ISAÍAS 15 - Guarani Bible with DC

Tëtaguasu Moab maratuta vae regua

1Tëtaguasu MoabIs 25.10-12; Jer 48; Ez 25.8-11; Am 2.1-3; Sof 2.8-11. maratuta vae regua:

Pɨ̈tu yave ko tëta guasu Ar Moab pegua opa oyemboai,

jayave ko Moab kïrii opɨta.

Pɨ̈tu yave ko tëta guasu Kir Moab pegua opa oyemboai,

jayave ko Moab kïrii opɨta.

2Opaete vae reta, tëta Bayit pegua jare tëta Dibón pegua oyeupi oyaeo,

jae reta imbaemboetea ɨvɨtɨ re oimea pe.

Moab pegua reta oyaeo tëta Nebo jare tëta Medeba ikañɨtei re.

Opaete vae reta oñapiasɨta ia jare jendɨvaa ipɨatɨtɨ güi.

3Temimonde mbɨatɨtɨ pegua omonde retata oguata kaye rupi.

Jo iárambo jare joka guasu rupi oyaeo retata,

oyemboasɨkatu yaeta oyaeo reta.

4Tëta Hesbón jare Eleale pegua reta jäseta;

tëta Jahaza pe oyeenduta jäse reta;

jókuae re oyaeota kuimbae ñeraro regua Moab pegua reta,

okɨɨye yae retata.

5Cheräse Moab pegua reta re;

echa joko güi otekuarai vae reta opa yogüɨraja oväe Zoar pe,

guakiya mboapɨ año vae rami.

Ɨvɨtɨ Luhit ikúa rupi oyeupi retata oyaeo reve,

jare jäseta oyaeo reta yogüɨraja Horonaim kotɨ tape ojo vae rupi.

6Tëta Nimrim pegua ɨ ave opata tɨpa,

jare opata yɨpi ñana reta,

jare opata ipiru jokɨ pɨau tëi vae,

ngaraa etei jembɨre mbae jokɨ vae.

7Jáeramo, mbaeyekou jae reta güɨnoi vae jare oñovatu vae,

opata güɨraja reta ɨ̈aka raɨ sause jeta oimea kotɨ.

8Echa yaeo opa omotɨnɨe ɨvɨ Moab,

Eglaim pe ojo oväe jae reta iyaeo,

jare tëta Beer-elim pe.

9Jare tëta Dimón pegua ɨ̈aka tɨnɨeta tugüɨ pe;

echa aruta tëta Dimón re mbae ikavimbae yae vae.

Otekuarai tëi Moab güi vae opata jou yaguapope reta,

jókuae jembɨreño tëi vae reta.