SABIDURÍA 8 - Guarani Bible with DC

1Jae oñemoai täta rupi opaete ɨvɨ rupi,

jare omae kavi yae opaete mbae re.

Arakuaa re ko oï opaete mbaeyekou reta

2Che aaɨu jare aeka chetaɨrusu güive,

aipota amae jese

jare aipota cherembireko ra.

3Jae iyɨpɨ tuichagüe reta güi vae ko omboyekuaa echa oiko Tumpa ndive

jare opaete vae iTumpa oaɨu jeko pegua vi.

4Jae oikuaa Tumpa iyemongeta omboyekuaambae vae

jare jae oiparavo oyapogüe.

5Jare kuae yaiko vae pe mbaeyekou ko jaema ikavi vae yave,

¿kia pa ko ma oikatu arakuaa güi, opaete mbae oyapo vae güi?

6Jaema pɨarakuaa katu vae ko opaete mbae oyapo yave,

¿kiata yera, arakuaa ñomai ko, opaete mbae oyapo vae?

7Kia ñavo mbae jupi vae rupi oiko yave,

oupitɨta ko arakuaa iyapɨ pe.

Echa arakuaa ko oporomboe teko yambogüɨ vaerä jare yandepɨarakuaa vaerä,

jupi rupi yaiko vaerä jare ñanerëgua mbae vaerä,

jókuae ko jaema ikavita kuimbae reta pe

oipotagüe ïru mbae güi jese yaiko vaerä vae güi.

8Kia ñavo oipota ma mbae oikuaa yave,

jae ko oikuaa mbae oasagüe jare oikuaa vi mbae outa kuri vae,

jae oikuaa vi ñee mbaembojaanga pegua

jare ipuere omee ñee mbarandu yavai vae pe,

oikuaauka vi mbae mɨakañɨ pegua vae oikota vae

jare mbaembae ko oikota iara arae pe vae.

9Jókuae ramo ayapo oiko vaerä oiko che ndive,

aikuaa ramo vi kuri aikoñota aiko jae ndive

jare chembopɨakavi chepɨatɨtɨ aï yave.

10“Yasoropai ayapo chupe —jae ayemongeta— chetuichata kia reta ipɨte rupi,

jare, yepe che taɨrusu, okuakuaagüe reta chemboeteta ko;

11jupigüe ayapo yave jaema aechaukata chearakuaa ko vae,

jaema jayave tuicha vae reta ipɨakañɨta cheré.

12Che chekïrii yave, oeka retata ko cheñee amoë vae;

cheyuru apopira ma yave, oyeapɨsaka retata cheré;

jaema puku chemiari yave, ipɨakañɨ reve oyeapɨsaka retata cheré.

13Yasoropai arakuaa pe, aiko pukuta ko kuri

jare aeyata taɨkuegua reta imaenduapambae cheré vaerä.

14Aikota tëta ruvicharä jare tëta guasu reta oikota jaeä re;

15yavaete katu imbaeyuvanga vae reta okɨɨyeta ko miari cheregua oendu yave;

cherëta ipo reta pe chepɨakavi yaeta jare, ñoraroa pe, jëiata.

16Ayu ye ma cherëta pe yave, iyɨpɨ pe ko aputuuta,

echa jae ndive ñaï vae mbaetɨ ko yandembogüérai

jare mbaetɨ ko yaiporara jae ndive yaiko yave;

jare ko, yaikuaa yaja yaiko mbae ikavi vae jare yerovia.”

17Ayemongeta ma opaete kuae re yave,

ou aikuaa ñamano mbae vaerä jae yepe

ñañemoëtara yave arakuaa ndive.

18Jare ovɨa yanderé yave omeeta täta yayekou yaiko vaerä.

Aikuaa vi yayapo yave opaete mbae jae jeigüe vae

ñaväeta chupe mbaeyekou opambae vae,

ñañemoëtara yaiko jae ndive yave ñaväeta vi chupe pɨarakuaa,

jare ñanemiari jae ndive yave ñaväeta yandetuicha vaerä.

Jókuae ramo ko apoko aeka

areko vaerä che ndive.

19Che chemichi jayave, ërei chereko kavi aeño ma,

areko yepe tekove ikavigüe vae,

20ani ramo, chereko kavi jeko pegua, aike kia jete ikɨambae pe.

21Ërei aecha aupitɨ potaä arakuaa

Tumpa omeeä ko cheve yave,

jare jae yepe jókuae jae arakuaa yaikuaa yave

kia ko omeeta jókuae mbae ikavi vae yave.

Jare jayave ma aja Tumpa kotɨ

jare ayerure chupe opaete chepɨa reve: