1Pɨareve pe ndeimboveasɨ Josué jare opaete Israel iñemuña reta opüa opa yogüɨraja Sitim güi, jare yogüɨraja oväe ɨ̈aka Jordán pe, joko pe oyembojeyupa reta ndei oasa ɨ mbove.
2Jare mboapɨ ara oasa güire, mburuvicha reta oë oguata teyupa rupi,
3jare oyókuai reta opaete vae, jei reta reve: “Peecha käjou yandeYa Tumpa iporogüɨrökuavee päve pegua, jare ivoɨa sacerdote, Leví iñemuña reta güɨraja yave, pe reta peë peïa güi jare peguata jaɨkue.Nm 10.33-36.
4Jökorai peikuaa vaerä kerupi peo; echa pe reta mbaetɨ peikuaa kuae tape. Ërei agüɨye peya käjou re, metei kilómetro rupi peiko jaɨkue; agüɨye peya jese.”
5Jare Josué jei opaete vae pe: “Peñeñono tee Tumpa pe, echa pɨareve yandeYa oyapota mɨakañɨ pepɨte pe.”
6Josué jei sacerdote reta pe: “Peipɨɨ käjou morogüɨrökuavee päve pegua jare peasa opaete vae jenonde.”
Jare sacerdote reta oipɨɨ käjou morogüɨrökuavee päve pegua jare yogüɨraja opaete vae jenonde.
7Jayave yandeYa jei Josué pe: “Kuae ara güive rombotuicha yaeta opaete Israel iñemuña reta jóvai, oikuaa reta vaerä Moisés ndive aiko rami nde ndive aiko vae.
8Nde eyókuai sacerdote reta käjou morogüɨrökuavee päve pegua güɨraja vae reta oväe ma yave ɨ̈aka Jordán jembeɨ pe, toike reta toyemboɨ ɨ mbɨte pe.”
9Jayave Josué jei Israel iñemuña reta pe: “Peyu jare peyeapɨsaka peYa Tumpa iñee re.
10Kuae rupi peikuaata Tumpa oikove vae oime oï pepɨte pe vae, jare jae omoëta omombo perenonde güi cananeo reta, heteo reta, heveo reta, ferezeo reta, gergeseo reta, amorreo reta jare jebuseo reta.
11Mase, käjou morogüɨrökuavee päve pegua, yandeYa opaete ɨvɨ iya imbae oasata perenonde ɨ̈aka Jordán.
12Jáeramo añave peiparavo doce kuimbae Israel iñemuña reta güi, ñemuña ñavo güi peiparavo metei kuimbae.
13Jare sacerdote reta, yandeYa opaete ɨvɨ iya ikäjou güɨraja vae reta ipɨ ñäkɨ ma yave, ɨ̈aka Jordán pegua ɨ oyemboyaota; echa ɨvate kotɨ güi ɨ ou vae oyemboatɨta meteia pe.”
14Opaete vae reta opa güire yogüɨraja teyupa güi oasa reta vaerä ɨ̈aka Jordán, sacerdote reta güɨraja käjou morogüɨrökuavee päve pegua, opaete vae reta jenonde,
15jare sacerdote reta käjou güɨraja vae reta oike ramboeve ɨ̈aka Jordán pe, ipɨ ñäkɨ ɨ jembeɨ pe (echa ɨ̈aka Jordán oyepɨyereñoi ko jembeɨ rupi mbaarɨvo iara pe),
16jare ɨ ou ɨvate kotɨ güi vae opa opɨta meteia pe mombɨrɨ tëta Adam güi, tëta Saretán iyɨpɨ pe oï vae; jare ɨ ogüeyɨ Arabá, Ɨguasu Jembochɨ vae kotɨ vae opa tɨpa. Jökorai ɨ oyemboyao; jare opaete vae oasa Jericó oïa re katu.
17Ërei sacerdote reta, yandeYa ikäjou morogüɨrökuavee päve pegua güɨraja vae reta ñogüɨnoi otini vae pe, ɨ̈aka Jordán mbɨte pe, opaete vae oasa regua; jare opaete Israel iñemuña reta oasa ɨvɨ otini vae rupi.
Who We AreWhat We EelieveWhat We Do
2025 by iamachristian.org,Inc All rights reserved.
