2 MACABEOS 2 - Guarani Bible with DC

1Kuatía reta rupi, tenonde yaecha rami, ñee imoërakuaa Jeremías, oyókuai iɨvɨ oeya vae reta güɨraja vaerä tata,

2jare vi, omee chupe mborookuai guasu, jare oyókuai agüɨye vaerä opia Tumpa iporookuai reta güi, agüɨye vaerä ma oyembotavɨuka oecha yave tumpa-raanga oro jare korepoti pegua, ani ramo ipöranga reta.

3Omee vi jeta ïru ñee chupe reta agüɨye vaerä opia mborookuai guasu güi.

4Oyekuatía vi oï jókuae tupapire pe, kërai ko jókuae ñee imoërakuaa Tumpa jei chupe rami, oyeupi ɨvɨtɨ re, karamboe yave Moisés pe Tumpa oechauka ɨvɨ chupea pe, jokotɨ ojo yave güɨraja tenda Tupa ndive ñanemiari pɨpe vae jare arca ñomoïru pegua.

5Ojo ma yave oväe joko pe, Jeremías oväe metei ɨvɨkua jare joko pe oñomi arca ñomoïru pegua, jaeramiño vi tenda jare ita incienso oyeapɨ jese vae, joko güi oyokenda oeya jape.

6Amogüe reta oyerova ye taɨkue rupi omokañɨmaa vaerä jókuae yaikea, ërei mbaetɨ ma oväe reta chupe.

7Jeremías, oikuaa yave kuae re, oñee chupe reta körai: ‘Jókuae oï vae opɨtata ko oï oyekuaa mbae ramiño Tumpa oipararekoye regua omae jëta ipo retare jare opaye omboatɨ regua.

8Jayave ramo yandeYa oechauka yeta jókuae mbae reta; jare oyeechata yandeYa imbaeyekou jare amapɨtu reta Moisés oiko yave oyekua rami jare Salomón yandeYa pe oiporu yave tupaore jae imbaeyekou oyekua rami.’

9Imiari kuae tupapire pe körai: Iyarakuaa katu vae Salomón, güɨrökuavee mbaeyuka ñeñono tee pegua jare tupao omboarete,

10Moisés oyerure yave yandeYa pe, ogüeyɨ tata ara güi oapɨ jembiyuka rami, Salomón oyerure vi jare oa tata ara güi oapɨ opaetei mɨmba reta oyeyukagüe.

11Moisés jei jókuae ara: ‘Mbaeyuka oñererökuavee mbaeyoe re vae mbaetɨ oyeu ramo, opa tata oapɨ.’

12Salomón jaeramiño vi, oyapo juri ara arete.

13Opaete kuae kuae reta imiari Nehemías jembikuatía pe, jare imiari reta vi kërai jae omboatɨ jeta tupapire reta imiari mburuvicha guasu reta re vae, ñee imoërakuaa reta oikuatiagüe, David iyemongoi reta jare mburuvicha reta itupapire mbota regua.

14Jaeramiño vi, Judas omboatɨ opaete tembikuatía opa oñemoai ñoraro jeko pegua vae, añave rogüɨnoi ma orepo pe.

15Pe peipota yave pemongeta, pembou kia güɨraja vaerä.

16Añave yayeapo katu ma ñaï yaikɨayoe vaerä tupao ramo, roikuatía peve peyapo vaerä vi kuae arete,

17Tumpa oepɨ ma jëta, jare omee opaete pe imbaeyekou, iɨvɨ guasu jare sacerdote pegua mbaravɨkɨ, echa jae yayemboya ma ikotɨ,

18mborookuai guasu rupi oñererökuavee rami, jáeramo, ore roäro chugüi iporoparareko yandemboatɨ vaerä iyé ɨvɨ maraëɨ pe, opaete ɨvɨ güi yandemboatɨ, echa yandeyora ma jeta maemegua güi jare oikɨayoe ma tupao.”

Iyapoa iñemongeta

19Jasón Cirene pegua oikuatía kuae tembikuatía Macabeo jare jëtara reta regua, tupao guasu oyekɨayoe vae re, mɨmba oyeyuka oyeapɨ jese vae oñeñono tee vae regua.

20Ñoraro oyeapo mburuvicha guasu Antíoco Epífanes jare taɨ Eupátor ndive vae re,

21jaeramiño vi Tumpa iporomborɨ jeta oechauka kereɨmba reta kotɨ judas jekore oñoraro reta yogüɨreko vae re, echa jae reta yepeko mbovɨ, ërei opa ko ombosɨi jovaicho reta.

22Opaye opɨ̈ro reta tupao täta jërakua oipota rupi vae; jare güɨroasayepe reta vi tëta guasu Jerusalén, jare omupua reta ye mborookuai reta jaema opata tëi oyemboai oï vae, echa yandeYa täta iporerekua jese reta.

23Jaema ore roechata kërai rombochutumí vaerä kuae tembikuatía, Jasón pandepo tupapire pe oikuatía vae, royapo vaerä metei tupapire peño.

24Roecha ramo vi jeta yaete jare yavaita, kia ñavo oipota mboki pe kavi oecha kuae miari regua vae pe.

25Romboyopara kavita roikuatía, agüɨye vaerä omongeta vae reta ombokangɨ, roikuatiata ñee ovevɨi vae pe agüɨye vaerä yavai kia iñäka pe opɨta jare ipöra vaerä vi opaete vae pe.

26Romoäturi vaerä kuae kuatía guasu, tuicha yavai oreve, jáeramo jeta roparavɨkɨ jese;

27kia arete oyapota yave ikɨ̈reɨ opaete vae ombopɨakatu vae rami ko oreve. Ërei roipota ramo opaete vae ipɨakatu opɨta, mbaetɨ rogüɨroakɨ kangɨ.

28Yaeyaño mo räri miariregua ma ipuere vaerä kuri mboki pe kavi opa imiari jese, oikuauka kavi vaerä yandeve kërai yamboachutu vaerä jae oipota rami.

29Yaecha rami metei oapoa oyemambeko opa vaerä o oyapo oï vaerä, jare güɨraja oeya o imotía reta pe jae reta ma opa vaerä omopora oñomo jókuae o, jaema kuae oreparavɨkɨ jökoraiño vi ko oë oreve.

30Kuae miari regua iyapoa aeñoko oikuaa rupi opata kuri imiari kavi kuae re, ombokuta imiari jese, jare oeya mbae reve kërai yepe;

31ërei jókuae miari re oiparavoño imiari vae reta ngaraa puku imiari jese oipotata ko mboviño imiari jókuae teko re.

32Jayave, yamboɨpɨ, ñanemiari, yamboyoapɨ mbae reve yaegüe ma vae; echa jaekaviä ko yambopuku voi vaerä miari jare jokogüi yamboachutu vaerä ñanemiarieteta jese vae.