare jovaicho kotɨ jaeramiño vi, jökorai ipɨgüe tupao.

2Öke ipɨgüe güɨnoi pandepo metro, iyɨke ñavo güɨnoi mókoi metro y medio ipɨgüe; opaete reve tupao japɨpe pukugüe güɨnoi veinte metro jare ipɨgüe güɨnoi payandepo metro.

3Jare oasa tupao jugua pegua cuarto kotɨ, jare ojäa öke jokɨta reta; okɨta ñavo güɨnoi metei metro yandambusugüe jare mboapɨ metro y medio ipegüe; öke güɨnoi mboapɨ metro ipɨgüe.

4Ojäa vi jókuae cuarto ipɨgüe jare pukugüe opaete reve, güɨnoi payandepo metro päve. Jare jei cheve: “Jae ko kuae tupao japɨpe oñeñono tee kavi yae ete vae.”

Cuarto reta oï tupao joguambɨ re vae

5Jaɨkue rupi ojäa tupao joguambɨ ikatu rupi, mboapɨ metro güɨnoi. Jare cuarto reta oï jókuae oguambɨ re, güɨnoi mókoi metro ipɨgüe, oyere tupao joguambɨ re.

6Kuae cuarto reta ñogüɨnoi tupao joguambɨ re vae, mboapɨ ñesɨro oyoarambo ñogüɨnoi; ñesɨro ñavo oï treinta cuarto, tupao joguambɨ oike äve vae re ñogüɨnoi kuae cuarto reta jare mbaetɨ oguambɨ etei oyoo.

7Cuarto reta ɨvate ete ñogüɨnoi vae ipɨguasu ko, yeupika oyere yere vae ojo oväe joko pe o japɨpe rupi, jökorai ipuere oyeupi o ɨvɨkotɨgua güi mbɨte pegua pe jare iárambo ete oï vae pe.

8Jare amae tupao ɨvategüe re opaete iyɨ́vɨri rupi, cuarto reta iguapɨka ipɨgüe güɨnoi mboapɨ metro.

9Cuarto reta joguambɨ ikatu kotɨgua güɨnoi mókoi metro y medio yandambusugüe, jare kuae cuarto reta jóvai rupigua ipombae, oyovake tupao japɨpe pegua ndive.

10Kuae cuarto reta jóvai opɨta ipombae vae, güɨnoi payandepo metro ipɨgüe oyere tupao re.

11Cuarto ñavo jöke güɨnoi oka ipombae kotɨ, metei öke oï ɨvɨtuguasu kotɨ jare ïru öke oï arayevɨ kotɨ, jare ipombae opɨta vae güɨnoi mókoi metro y medio opaete oguambɨ iyɨ́vɨri.

O kuaraɨ oikea kotɨ oï vae

12O oï ipombaea jóvai vae, kuaraɨ oikea kotɨ oï vae, güɨnoi treinta y cinco metro ipɨgüe jare cuarenta y cinco metro ipukugüe; joguambɨ güɨnoi mókoi metro y medio yandambusugüe.

Tupao ipɨgüe

13Jaɨkue rupi ojäa tupao, güɨnoi cincuenta metro pukugüe; jare ipɨgüe opaete reve joka jare joguambɨ ndive güɨnoi cincuenta metro vi.

14Tupao jova jare joka kuaraɨ oëa kotɨgua oñekëse vae, güɨnoi cincuenta metro pukugüe.

15Jare ojäa o oï tupao ikupe kotɨ vae, oka oñekëse vae jóvai, jare oguambɨ reta jovaicho reve; opaete reve güɨnoi cincuenta metro.

Tupao regua

Tupao japɨpe jare oka michi vae ikorero reta,

16öke reta jare iventana raɨ reta, jare cuarto reta mboapɨ ñesɨro oyoarambo ñogüɨnoi vae, oñeova ɨvɨra pe, ɨvɨ güive iventana rupi vae, jare ventana reta ave oñeova vi ɨvɨra pe.

17Öke iárambo rupi, o japɨpe rupi jare ikatu rupi, opaete oguambɨ japɨpe jare ikupe rupi oñeova vi.

18Jare oyoo oyapo jese araɨgua querubín iä reta jare karandaɨ iä reta; kuae reta oñopäu päu ñogüɨnoi, araɨgua iä karandaɨ iä ndive; araɨgua querubín iä ñavo güɨnoi mókoi jova;

19metei jova kuimbae jova rami vae omae karandaɨ kotɨ; jare ïru jova yaguapope jova rami vae omae ïru karandaɨ kotɨ. Jökorai oyere tupao re.

20Ɨvɨ güive öke iárambo rupi opaete tupao joguambɨ re oyapo araɨgua querubín iä reta jare karandaɨ iä reta.

21Tupao jokɨta reta ñavo, güɨnoi irundɨ iyɨke; jare tupao japɨpe oñeñono tee kavi yae ete vae jova oyovake jenonde oï vae jova ndive.

Ikäti kavi vae incienso oyeapɨ jese vae

22Ikäti kavi vae incienso oyeapɨ jese vae ɨvɨra pegua, güɨnoi metro y medio ɨvategüe jare metei metro ipɨgüe. Güɨnoi ekina reta, jare iguapɨka jare iyɨke yɨke ɨvɨra pegua, jare jei cheve: “Jae ko kuae mesa yandeYa jóvai oï vae.”

Öke reta

23Tupao jare japɨpe oñeñono tee kavi yae vae, güɨnoi mókoi jöke.

24Öke ñavo re oï mókoi jöke oyepea päve vae; metei jöke oyepea oyeapa vae jare jovaicho jökorai vi oyepea.

25Tupao jöke reta oyoo oyapo araɨgua querubín iä vae reta jare karandaɨ iä vae reta, joguambɨ re ñogüɨnoi rami; jare oka pe ikatu kotɨ oï metei öke ikorero ɨvɨra pegua.

26Oime ventana raɨ reta, jare karandaɨ iä reta oyeapo korero kotɨ; jökoraiño vi oï cuarto reta jare öke reta tupao pe.