ECLESIÁSTICO 29 - Guarani Bible with DC

Mbɨa reta jae ko tovaicho iyɨpɨ

1Kuimbae iporoparareko vae oiporuka ko mbae japicha pe;

yemborɨ ñamee vae mborookuai jeia ko yayapo.

2Eiporuuka nderapicha pe mbae oata chupe yave,

jare ndevegua, mbae reiporugüe järea eraja ye eeya.

3Embopo neñee jare eiko jupi rupi ïru vae reta pe,

jaema mbae oata ndeve yave jaeñoi ko reväeta yemborɨ.

4Jeta oyemombae korepoti oiporugüe re vae

jare omoambeko kia yemborɨ omee chupe vae reta.

5Ndei korepoti oipɨɨ mbove, japicha ipo oipɨte chugüi,

jare imiari chupe ñemomichi reve imbaeyekou re;

ërei omboyevɨ ye vaerä ma yave ombopuku yae ma jókuae teko,

täta ndaye ombopɨatɨtɨ jare ara omboeko.

6Jare jókuae ombaeporuuka vae jëia yave, omboepiukata iyeupe mbɨtegüe,

jare jeita iyeupe täta jekopo vae.

Mbaetɨ yave, toñono jaema ikorepoti opa okañɨ vae,

jare jaema oyapoiñota iyeupe metei tovaicho.

Omboepɨta chupe ñee pochɨ pe jare yekura pe,

jare omboete vaerägüe jeita chupe ñeeasɨ katu vae.

7Jeta ko ñäteɨ mbae oiporuuka vae, jekopochɨ güiä,

jaeño ma ñäteɨ má omokañɨ imbaembae vae ramo.

Yomborɨ jare mbaerepɨ reta

8Ërei nde, ndepɨaguasu paravete vae pe

jare agüɨye eärouka chupe ndeporomborɨ.

9Mborookuai reta jei rami, emborɨ paravete vae;

mbae oata oï chupe yave, agüɨye emondo ipogüɨrai.

10Remombouka korepoti nerëtara vae pe ani ramo nechëi vae pe remee yave,

jare emaeño tokañɨtei tijäve ita igüɨ pe.

11Eyapo ndeyeupe metei mbae jepɨ vae mbota rupi jare mboroaɨu rupi;

jayave ko má oë kavita ndeve oro güi.

12Eñovatu mbota reta ndembaerɨru pe,

jare jae ndereroasata oipotagüe susere tuicha vae güi.

13Ndemborɨta reïraro nderovaicho reta

mɨ̈rata tätagüe ndive má jaekavi yeopiaka jare saruya ndive vae güi.

14Kia ipɨakavi vae omeeta ko mboroepɨ japicha re,

ërei kia imarambae vae oeyata ko.

15Kia oime iporoepɨta nderé yave, eyapo yasoropai chupe,

echa oñeñono susere pe nderé.

16Imbaeyoa vae omokañɨtei iporoepɨ vae imbaembae reta;

imarambae vae oeya kia güɨroasayepe vae.

17Jeta ko oikokatu vae reta oñemokañɨtei mboroepɨ jeko pegua pe,

jare opɨ̈rouka iyé ɨguasu iyɨaparúa vae pe rami.

18Kuimbae reta imbaepueregüe vae opa omokañɨtei jeta reta

jare opata ko yogüɨraja oiko ïru vae tëta guasu ambuae vae pe.

19Imbaeyoa vae opoko omee mboroepɨ reta,

jare oeka má güɨnoi vaerä vae güi oyeitɨ tekorai pe.

20Emborɨ nderapicha ndepueregüe rupi,

ërei eyeandu agüɨye vaerä rea metei ñuai pe.

Paravete, ërei oyerovia katu

21Ikavi yaiko jese vaerä vae jae ko tembíu mbɨyape, ɨ jare temimonde,

jare metei o ñaneomi vaerä iporecha vae reta imae güi.

22Má ikavi yandeparavete yaiko yandero ae pe

yayemboarete yaiko o ambuae pe vae güi.

23Eyerovia mbae renoigüe ndive, mbovɨ ani jeta vae re,

agüɨye vaerä nereroäse reta jese reta reiko vae.

24Mbɨatɨtɨ tätagüe ko o rupi yaiko vae;

echa mboupa reiko ndepuere potaä neñeeapirai.

25Emae jare emboete ïru vae mboupa reta, jare mbaetɨ yasoropai oyapo reta,

jare reenduta, jókuae rendagüe pe, jei reta ndeve jaekavimbae rupi:

26“Eyu, mboupa, eñono kavi mesa,

emee tau mbae renoigüe.”

27“Ekua mo, mboupa, oime kia ndegüi má tuicha vae;

ou oväe cherëtara jaema aiporuta mboupa reta jo.”

28¡Täta ipöra potaä metei kuimbae iyarakuaa vae pe oendu vaerä

jökorai vae ñeeasɨ kia o ambuae pe oiko vae kotɨ

jare iñeengeta chupe korepoti re ipɨa vae re!