ECLESIÁSTICO 35 - Guarani Bible with DC

1Mborookuai yayapo vae täta ko ikavi mbota jeta rupi ñamee rami ko;

mborookuai jeigüe yayapo vae jae ko yayukagüe ñarökuavee Tumpa pe yayeapo kavi vaerä vae rami ko.

2Yasoropai yayapo vae jae ko Tumpa pe ñamee tiringu ikuigüe ikavigüe rami ko,

mbota ñamee vae jae ko mɨmba yayuka yambaemboete vae pegua rami ko.

3Tumpa pe ipöra vae jae ko reyembosɨrɨta ikavimbae güi vae;

resɨrɨ mbae jupimbae güi yave, renoita ko iñɨ̈ro vaerä ndeve nde mbaeyoa re.

4Agüɨye ekua eñeñono Tumpa jóvai ndepogüɨrai,

echa opaete kuae jae ko oyeapo vaerä echa mborookuai ko.

5Metei kuimbae jupi vae güɨrökuavee mbaekɨra mɨmba oyeyuka oyeapɨ jese vae iárambo yave,

ipiche katugüe ojo oupitɨ ɨvate ete pe oï vae.

6Metei kuimbae jupi vae güɨrökuavee metei mɨmba oyukagüe yave,

Tumpa oipɨɨta ko jare ngaraa iñakañɨ chugüi.

7Emboete Tumpa ndepɨakavi reve;

agüɨye neräkateɨ mbae iagüe tenondegua vae rerökuavee yave.

8Jaeñoi mbae rerökuavee yave, nderova kuera kavi eiko

jare emee diezmo yerovia reve.

9Emee ɨvate ete pe oï vae pe jae omee ndeve rami,

ndepɨakavi reve, oime renoi rupi,

10echa Tumpa oikatu oporomboekopo

jare omboepɨta ndeve chiu yoarambo yé.

11Agüɨye eeka rerokomegua vaerä mbota pe, echa ngaraa oipota,

jare erovia mbota mbae jaekavimbae pegua re,

12echa jae ko metei Tumpa jupi vae

jare oyovake omae opaete vae re.

13Agüɨye kia eiparareko paravete vae remboavai vaerä,

jare oendu ipɨatɨtɨ vae iyerure.

14Jae oendu tɨ̈reɨ jäse vae

jare imemano vae iyaeogüe.

15¡Kërai tesaɨ osɨrɨrɨ imemano vae jetovape rupi

jare oyaeo imembɨ reta jombae vae re!

16Jäse mbɨatɨtɨ reve vae oupitɨ Tumpa oiparareko vaerä,

jare iyerure ojo oväe ara pe.

17Paravete vae jäsegüe oasapɨrasa amapɨtu reta

jare mbaetɨ opɨta ojo regua oväe Tumpa pe;

18agüɨye eyembopɨtu Tumpa ndereendu regua jare,

jae ko mburuvicha jupi vae, oyapo ndeve jupigüe.

19Jare Tumpa mbaetɨ ko oäro;

ñoraro regua jëia vae rami, mbaetɨ oyemboɨ

20opa regua ombojaɨ jaɨ kuimbae ipïrimbae

jare omee tembiporara iTumpa pe vae reta pe;

21oeya regua mɨ̈rata mbae oyembotuicha vae reta

jare ombojaɨ jaɨta jeko kavimbae reta imbaepuere;

22omboepɨ regua jae jaeiño oyapogüe

jare omeeta kuimbae reta pe iyemongeta jei rami;

23oepɨ regua jeta oyapogüe

jare omboyeroviata iyemboasa pe.

24Tumpa iporoparareko mbɨatɨtɨ iara pe

amapɨtu okɨ vaerä ou oväe aratini pe rami ko.