TOBIT 6 - Guarani Bible with DC

Jevae oyembojeonde vae

1Kunumi ojo araɨgua ndive. Jare yaɨmba oë vi ojo jae reta ndive. Omboɨpɨ oguata reta, ojo oke reta ɨ̈aka Tigris jembeɨ pe.

2Jare kunumi ogüeyɨ ojo ɨ̈aka pe ipɨ oyoe. Jare metei jevae tuicha vae ochaguarepɨ jese ɨ güi oipota kunumi raɨ ipɨ jou chugüi. Jare ɨvate omoäse.

3Jaema araɨgua jei chupe:

—¡Eipɨɨ jókuae jevae, agüɨye epoi chugüi!

Jaema kunumi oipɨɨ jókuae jevae jare güɨnoe ikatu pe.

4Joko güi araɨgua jei ye chupe:

—Embovo jare eekɨ chugüi ipɨ̈pia, ichörokoko, jare ipɨa, moa ikavigüe ko. Ichurigüe opa emombo.

5Jaema kunumi raɨ ombovo jókuae jevae jare oekɨ chugüi ipɨ̈pia, jare ipɨa. Joko güi michi omboyɨ jare jou. Jare ïru reta opa omoembochɨ jare oñovatu.

6Jare opa ye ojo yoapɨ reta, ojo seri oväe reta Media pe.

7Jaema kunumi oparandu araɨgua pe:

—Chëi Azarías, ¿mbae peguarä yera ikavi jevae ipɨ̈piagüe jare ipɨagüe?

8Jare jae jei chupe:

—Kuae ikavi ko aña kia re oya pegua, jökorai yave jaema ko yaapɨ jevae ichörokoko jare ipɨagüe, jare jaemai ko osɨrɨta chugüi ngaraa yé oya jese.

9Jare oime kia jësatu yave kuae yaipichɨta jesa re jare yaipeyuta jaema ko okuerata.

Rafael imiari Sara re Tobías pe

10Ou reta ma oväe Media pe yave, jae ko köiño ma güɨnoi reta Ecbatana.

11Jaema araɨgua Rafael jei kunumi pe:

—Chëi Tobías.

—¡Mbae pa reipota! —jei Tobías.

Jare araɨgua jei chupe:

—Añave kuae pɨare yandepuere yapɨta Ragüel jëta pe. Jae ko nerëtara, oime tayɨ Sara jee vae.

12Jae ko tayɨ jaevaeño vae. Nde oime renoi mbaepuere rereko vaerä, jare opɨta vaerä ndeve opaete tu imbaeyekou reta. Jókuae kuñatai täta yarakuaa katu, jäta ngatu jare ikavi vi. Jare tu kuimbae ikavigüe ko.

13Nde ndepuere reporopɨɨ jese. Eyeapɨsaka cheré, chëi kuae pɨ̈tu che chemiarita tu ndive, omee vaerä nderembirekorä. Jaema yayu ye Ragues güi yave yamboareteta remenda jae ndive vae. Che arovia Ragüel ngaraa ñäteɨ omee ndeve, jare ngaraa vi kia omee güɨreko. Echa jökorai yave jae oyeyukaukata ko. Mborookuai Moisés oikuatía vae pe jei rami, jaema jae oikuaa kavi ko oï, nde oime renoi jupi remenda vaerä jae ndive. Jaema eyeapɨsaka cheré chëi kuae pɨare voi ñanemiarita jókuae kuñatai re. Jaema yayerova ye ma Ragues güi yave, remendata jae ndive jare yamboareteta nemenda jaema joko güi yarajata nerëta pe.

14Jare Tobías jei araɨgua Rafael pe:

—Chëi Azarías, che aikuaa kuae kuña omenda tëi ma chiu kuimbae ndive, jare jókuae pɨ̈tu omenda yave omano reta chugüi, jókuae jo pe oyata tëi ma jese yave, jare aikuaa metei aña ko oyuka chugüi.

15Jare jókuae aña chupe mbaetɨ mbae oyapo, ërei kia nunga oya jese yave jaemai oyuka. Jáeramo ko che akɨɨye vi chugüi cheyuka vaerä. Jare jökorai yave cheru jare chesɨ tätata ko oiporara yogüɨreko chereko pegua, echa che jae ko imichia jaevaeño vae, mbaetɨ yé ko ïru imichia reta oñotɨ reta vaerä kuri.

16Jare araɨgua jei chupe:

—¿Nemaenduaä yandeRu jei ndeve vae re? ¿Nde remendata ko peñemuña reta iñemuña ndiveño vae? Chëi, eyeapɨsaka: Agüɨye ekɨɨye jókuae aña güi, eporopɨɨño jese chëi. Che arovia kuae pɨ̈tu voi omeeta ndeve rereko vaerä.

17Jaema reike ma reo jo pe yave, eipɨɨ jevae ipɨagüe jare ichörokokogüe, jare eñono incienso oyeapɨa pe jaema jókuae ipichegüe oñemoaita ko jare aña jókuae oëtu yave otekuaraita ko jare ngaraa ye ma oya jese.

18Jaema ndei peya oyoe mbove pepüa peyerure, jare peiporu yandeYa ɨvate oï vae pe tapeparareko jare tapeangareko. Jaema agüɨye pekɨɨye. Echa kuae ndevegua ñomai Tumpa ombou iyɨpɨ güive. Jaema nde rembogüerata. Jare ojota nderupíe, remomembɨta jare tätata reaɨu. Jayave agüɨye eyemongeta.

19Jare Tobías oendu jókuae Rafael jeigüe yave, Sara jae ko ikuña vae jare tu ikuña vi, täta oaɨu ipɨa pe jare oipota vi ipɨa pe.