1Filisteo juvicha reta omboatɨ opaete isundaro reta Afec pe, jare Israel iñemuña reta oyembojeyupa ɨesaɨ Jezreel pe oï vae iyɨpɨ pe.
2Jare filisteo juvicha reta omae jare oipapa kavi isundaro reta cien vae ani mil vae kuimbae yave, David jare jupiegua kuimbae reta yogüɨraja Aquis ndive taɨkue kotɨ oporoäro vaerä.
3Jare filisteo juvicha reta jei:
—¿Mbae pa kuae kuimbae hebreo reta oyapo kuae pe?
Aquis jei chupe reta:
—Kuae jae ko David, mburuvicha guasu Saúl Israel pegua jembiokuaigüe. Ërei añave año oasa ma oiko che ndive, jare mbaetɨ etei aväe teko jese jókuae ara ou güive.
4Jayave filisteo juvicha reta iyarasɨ Aquis pe, jare jei reta:
—Emondo kuae kuimbae, tëta nde remee chupea pe, jare agüɨye tojo yande ndive ñeraroa pe, güɨramoi joko pe oyovaichota yanderé. ¡Echa ipuere ko oyeaɨuka iya pe güɨraja yave yandesundaro reta iñäkagüe!
5¡Jae ko kuae David, otairari vae reta opɨrae reve jei chupe vae: “Saúl oporoyuka mil rupi jare David oporoyuka diez mil rupi”!
6Jare Aquis oenɨi David, jei chupe:
—¡Tumpa jee re jae, nde ko kuimbae jupi vae! Chemboyerovia yae reyapogüe kuae teyupa pe, mbaetɨ etei aväe teko nderé jókuae ara reyu güive chépɨri añave regua. Ërei filisteo juvicha reta mbaetɨ ipɨakatu nderé,
7jayave eyerova ye ekua ndepɨakatu reve, agüɨye vaerä ipɨakatúä filisteo juvicha reta nderé.
8Jare David jei Aquis pe:
—¿Mbae pa ayapo? ¿Kërai pa remae che nderembiokuai re aiko güire nde ndive añave regua, mbaetɨ vaerä aja añeraro nderovaicho reta ndive?
9Aquis jei chupe:
—Nde chevegua ikavi yae ko Tumpa iaraɨgua rami, ërei filisteo juvicha reta jei agüɨye vaerä reike ore ndive ñeraroa pe.
10Pɨareve köe ñoete pepüa pekua, nde jare nderembiokuai reta nde ndive yogüeru vae.
11Jökorai köe ñoete David jare jupiegua kuimbae reta yogüɨraja ye filisteo reta iɨvɨ pe; jare filisteo reta yogüɨraja Jezreel pe.
Who We AreWhat We EelieveWhat We Do
2025 by iamachristian.org,Inc All rights reserved.
